Blog Single Author Small

ကရင်ပြည်နယ်မှာ ဩဂုတ်လ ၁ ရက်နေ့ကနေ ဩဂုတ် ၅ ရက်နေ့အထိ မိုးဆက်တိုက်ရွာပြီး ဒေါနတောင်ကျရေ သောင်ရင်းမြစ်ထဲ ဒလဟော စီးဆင်းမှုတွေကြောင့် မြဝတီ ၊ ဝေါလေ ဒေသတစ်လျှောက် ထိုင်းမြန်မာနယ်စပ်ကျေးရွာတွေနဲ့ မြဝတီမြို့ပေါ်ရပ်ကွက်တွေ ရေကြီးရေလျှံ နေပါတယ်။

ဘားအံ ၊ လှိုင်းဘွဲ့၊ ကော့ကရိတ်၊ ကြာအင်းဆိပ်ကြီး၊ မြဝတီ၊ ကျုံဒိုးဒေသက ရပ်ကွက်နဲ့ ကျေးရွာတွေမှာ ဒေါနတောင်ကျရေ ဆက်ပြီးတိုးဝင်တာကြောင့် သောင်ရင်းမြစ်၊ လှိုင်းဘွဲ့ချောင်း၊ ဂျိုင်းမြစ်၊ သံလွင်မြစ်၊ ဟောင်သရောမြစ်တွေ ရေကြီးရေလျှံနေတယ်လို့ ဒေသခံတွေက ပြောပါတယ်။

မြဝတီမြို့ပေါ် မှာ လက်ခတ်တောင်တိုက်ပွဲကြောင့် တောရဘုန်းကြီးကျောင်းမှာ စစ်ဘေးရှောင်နေတဲ့ ဒေသခံငါးရာလောက် ရှိခဲ့ရာက အခု ရေဘေးရှောင် ဒေသခံတွေပါ ထပ်တိုးလာတဲ့အတွက် လူဦးရေ ခုနှစ်ရာလောက်အထိ ရှိလာပြီး နောက်ထပ် ရေဘေးရှောင်စခန်းခြောက်ခုမှာလဲ ဒေသခံ ၁၃၃၆ ယောက်အထိ ရှိလာပြီလို့ စစ်ရှောင်တွေကို အစားအသောက် ကူညီပေးနေတဲ့ မြဝတီမြို့ ရှိ ပရဟိတအဖွဲ့ တွေက ပြောပါတယ်။

ကြာအင်းဆိပ်ကြီးမြို့ ခြောက်ရပ်ကွက်မှာလည်း ရေကြီးနေတာကြောင့် အိမ်ခြေ ၈၂ အိမ်လောက် ရေမြှုပ်နေပြီး ရပ်ကွက်အတွင်းနေထိုင်သူတွေ ကြာအင်းဆိပ်ကြီးမြို့ မူကြိုကျောင်း အနောက်ဘက် ကုန်မြင့်လမ်းဘက်မှာ ပြောင်းရွှေ့နေထိုင်ကြတယ်လို့ ဒေသခံတစ်ဦးကပြောပါတယ်။

ဘားအံ ကြာအင်းတောင်တက်လမ်း၊ စုကလိမြို့သစ် တောင်တက်လမ်း၊ ဝေါလေ ၊ ဆုံဆည်းမြိုင်လမ်းပိုင်း၊ မြဝတီ-ကော့ကရိတ် အာရှလမ်းပိုင်းတွေမှာလည်း တောင်ပြို၊ မြေပြို ၊လမ်းပြိုပျက်တာတွေ ရှိနေတယ်လို့ ဆိုပါတယ်။

လှိုင်းဘွဲ့ မြို့ပေါ်ရပ်ကွက် လေးခုအပြင် ကျောင်းတွေ ၊ စျေးတွေ ၊ဆေးရုံ နဲ့ စစ်ကောင်စီရုံးတွေ ရေမြှုပ်နေလို့ ဒေသခံတွေ ရေဘေးရှောင်ဖို့ ကုန်းမြင့်တဲ့နေရာမှာဆောက်ထားတဲ့ မူလတန်းကျောင်းမှာ ယာယီ နေရာချထားပေးတယ်လို့ လှိုင်းဘွဲ မြို့ ရပ်ကွက် အုပ်ချုပ်ရေး တာဝန်ရှိသူက ပြောပါတယ်။

“ဒီမှာ အခုလက်ရှိ ရေတက်နေတယ်၊ အခုလှိုင်းဘွဲ့ဈေးအရှေ့တို့ ဘာတို့ဆို မြှုပ်နေပြီ၊ နောက်ပြီးတော့ ​ လေးရပ်ကွက်မှာရှိတဲ့ အနိမ့်ပိုင်းတွေအကုန်လုံး အခုက မြုပ်နေတယ်၊ (က)ရပ်ကွက်၊ (ခ)ရပ်ကွက်၊ (ဂ)ရပ်ကွက်၊ (ဃ)ရပ်ကွက် မူလွန်ကျောင်း၊ အဲ့ဒီကျောင်းမှာကတော့ လောလောဆယ်တော့ ယာယီပေးပြောင်းရွှေ့ထားတယ်ပေါ့ ၊ လပြည့်မတိုင်ခင်နေ့က စတက်တယ်၊ တက်ပြီးတော့ လပြည့်နေ့မှာ ရေတက်တယ်၊ တက်ပြီးတော့ နည်းနည်းလေးပြန်ကျသွားတယ်၊ ကျတော့ ရေကငြိမ်နေတယ် တစ်အားမကျဘူး၊ မကျတော့ မနေ့ကနေ ပြန်တက်တယ်”

ကရင်ပြည်နယ်ထဲက ဘားအံ မြို့ရဲ့ သံလွင်မြစ်ရေဟာ စိုးရိမ်ရေ အမှတ် ၇၅ဝ စင်တီမီတာကနေ ၈၃၄ စင်တီမီတာအထိ တိုးလာနေပြီး မြဝတီမြို့မှာလည်း သောင်ရင်းမြစ်ရေ စိုးရိမ်ရေအမှတ် ၉၆၃ စင်တီမီတာကနေ ၁၀၄၄ စင်တီမီတာအထိ မြင့်တက်နေတယ်လို့ စစ်ကောင်စီ မိုးလေဝသဇလဗေဒညွှန်ကြားမှုဦးစီးဌာနက ထုတ်ပြန်ထားပါတယ်။

ဒီလို မိုးဆက်တိုက်ရွာ ရေကြီးရေလျှံတဲ့ကြားကပဲ ဩဂုတ်လ ၃ ရက်က စစ်ကောင်စီတပ်ဖွဲ့တွေ လက်ခတ်တောင်ကို ပြန်ပြီးသိမ်းဖို့ တက်လာတဲ့အတွက် KNLA ပူးပေါင်းတပ်ဖွဲ့တွေနဲ့ တိုက်ပွဲဖြစ်ခဲ့တယ်လို့ ပူးပေါင်းတပ်ဖွဲ့ တပ်ရင်း ၂၇ တာဝန် ရှိသူက ပြောပါတယ်။ အဲဒီတိုက်ပွဲမှာ စစ်ကောင်စီအရာရှိ တစ်ဦးအပါအဝင် စစ်သားလေးဦးထိခိုက်ဒဏ်ရာရခဲ့ပြီး ဒီဒဏ်ရာရတဲ့သူတွေကို တပ်မ ၄၄ လက်အောက်ခံ ခမရ ၁၁၈ တပ်ရင်းက ဗိုလ်မှုးအောင်နိုင်ဦးနဲ့ အဖွဲ့က ပြန်သယ်သွားတယ်လို့ သူက ပြောပါတယ်။

“ဝါဆိုလပြည့်ရက်မတိုင်ခင်ထဲက မိုးရွာနေတယ်၊ စစ်တပ်ကလည်း တက်လာတိုက်မယ်ဆိုတာသိတော့ ကျွန်တော်တို့ ပြင်ဆင်ထားတယ်၊ အဲ့တာ ၃ ရက်နေ့က ညဘက်ကြီး ၂၇၅ စစ်တပ် က လက်နက်ကြီး လေကွဲ ဗုံးသီးတွေ ပစ်ကူပြီး တက်လာတာမှာ ပြန်ပစ်ချတော့ စစ်တပ် အရာရှိ တစ်ယောက်နဲ့ ရဲဘော် လေးယောက် ကျည်ထိ၊ မိုင်းထိ လို့ တောင်အောက်ပြန်ဆုတ်ပြီး ဒဏ်ရာရတဲသူတွေကို သင်္ဃန်းညီနောင်ဆေးရုံကို သယ်သွားတယ် “

မြဝတီမြို့က စစ်ကောင်စီရဲ့ လက်ခတ်တောင် တာဝါတိုင်စခန်းကို ပြီးခဲ့တဲ့ ဇူလိုင် ၂၀ ရက်နေ့က ကော်ဘရာစစ်ကြောင်းအပါအဝင် ကရင်အမျိုးသား အစည်းအရုံး (KNU) လက်အောက်ခံ KNLA နဲ့ ပူးပေါင်းတပ်တွေ တိုက်ခိုက်သိမ်းပိုက်ခဲ့တာပါ။

ပြီးခဲ့တဲ့ ဩဂုတ် ၂ ရက်ကလည်း ကြားအင်းဆိပ်ကြီးမြို့နယ် ခလယ်တံခွန်တိုင်ကျေးရွာမှာ မိုးရွာနေချိန် စျေးဝယ်ထွက်လာတဲ့ စစ်တပ်ကို KNLA ပူးပေါင်းစစ်ကြောင်းတွေ တိုက်ခိုက်ရာမှာ စစ်တပ်ဘက်က ထိခိုက်သေဆုံးတာတွေ ရှိတယ်လို့ KNLA ပူးပေါင်းတပ်တွေဖက်က ပြောပါတယ်။

မိုးအဆက်မပြတ်ရွာနေလို့ ကြာအင်းဆိပ်ကြီး ဒေသမှာ ဒရုန်းတိုက်ခိုက်မှုတွေကို ရပ်နားထားပြီး စစ်ကောင်စီတပ်ရဲ့မြေပြင် စစ်ရေးလှုပ်ရှားမှုတွေကိုတော့ မျက်ခြေမပြတ် စောင့်ကြည့်နေတယ် လို့ Cloud wings ဒရုန်းတပ်ဖွဲ့ တာဝန်ခံ ကိုငြိမ်းက ပြောပါတယ်။

တိုက်ပွဲအခြေအနေတွေနဲ့ ပတ်သက်လို့ ကရင်ပြည်နယ် လုံခြုံရေးနဲ့ နယ်စပ်ရေးရာဝန်ကြီး ဗိုလ်မှုးကြီး မျိုးမင်းနောင် ကို RFA တယ်လီဖုန်းသုံးကြိမ်ထက်မနည်း ဆက်သွယ်ခဲ့ပေမဲ့ ဖုန်းလက်ခံ ဖြေဆိုတာ မရှိပါဘူး။

KNLA ပူးပေါင်းအဖွဲ့ ဂဠုန်စစ်ကြောင်းတာဝန်ခံကလည်း ကော့ကရိတ်၊ ကျုံဒိုး ဒေသတွင်းက လမ်းမတွေ၊ ကျေးရွာတွေ ရေကြီးရေမြှုပ်တာကြောင့် စစ်ရေးလှုပ်ရှားဖို့ အဆင်မပြေသေးဘူလို့ ဆိုပါတယ်။

“လူမပြောနဲ့ ကားတောင်ဖြတ်လို့မှမရတာ၊ တချို့ဟာ လမ်းလျှောက်တော့ ရဲဘော်တွေအတွက်လည်း ကျန်းမာရေးအရတွေရော ဘာတွေရော ဘာတစ်ခုမှမကောင်းဘူးလေ ရိက္ခာလည်း အခက်အခဲဖြစ်တာပေါ့ ၊ ဒီမိုးတွင်းအခြေနေဆိုတော့ အရင်တုန်းကတော့ တစ်နေရာနဲ့တစ်နေရာသွားရတာ မြန်ဆန်တယ်ပေါ့ ၊ အခုကတော့ တစ်နေရာနဲ့ တစ်နေရာသွားရတာ ရက်တွေစောင့်ရတာပေါ့ ၊ ရေကျအောင် စောင့်ရတဲ့ရက်တွေ တော်တော်များလာတာပေါ့။”

မြဝတီမြို့ လက်ခတ်တောင်မှာ နယ်မြေ စိုးမိုးထားတဲ့ တပ်မဟာ ၆ KNU/KNLA တပ်ရင်း ၂၇ ၊ ကော်ဘရာစစ်ကြောင်း၊ ကျားသစ်နက် စစ်ကြောင်း၊ Federal Wings နဲ့ ရောင်နီ ဒရုန်းတပ်ဖွဲ့ တွေ ကို စစ်ကောင်စီ တပ်မ (၄၄) လက်အောက်ခံ ခမရ (၁၁၈)၊ လ (၈)၊ မ (၉)၊ မ (၂) နဲ့ ကရင်နယ်ခြားစောင်တပ် BGF တပ်တွေ ပူးပေါင်းပြီး ပြန်သိမ်းပိုက်ဖို့ ဆက်ပြီး ကြိုးစား စစ်ရေးပြင်ဆင်နေတယ်လို့ KNLA ပူးပေါင်းတပ် တာဝန်ရှိသူတွေ က ပြောပါတယ်။

RFA Burmese