Blog Single Author Small

လူသတ်ကြောင်းကိုယ်တိုင်ပြောနေတဲ့ စစ်ကောင်စီတပ်သားတွေရဲ့ ရုပ်သံနဲ့ဓာတ်ပုံများ

စစ်ကိုင်းတိုင်းမှာ အာဏာသိမ်းစစ်ကောင်စီက စစ်ဆင်ရေးလုပ်နေတဲ့ ကာလအတွင်း တပ်သားတွေရဲ့ ရက်စက်ကြမ်းကြုတ်မှုတွေကို သိသာပေါ်လွင်စေတဲ့ ဓာတ်ပုံတွေနဲ့ ဗီဒီယိုမှတ်တမ်းတစ်ခုကို RFA က ရရှိထားပါတယ်။

ရရှိထားတဲ့ဓာတ်ပုံပေါင်း ၁၄၄ ပုံဖြစ်ပါတယ်။ အဲဒီပုံတွေထဲမှာ အရပ်သား ၃ဝ လောက်ကို လက်ပြန်ကြိုးတုပ်ဖမ်းထားပြီး၊ ဘုန်းကြီးကျောင်းတစ်ကျောင်းအောက်မှာ စုပြီးထိုင်ခိုင်းထားပုံတွေလည်း ပါဝင်ပါတယ်။ ဒါ့အပြင် မျက်လုံးတွေကို ပုဆိုးစနဲ့စည်း၊ လက်ပြန်ကြိုးတုပ်၊ နောက်စေ့ကနေ ပစ်သတ်ခံထားပြီး သွေးအိုင်ထဲမှာလဲနေတဲ့ အရပ်ဝတ်နဲ့လူငါးယောက် အလောင်းနံဘေးမှာ ရုပ်သံဖိုင်ထဲက စစ်သားနှစ်ယောက်က ရပ်ကြည့်နေတဲ့ဓာတ်ပုံတွေလည်း ပါဝင်ပါတယ်။

ဒီဗီဒီယိုနဲ့ ဓာတ်ပုံတွေကို ဗီဒီယိုထဲမှာ စုဝေး‌ပြောဆိုနေကြတဲ့ စစ်သားသုံးယောက်အနက် လက်ယာဘက်အစွန်လူရဲ့ တယ်လီဖုန်းထဲက ရရှိတာ ဖြစ်ပါတယ်။ အဲဒီစစ်သားကျကျန်ခဲ့တဲ့ တယ်လီဖုန်းကို အရာတော်မြို့ နယ်မှာ ဒေသခံတစ်ဦး ကောက်ယူရရှိခဲ့ရာကနေ အဲဒီတယ်လီဖုန်းထဲက ပုံတွေနဲ့ ဗီဒီယိုကို RFA ဝါရှင်တန်ရုံးချုပ်က လက်ခံရရှိခဲ့တာပါ။

ပုံတွေထဲမှာ စစ်သားတစ်ယောက်က Selfie လို့ခေါ်တဲ့ ကိုယ့်ဘာသာကိုယ် ရိုက်ထားတဲ့ပုံတွေ ပါဝင်တဲ့အတွက် တယ်လီဖုန်းဟာ အဲဒီစစ်သားရဲ့ဖုန်းလို့ ကောက်ချက်ချနိုင်ပါတယ်။ သူက ဒီရုပ်သံကိုလည်း သူ့ဘာသာရိုက်ယူနေတာပါ။ ၁ဝ မိနစ်ခွဲနီးပါး ရှည်လျားတဲ့ ဗီဒီယိုမှတ်တမ်းမှာတော့ အလောင်းတွေကို ရပ်ကြည့်နေတဲ့ ဓာတ်ပုံတွေထဲက လက်နက်ကိုင်စစ်သားနှစ်ယောက်၊ လက်မောင်းမှာ တပ်ကြပ်တံဆိပ်နဲ့ စစ်သားတစ်ယောက်၊ စုစုပေါင်းသုံးယောက်က လူတွေကို ဘယ်လိုဘယ်နည်း သတ်ဖြတ်ခဲ့တယ်၊ ဘယ်နှဦးကို သတ်ဖြတ်ခဲ့တယ်… စသဖြင့် ပြောနေကြတာကို တွေ့ရကြားရပါတယ်။

“၂၆ ယောက်သတ်တာ”
“…ခင်ဗျား ဘယ်လိုသတ်ဖူးလဲ”
“ဟင်…”
“၂၆ ယောက်တောင် သတ်ဖူးတယ်ဆိုတော့ ဘယ်လိုတွေ သတ်ဖူးသလဲလို့၊ သေနတ်နဲ့ပဲ ပစ်တာလား။
“မဟုတ်ဘူးလေကွာ၊ အဲဒီလိုတော့။ သေနတ်နဲ့ပစ်တာတော့ ရှိတယ်လေကွာ။ လက်နဲ့တော့ မသတ်ခဲ့ဘူးပေါ့”
“ကျနော်ကတော့ လည်ပါလှီးခဲ့တယ်”
” လည်ပင်းလှီးတာ။ အဲလို လည်လှီးခဲ့တာတော့ အများကြီးပေါ့”
“ကျနော်သတ်တာ ငါးယောက်ပဲ သတ်ဖူးတယ်။ ငါးယောက်ထဲပဲရှိတယ်”

“ငါမသတ်ဖူးဘူး”
“ကြောက်နေတယ်… သမီးကြောက်တယ်… ဟားဟားဟား…”
“ရှစ်ယောက်လောက် ရှိသွားပြီ။ ဟေ့ကောင် မင်းသိတယ်နော်။ ၈ ယောက်လောက်ရှိသွားပြီ”

ဒီဓာတ်ပုံတွေကို အသေးစိတ်ကြည့်တဲ့အခါ အင်္ကျီလက်မောင်းတံဆိပ်တစ်ခုက မြန်မာ့တပ်မတော်ရဲ့တံဆိပ် ဖြစ်နေတာ တွေ့ရပါတယ်။ နောက်ထပ် ထင်ထင်ရှားရှားတွေ့ရတဲ့ လက်မောင်းတံဆိပ်က စစ်ကိုင်းတိုင်းအခြေစိုက် အနောက်မြောက်တိုင်းစစ်ဌာနချုပ် (နမခ) တံဆိပ် ဖြစ်နေပါတယ်။ ဒါ့အပြင် စစ်ကောင်စီတပ်သားတွေ လွယ်လေ့ရှိတဲ့ ခြင်းတောင်း၊ ဓာတ်ပုံတွေမှာမြင်ရတဲ့ တခြားအချက်အလက်တွေ၊ လက်နက်တွေကို ကြည့်ရင် စစ်ကောင်စီတပ်ကတပ်သားတွေ ဆိုတာ သိသာထင်ရှားနေပါတယ်။ ဘယ်တပ်မ၊ ဘယ်တပ်ရင်းကလဲ ဆိုတဲ့နံပါတ်တွေကိုတော့ သူတို့ရဲ့ဝတ်စုံတွေမှာ မတွေ့ရပါဘူး။

ဒါပေမဲ့ သေနတ်ဒင်မှာ “၇၀၈၊ လေး-မျဉ်းစောင်း-သုံး” ဆိုတဲ့နံပါတ်ကို တွေ့ရတဲ့အတွက် CDM ဗိုလ်ကြီးလင်းထက်အောင်ကို RFA က ဆက်သွယ်မေးမြန်း စုံစမ်းတဲ့အခါ… အဲဒီနံပါတ်ဟာ ရန်ကုန်အခြေစိုက် အမှတ် (၄) စစ်ဆင်ရေးကွပ်ကဲမှုဌာနချုပ် လက်အောက်ခံ ခမရ (၇၀၈) ဖြစ်တဲ့အကြောင်း၊ နံပါတ်လေးဆိုတာက တပ်ခွဲ (၄) ကိုရည်ညွှန်းတာဖြစ်ပြီး၊ နံပါတ်သုံးကတော့ သေနတ်နံပါတ် ဖြစ်ကြောင်း၊ အဲဒီ ခမရ (၇၀၈) ဟာ လတ်တလော စစ်ကိုင်းတိုင်းနဲ့ မကွေးတိုင်းမှာ ပူးတွဲစစ်ဆင်ရေးလုပ်နေတာ ဖြစ်နိုင်တဲ့အကြောင်း ပြောပြပါတယ်။

ဒီရုပ်သံနဲ့ ဓာတ်ပုံတွေကိစ္စအတွက် စစ်ကောင်စီဘက်က တုံ့ပြန်ချက်ကိုရဖို့ စစ်ကောင်စီပြောခွင့်ရသူ ဗိုလ်ချုပ်ဇော်မင်းထွန်းကို RFA ရုံးချုပ်က မေးမြန်းတဲ့အခါ သူက အခုလိုပြောပါတယ်။

“ဒီကိစ္စတွေနဲ့ပတ်သက်လို့ ကျနော်တို့က မြေပြင်ကို မေးမြန်းစုံစမ်းပြီးမှသာ အကျိုးအကြောင်း ဖြေကြားနိုင်မှာဖြစ်ပါတယ်။ ကျနော်တို့ မေးမြန်းလျက်ရှိပါတယ်ဗျ”

ဓာတ်ပုံတွေကို RFA ရုံးချုပ်မှာ လေ့လာချက်အရ ရိုက်ကူးတဲ့တယ်လီဖုန်းဟာ တရုတ်နိုင်ငံလုပ် OPPO အမျိုးအစားဖြစ်တာ တွေ့ရပါတယ်။ အရပ်သားတွေကို လက်ပြန်ကြိုးတုပ်ပြီးဖမ်းထားတဲ့ ဓာတ်ပုံတွေကို ရိုက်ကူးတဲ့နေ့စွဲက အခုနှစ် မေလ ၁ဝ ရက်နေ့ ဖြစ်ပြီး၊ လူငါးယောက်ကို သတ်ဖြတ်ထားတဲ့ဓာတ်ပုံ ရိုက်ကူးထားတဲ့နေ့စွဲက မေလ ၁၁ ရက်နေ့ ဖြစ်ပါတယ်။ ဒါ့အပြင် အဖမ်းခံထားရတဲ့သူတွေနဲ့ အသတ်ခံထားရသူတွေကို စစ်ဆေးကြည့်တဲ့အခါ တူညီနေတာတွေကို တွေ့ရပါတယ်။

ဓာတ်ပုံ ၁၄၄ ပုံစလုံးကို စစ်ဆေးတဲ့အခါ ဧပြီလ ၁၃ ရက်နေ့ကနေ ဇွန်လ ၃ ရက်နေ့ အကြားမှာ ရိုက်ထားတယ်ဆိုတဲ့မှတ်တမ်းကို တွေ့ရပါတယ်။ အဲဒီထဲမှာ လူငယ်တစ်ယောက်ရဲ့ရင်ဘတ်ကို ဓားနဲ့စိုက်ပြီး စစ်ဆေးနေတဲ့ပုံက ဧပြီလ ၂၈ ရက်နေ့က ရိုက်ကူးထားတာ ဖြစ်ပါတယ်။ ဒါပေမဲ့ ဒီပုံတွေကို ဘယ်နေရာ ဘယ်ရွာတွေမှာ ရိုက်ထားတာလဲဆိုတာကိုတော့ အတိအကျ မသိရသေးပါဘူး။ ရုပ်သံဖိုင်ကိုလည်း ဘယ်နေ့က၊ ဘယ်နေရာမှာ ရိုက်ထားတယ်ဆိုတာကို စစ်ဆေးလို့ မရသေးပါဘူး။

ဒီလူတွေကိုဖမ်းထားတဲ့နေရာကို လေ့လာကြည့်တဲ့အခါ ခြံတံတိုင်းပုံစံနဲ့ တံခါးမှာတွေ့ရတဲ့ ၂၄ ပစ္စည်းစက်ဝိုင်းပုံ၊ ခြေတံရှည်အဆောက်အအုံ ဖွဲ့စည်းပုံတွေအရ ဘုန်းကြီးကျောင်းတစ်ကျောင်းဖြစ်တယ် ဆိုတာ သိသာနေပါတယ်။

ဒါကြောင့် အရာတော်မြို့နယ်မှာ မေလအတွင်းက ဘာတွေဖြစ်ခဲ့လဲဆိုတာ လက်လှမ်းမီ သလောက် စုံစမ်းကြည့်တဲ့အခါ ချင်ပင်ရွာမှာ မေလ ၇ ရက်နေ့က စစ်ကောင်စီတပ်ကဝင်သွားပြီး ကင်းပုန်းဝပ်နေတဲ့သူ ၆ ယောက်ကို ပစ်ခတ်ဖမ်းဆီးခဲ့သလို၊ လူ ၃၀ ကိုဓားစာခံအဖြစ် ခေါ်ဆောင်သွားတယ်လို့ “အရာတော်ပို့စ်” ဆိုတဲ့ ဒေသခံတွေရဲ့ ဖေ့စ်ဘွတ်စာမျက်နှာမှာ မေလ ၁၁ ရက်နေ့က ဖော်ပြထားတာ တွေ့ရပါတယ်။

အဲဒီသတင်းကို စုံစမ်းကြည့်တဲ့အခါမှာလည်း အဲဒီချင်ပင်ရွာမှာ မေလ ၇ ရက်နေ့က ရွာသား ၇ ယောက်ကို စစ်ကောင်စီတပ်က ဖမ်းသွားတဲ့အကြောင်း၊ အဲဒီလူတွေ ဘယ်မှာရောက်နေသလဲဆိုတာ အခုထိ သတင်းမရသေးကြောင်းသာ သိရပါတယ်။

စစ်တပ်အာဏာသိမ်းပြီးနောက် စစ်ကိုင်းတိုင်းအတွင်းက ဖြစ်ရပ်တွေနဲ့ ပတ်သက်လို့ RFA က တင်ပြခဲ့ရာမှာ ရေဦးမြို့နယ် မုန်တိုင်ပင်ရွာမှာ မေလ ၁၀ ရက်ကနေ ၁၃ ရက်အတွင်း စစ်ကောင်စီတပ်က လူ ၃၀ ကို ဖမ်းဆီးသတ်ဖြတ်ခဲ့တဲ့အကြောင်း မေလ ၁၃ ရက်နေ့မှာ သတင်းဖော်ပြခဲ့ပါတယ်။

အသတ်ခံထားတဲ့သူ ငါးယောက်ထဲက တစ်ယောက်ဟာ ရေဦးမြို့မှာရှိတဲ့ ကြည်သာလျှပ်စစ်ပစ္စည်းဆိုင်တံဆိပ်နဲ့ တယ်လီဖုန်းနံပါတ်တွေပါတဲ့အင်္ကျီ ဝတ်ထားတဲ့အတွက် ရေဦးမြို့နယ်မှာရော ဒီလိုဖြစ်ရပ်ရှိခဲ့သလား ဆိုတာကို စုံစမ်းခဲ့ပါတယ်။ RFA က ဆက်သွယ်မေးမြန်းကြည့်တဲ့အခါ ဓာတ်ပုံပါလူတွေကို ဖမ်းဆီးထားတဲ့ အဆောက်အအုံဟာ မုန်တိုင်ပင်ရွာကဘုန်းကြီးကျောင်း ဖြစ်တယ်လို့ ရေဦးမြို့နယ်ဒေသခံနှစ်ယောက်က အတည်ပြု ပြောပါတယ်။

ဒါပေမဲ့ အဲဒီဒေသမှာ အင်တာနက်မရတာ၊ တယ်လီဖုန်းဆက်သွယ်ရေးခက်ခဲတာ၊ သတင်းထောက်တွေကိုယ်တိုင် သွားရောက်စုံစမ်းဖို့ အခက်အခဲရှိတာတွေကြောင့် လူ ၃၀ ကိုဖမ်းဆီးထားတာနဲ့ လူ ၅ ယောက်ကို သတ်ဖြတ်ထားတာဟာ မုန်တိုင်ပင်ရွာက ဖြစ်တယ်လို့ RFA အနေနဲ့ သီးခြားအတည်ပြုလို့ မရနိုင်သေးပါဘူး။

ဒီဗီဒီယိုထဲမှာ ပြောဆိုနေတဲ့ အကြောင်းအရာတွေဟာ စစ်ကောင်စီတပ်သားတွေက သူတို့ လူဘယ်နှယောက် သတ်ခဲ့တဲ့အကြောင်း၊ ဘယ်လိုသတ်ဖြတ်ခဲ့တယ် ဆိုတဲ့အကြောင်းတွေကို သာမန် ထမင်းစားရေသောက် ကိစ္စလို ပြောဆိုနေတာ ဖြစ်ပါတယ်။

“အကောင်းပြောတာ၊ လူသတ်ဖူးတယ်။ အဲဒီလောက်ထိ အစ်ကိုကြီးလောက်…၊ ကျနော် အခုလိုမျိုး သွေးတွေဘာတွေဆိုရင် ကျနော်ရွံတယ်။ ရွံတတ်တယ်သိလား။ လူသာ သတ်တာ”
“သုံးပိုင်းလောက် ပိုင်းပြီးလို့ရှိရင် (…မသဲကွဲ…) ဟိုနားလေးမှာ။ တပ်ရင်းမှူးက” 
“မှန်တယ်လေ ရွံတတ်တာကိုပြောတာ ကျနော်က”
” အဲ့ဒီကောင်တွေကို မနေ့တုန်းက ငါသတ်တာ။ ငါဖမ်းတဲ့ကောင်ကို ငါသတ်တာ၊ အဲဒါကို… ‘ဆာဂျင်ကြီး သုံးပိုင်းလောက်ပိုင်းပြီး မြှုပ်ခဲ့ပါဦး’…တဲ့”
“အဲဒါ သတ်တော့ ဘာဖြစ်လဲ၊ အသားတွေ ထွက်လာလား။ ဝက်သားတွေ ဒုတ်ထိုးတွေ ဘာတွေ ရောင်းလို့မရဘူးလား”
(မသဲကွဲ)

“အဝါ ၊ အဝါ၊ အဝါရောင်လေး”
“ခင်ဗျားအခုမှတွေ့ဖူးတာလား”
“အေးလေ၊ ငါအခုမှ တွေ့ဖူးတာလေ”
“ခေါင်းကိုဖြတ်တာ။ လေးငါးခြောက်ချက်လောက် ခုတ်ရတယ်။ ပြီးတော့ မြေကြီးထဲ မြှုပ်ထားခဲ့တယ်”

“နောက်စေ့ပွင့်ထွက်သွားတယ်နော်။ ပုဆိုးတွေ ဟိုဟာတွေ ခွာတာတောင် အသားတွေ ကွာထွက်ကုန်တယ်။ မီးလောင်ထားတာ။ အဲဒါကြောင့် တော်တော်လေး စိတ်ကုန်သွားတယ်၊ အသားတွေ ဘာလို့ပြဲကွဲနေတယ်။ ဘယ်သူလဲ ဟိုကောင်၊ ကျော်ဇင်ဦး၊ ကျော်ဇင်ဦးက စီနီယာဆိုပြီး ဒီဘက်ကိုမြှုပ်တယ်။ ဟိုကောင်ကပြုတ်ကျသွားတယ်။ မင်းလည်း ကံကောင်းလို့ ကျန်သွားတာ။ ဟုတ်လား ဟေ့ကောင်။ ကျနော်က ကံကောင်းတယ် အချိန်မရွေးကံကောင်းတယ် ဆရာ။ သေမထူးနေမထူး ဘဦး ထဲမှာပါတယ်။ ဆရာကြီး သေမထူးနေမထူး ကြည်ငြိမ်းတော့မဟုတ်ဘူးနော် ဘဦးနော်”

“ဒါလိုရင် ဒါလိုက်ရှာတယ်၊ အိမ်တွေလိုက်ရှာတယ်၊ ဒါရှိလား”
“ဝက်သားစားချင်ရင် ဝက်သတ်မယ်၊ ကြက်ပေါ်မယ်”
“မယုံဘူးလား၊ မယုံရင်လာကြည့်။ သတ်တဲ့နေရာမှာ ကျနော်က Expert (ကျွမ်းကျင်သူ) … ကျနော်က ငယ်ငယ်လေးကတည်းက သတ်တာကို ဝါသနာပါတာ သူများအသက်ကို။ ကျနော့်အသားနာမှာတော့ အရမ်းကြောက်တယ်”

RFA News