ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တပ်ဖွဲ့ဝင်တွေက အရပ်သားတစ်ဦးကို သစ်ပင်ပေါ်မှာ လက်နောက်ပြန်ကြိုးတုပ် ချိတ်ဆွဲပြီး အောက်ကနေ မီးမြှိုက်နှိပ်စက်နေတဲ့ ရုပ်သံတစ်ခု အခုရက်ပိုင်း လူမှုကွန်ရက်စာမျက်နှာမှာ ပျံ့နှံ့လာပြီး ဒီအပေါ်ဝေဖန်မှုတွေ ရှိနေပါတယ်။
ရှမ်းတိုင်းရင်းသား မီဒီယာအချို့မှာတော့ ဖမ်းဆီးနှိပ်စက်ခံရတဲ့ အမျိုးသားဟာ ဟိုပုံးမြို့နယ် ဖွန်ဆိုင်းရွာက ရွာသူကြီး ဦးဝါလဖြစ်တယ်လို့ ရေးသားနေကြပါတယ်။
ရွာအနီးမိုင်းပေါက်ကွဲမှုကြောင့် ဦးဝါလ အပါအဝင် ရွာသားအချို့ကို SSPP တပ်ဖွဲ့က ၂၀၂၃ ခုနှစ်၊ ဧပြီလ ၇ ရက်နေ့မှာ ဖမ်းဆီးသွားခဲ့ပြီး အဆက်အသွယ်ပြတ်တောက်နေတာလို့ ဆိုပါတယ်။
အဲဒီရုပ်သံမှာ SSPP တပ်ဖွဲ့ဝင်တွေက ရွာသားကိုစစ်မေးနေပြီး ရွာသားက မသိရှိကြောင်း ငြင်းဆိုနေတာလို့ အမည်မဖော်လိုတဲ့ ရှမ်းလူငယ်အဖွဲ့ဝင်တစ်ဦးက RFA ကို ပြောပါတယ်။
“သူတို့မေးတာက ရှိလား၊ ရှိလား အဲဒါပဲမေးနေတာ၊ ဘာမေးတာလဲ ကျွန်တော်လည်း မသိဘူးပေါ့နော်။ ခံရတဲ့သူက မသိဘူးလို့ ပြောနေတယ်။ ပြီးတော့ ဘုရား၊ တရား၊ သံဃာ တပြီးအော်နေတာ။ ကြည့်လို့ ဘယ်လိုမှ အဆင်မပြေဘူး။ အပြစ်ကျူးလွန်တယ် ဆိုရင်တောင် ဒီလိုမျိုး မလုပ်သင့်ဘူးနော်”
SSPP တပ်ဖွဲ့က ရွာသားတစ်ဦးကို အခုလို နှိပ်စက်နေတဲ့အပေါ် ရှမ်းလူငယ်အဖွဲ့အချို့ ကလည်း ကန့်ကွက်ကြောင်း ထုတ်ဖော်ပြောဆိုနေကြပါတယ်။
SSPP ပြောခွင့်ရ ဗိုလ်မှူးစိုင်းဖုန်းဟန်ကတော့ မိုင်းကိုင်နဲ့ လဲချားဘက်မှာ SSPP စစ်ကြောင်းတွေကို RCSS က မကြာခဏ မိုင်းထောင်တာ၊ ချောင်းမြောင်းပစ်ခတ်မှုတွေ ဖြစ်နေတဲ့အပေါ် ပါဝင်ပတ်သက်တယ်လို့ သံသယရှိသူတွေကို စစ်ဆေးနေတာလို့ ပြောပါတယ်။
နှိပ်စက်ခံရသူတွေ ဘယ်သူဘယ်ဝါဆိုတာကို လက်ရှိပြောလို့မရသေးပေမယ့် စစ်ဆေးမှုအတွင်း စစ်ဥပဒေထက် ကျော်လွန်စစ်ဆေးခဲ့မှုအတွက်ကိုတော့ ကျူးလွန်သူတွေကို စုံစမ်းဆေးမှာဖြစ်တယ်လို့ ဗိုလ်မှူးစိုင်းဖုန်းဟန်က RFA ကို ပြောပါတယ်။
“အောက်ခြေတပ်သားတွေဟာ မကြာခဏ ခြုံခိုတိုက်ခိုက်ခံရတာ မိုင်းဆွဲခံရတာတွေ ရှိတော့ အဲအပေါ်မှာ စိတ်ခံစားချက်တွေ ရှိကြတယ်။ အခုလည်း မိုင်းထောင်ရာမှာ ပါဝင်တယ်လို့ ယူဆရတဲ့သူတွေကို စစ်ဆေးရာမှာ လူ့အခွင့်အရေးနဲ့ရော၊ စစ်သုံ့ပန်းဥပဒေနဲ့အညီ မလုပ်ဘဲ စိတ်ခံစားချက်တွေပါပြီး လုပ်ခဲ့တဲ့သဘောဖြစ်လို့ အရေးယူမှုတွေလုပ်မှာ ဖြစ်ပါတယ်”
ဒီကိစ္စအပေါ် ရှမ်းပြည်ပြန်လည်ထူထောင်ရေးကောင်စီ (RCSS) တပ်ဖွဲ့ ပြောခွင့်ရ ဒုတိယဗိုလ်မှူးကြီးအုမ်ခေးကို RFA က ဖုန်းနဲ့ဆက်သွယ်မေးမြန်းခဲ့ပေမယ့် လက်ခံဖြေဆိုတာ မရှိသေးပါဘူး။
ရှမ်းပြည်တောင်ပိုင်း လဲချား၊ ပင်လုံ၊ မိုင်းကိုင်မြို့နယ်ထဲမှာ RCSS နဲ့ SSPP အကြား မကြာခဏ စစ်ရေးတင်းမာနေပြီး နှစ်ဖက်တပ်ဖွဲ့နဲ့ နီးစပ်တယ်လို့ သံသယဝင်ခံရတဲ့ ရွာသားတွေလည်း အခုလိုပဲ ဖမ်းဆီးခံနေရပါတယ်။
