Blog Single Author Small

ဆေးရုံဆေးခန်းများတွင် လူနာပြည့်နက်နေသည်အထိ ကိုဗစ်နိုင်တင်းကပ်ရောဂါ ဆိုးရွားနေသည်ဟု စစ်ကောင်စီက ၀န်ခံသော်လည်း ဆေးစစ်မှုတိုးမြှင့်ရန် မရှိဟုဆိုသည် 

စစ်အာဏာသိမ်းမှုနောက်ဆက်တွဲ အကြမ်းဖက်ဖိနှိပ်မှုများကို ရင်ဆိုင်နေရချိန်တွင် ကိုဗစ်နိုင်တင်း (Covid-19) ကပ်ရောဂါ ထပ်မံဖြစ်ပွားလာရာ ရန်ကုန်မြို့တော်တွင် ကိုဗစ်ကြောင့် သေဆုံးမှုမြင့်တက်နေပြီး အဓိကအားဖြင့် အောက်ဆီဂျင်ပြတ်တောက်မှုကြောင့်ဖြစ်သည်ဟု လူမှုကူညီရေးအသင်းများထံမှ သိရသည်။

ကျန်းမာရေးဝန်ဆောင်မှု၊ ဆေးဝါးနှင့် ဆက်စပ်အထောက်အပံ့ပစ္စည်းလိုအပ်ချက် မြင့်တက်လျက်ရှိကာ လူမှုကွန်ရက်ပေါ်၌ အရေးပေါ်ဆောက်ဆီဂျင်ရရှိရေး အကူအညီတောင်းခံသူများ၊ အောက်ဆီဂျင်ရရှိရန် တန်းစီစောင့်ဆိုင်းနေသူများနှင့် ကိုဗစ်ဖြင့်သေဆုံးရသော မိသားစုဝင်များအကြောင်း ရေးတင်နေသူများလည်း တွေ့ရှိရသည်။

ဆေးရုံဆေးခန်းများတွင် လူနာများနှင့် ပြည့်နှက်နေသည်အထိ ကိုဗစ်နိုင်တင်းကပ်ရောဂါ ကူးစက်ပြန့်ပွားမှုမြင့်တက်နေသည်ဟု ယနေ့ (ဇူလိုင် ၁၂) ပြုလုပ်သည့် သတင်းစာရှင်းလင်းပွဲတွင် အာဏာသိမ်းစစ်ကောင်စီ ပြောခွင့်ရပုဂ္ဂိုလ်က ဝန်ခံပြောကြားခဲ့သော်လည်း ဆေးစစ်မှုတိုးမြှင့်ရန် မရှိဟုဆိုသည်။

“ကျွန်တော်တို့ ဝန်ခံပါတယ်။ ဆေးရုံဆေးခန်းတွေမှာလည်း ပြည့်နေတယ်။ ကွာရန်တင်းစင်တာတွေမှာလည်း ပြည့်နေတယ်။ ထပ်ပြီးလက်မခံနိုင်တဲ့ဟာတွေလည်း ရှိပါတယ်” ဟု စစ်ကောင်စီ၏ ပြန်ကြားရေးဒုတိယဝန်ကြီးဖြစ်သူ ဗိုလ်ချုပ်ဇော်မင်းထွန်းက သတင်းစာရှင်းလင်းပွဲတွင် ပြောကြားခဲ့သည်။

ကိုဗစ်လူနာများကို ကျန်းမာရေးဝန်ကြီးဌာနက လက်ခံဆောင်ရွက်ပေးနေသည့်နည်းတူ တပ်မတော်ဆေးရုံများကိုလည်း ပြင်ဆင်ထားသည်ဟု စစ်ကောင်စီက ဆိုသော်လည်း ရန်ကုန်အခြေစိုက် လူမှုကူညီရေးအသင်းအဖွဲ့ငါးခုကို Myanmar Now က ဆက်သွယ်မေးမြန်းရာတွင် အောက်ဆီဂျင်လိုအပ်ချက် မြင့်မားလျက်ရှိသည့်အပြင် သေဆုံးမှုမြင့်တက်လျက်ရှိသည်။

ကျန်းမာရေးစောင့်ရှောက်မှု မရသဖြင့် သေဆုံးမှုမြင့်တက်နေ 

Signal-2021-07-12-170253_001.Jpeg

ရန်ကုန်၊ ဒေါပုံမြို့နယ် နွယ်အေးဗလီရှေ့တွင် ယနေ့ (ဇူလိုင် ၁၂) မွန်းလွဲပိုင်းက အောက်ဆီဂျင်ဖြည့်ရန် မိုးထဲလေထဲ တန်းစီးစောင့်နေသည်ကို တွေ့ရစဉ်။ (ဓာတ်ပုံ − Myanmar Now)

ယမန်နေ့ (ဇူလိုင် ၁၁) တွင် ဓာတ်ခွဲနမူနာ ၁၀,၀၀၀ ကျော်ကို စစ်ဆေးခဲ့ရာ အတည်ပြုလူနာသစ် ၃၄၆၁ ဦးတွေ့ရှိခဲ့ပြီး ထပ်မံသေဆုံးသူ ၈၂ ဦးရှိသည်ဟု စစ်ကောင်စီ၏ ကျန်းမာရေးနှင့် အားကစားဝန်ကြီးဌာန က ထုတ်ပြန်ထားသည်။

လုံလောက်သည့် ကျန်းမာရေးစောင့်ရှောက်မှု မရရှိသဖြင့် ကိုဗစ်သံသယလူနာသေဆုံးမှု များပြားလာကာ မင်္ဂလာတောင်ညွှန့်၊ တာမွေ၊ တောင်ဥက္ကလာ၊ မြောက်ဒဂုံနှင့် တောင်ဒဂုံမြို့နယ်တွင် ဇူလိုင် ၉ မှ ၁၁ အထိ သုံးရက်အတွင်း သေဆုံးသူဦးရေတိုးလာသည်ဟု လူမှုကူညီရေးအသင်းအဖွဲ့များထံမှ သိရသည်။

အဆိုပါမြို့နယ်များတွင် ဇူလိုင် ၁ ရက်မှ ၁၁ ရက်နေ့အထိ ကိုဗစ်ကူးစက်ခံထားရသူဟု ယူဆရသည့် လူနာများတွင် အသက်ရှူကြပ်၍ သေဆုံးရသူဦးရေ ၁၀၅ ဦးခန့်အထိ ရှိလာသည်ဟု ဆိုသည်။

“ကျွန်တော်တို့ကြားရသလောက် ဆေးရုံတွေက လက်မခံဘူး။ ဖျားနာ၊ လူနာဆို လက်မခံတော့တာ။ အောက်စီဂျင်လည်း ပြတ်လပ်နေတာ”ဟု လုံခြုံရေးအရအမည်မဖော်လိုသည့် လူမှုကူညီရေးအဖွဲ့ တာဝန်ရှိသူတစ်ဦးက ပြောသည်။

သင်္ဂြိုဟ်ပေးရန် ၎င်းတို့အဖွဲ့ထံ ဆက်သွယ်လာသည့် သေဆုံးသူအရေအတွက်မှာ ဇူလိုင် ၉ ရက်မှ ၁၁ ရက်နေ့အထိ ၄၀ ကျော်ရှိပြီး အောက်စီဂျင်ပြတ်လပ်ခြင်းကြောင့် သေဆုံးရသည့် ကိုဗစ်သံသယလူနာများဖြစ်သည်ဟု ၎င်းက ပြောသည်။

ရှင်သန်ခွင့်လူမှုကူညီရေးအသင်းက ကောက်ယူထားသည့် စာရင်းအရ တောင်ဒဂုံမြို့နယ်တွင်လည်း ဇူလိုင် ၁ မှ ၁၁ ရက်နေ့အထိ အသက်ရှူကြပ်၍ သေဆုံးသူဦးရေ ၅၀ ခန့်ရှိသည်။

အလားတူ ရွှေသန်လျင်နာရေးကူညီမှုအသင်း တာဝန်ရှိသူက ပြောကြားသည်မှာ ပုံမှန်အားဖြင့် တစ်ရက်လျှင် ၁၅ လောင်းသာ သင်္ဂြိုဟ်ရလေ့ရှိသော်လည်း အထက်ပါသုံးရက်အတွင်း ရုပ်အလောင်း ၂၀ ကျော်အထိ သင်္ဂြိုဟ်ပေးနေရပြီး သေဆုံးသူများအနက် ငါးဦးမှာ အောက်ဆီဂျင်ပြတ်လပ်မှုကြောင့်ဖြစ်သည်ဟု ဆိုသည်။

ကိုဗစ်ကြောင့်သေဆုံးသူများကို သင်္ဂြိုဟ်ပေးလျက်ရှိသည့် လှိုင်သာယာမြို့နယ်ရှိ ထိန်ပင်သုဿန် တာဝန်ရှိသူနှင့် မြို့တော်စည်ပင်သာယာရေးကော်မတီကို ဆက်သွယ်မေးမြန်းခဲ့သော်လည်း ပြန်လည်ဖြေဆိုခြင်း မရှိပေ။

စစ်အာဏာသိမ်းပြီးကတည်းက ဆန္ဒပြပွဲဖြိုခွင်းခံရစဉ် ဒဏ်ရာရပြည်သူများကို ကူညီကုသပေးမှုကြောင့် အညှိုးထားဖမ်းဆီးခံရမည့် အခြေအနေကြောင့် လူမှုကူညီရေးအသင်းအဖွဲ့များအနေဖြင့် ယခင်ကဲ့သို့ ပွင့်ပွင့်လင်းလင်း မလှုပ်ရှားရဲတော့ကြောင်းလည်း တာဝန်ရှိသူတစ်ဦးက ပြောသည်။

“တချို့တွေကြတော့ ပေါ်ပေါ်တင်တင်မပြောရဲဘူး။ ခိုးကြောင်ခိုးဝှက်လုပ်ရတာပေါ့။ အခုပုံစံအတိုင်းဆိုရင် သိပ်အဆင်ပြေတော့မှာ မဟုတ်ဘူး အောက်ဆီဂျင်တွေ သူတို့ဖြတ်လိုက်ပြီလေ။ ပရဟိတအဖွဲ့အစည်းတွေကိုလည်း တစ်နည်းနည်းနဲ့ ဩဇာပေးဦးမယ့်ပုံစံရှိတယ်” ဟု ၎င်းက ပြောသည်။

အောက်ဆီဂျင်ပြတ်လပ်နေ 

ရန်ကုန်အခြေစိုက် လူမှုကူညီရေးအသင်းအဖွဲ့ငါးခုကို Myanmar Now က ဆက်သွယ်မေးမြန်းရာတွင် ကိုဗစ်ကူးစက်ခံထားရသူများအတွက် အောက်ဆီဂျင်လိုအပ်ချက် မြင့်မားလျက်ရှိသည်ကို တွေ့ရသည်။

ဒဂုံဆိပ်ကမ်းမြို့နယ်အခြေစိုက် ရွှေသန်လျင်နာရေးကူညီမှုအသင်းသို့ အောက်ဆီဂျင်ရရှိရန် ဖုန်းဖြင့် ဆက်သွယ်မေးမြန်းမှု နေ့စဉ်အကြိမ် ၃၀၀ ခန့်ရှိသော်လည်း ဖြည့်ဆည်းပေးနိုင်ခြင်း မရှိကြောင်း အသင်းတာဝန်ရှိသူတစ်ဦးက ပြောသည်။

“ဘယ်လောက်များလဲဆိုရင် ကျွန်တော်တို့နားတောင်မှ မီးခိုးထွက်နေမလားတောင် ထင်မိတယ်။ နှစ်မိနစ်တစ်ကြိမ်၊ သုံးမိနစ်တစ်ကြိမ်ပဲ။ အဲဒါ အောက်စီဂျင်တောင်းတာနော်” ဟု ၎င်းက ပြောသည်။

ယမန်နေ့ (ဇူလိုင် ၁၁) နံနက်ပိုင်းက အောက်စီဂျင်အိုးကြီးသုံးလုံး ထုတ်ယူရရှိခဲ့ရာ ရွှေသန်လျင်နာရေးကူညီမှုအသင်းရုံး၌ စောင့်ဆိုင်းနေသူများကို ပြန်လည်ဖြန့်ဝေပေးရာ အချိန်နာရီဝက်အတွင်း ကုန်သွားခဲ့ကြောင်း လှိုင်သာယာ၊ အင်းစိန်၊ အလုံမြို့နယ်များမှ ပြည်သူများသည်လည်း အောက်စီဂျင်ရရှိရန် ရန်ကုန်မြို့အစွန်ရှိ ဒဂုံဆိပ်ကမ်းအထိ လာရောက်ထုတ်ယူနေကြရကြောင်း သိရသည်။

“အဓိကတော့ အောက်စီဂျင်လုံလောက်ဖို့ လိုတယ်။ ရန်ကုန်တိုင်းမှာ ဖြစ်နေတဲ့ပြဿနာက ဖျားတယ်၊ နာတယ်။ နှစ်ရက်လောက်နေရင် အောက်စီဂျင်က ကျလာတာ။ အောက်စီဂျင်အချိန်မီမပေးနိုင်ရန် လူတွေက ဆုံးရှုံးကုန်တာ။ အများကြီးပဲ” ဟု ရွှေသန်လျင်နာရေးကူညီမှုအသင်း တာဝန်ရှိသူက ပြောသည်။

ယခုရက်ပိုင်းတွင် လူနာများကို ဆေးရုံပို့သော်လည်း ဆေးရုံက လက်မခံဘဲ ပြန်လွှတ်ခြင်းနှင့် အောက်ဆီဂျင်ပြတ်လပ်ခြင်းများကြောင့် ကိုဗစ်သံသယလူနာသေဆုံးမှု နေ့စဉ်နှင့်အမျှ များပြားလာကာ လူမှုရေးအသင်းအဖွဲ့များ မနိုင်မနင်းဖြစ်နေသည်ဟု တောင်ဒဂုံမြို့နယ်အခြေစိုက် ရှင်သန်ခွင့်လူမှုကူညီရေးအသင်း ဥက္ကဋ္ဌ ဒေါ်သန်းသန်းစိုးက ပြောသည်။

“မနိုင်မနင်းကတော့ အကုန်ဖြစ်ပြီ။ ကျွန်မတို့ဆို စိတ်မကောင်းဘူး။ ရပ်တောင်ရပ်ထားချင်စိတ် ပေါက်နေပြီ။ လူနာအခြေအနေကို တချို့ဆေးရုံကတော့ စမ်းသပ်တယ်။ တချို့ဆေးရုံက စမ်းတောင်မစမ်းပါဘူး။ လူနာပြည့်သွားပြီ၊ လူနာပြည့်သွားပြီ ဆိုတာပဲ။ သူတို့က အောက်ဆီဂျင် ၉၀ အောက်တွေတောင်မှ ပြန်လွှတ်နေတာလေ” ဟု ၎င်းက ဆိုသည်။

အသက်ရှူလမ်းကြောင်းဆိုင်ရာ ကိုရိုနာဗိုင်းရပ်စ်ပိုး ကူးစက်ခံထားရသူများသည် သွေးထဲရှိ အောက်စီဂျင်လျော့ကျလာချိန်တွင် အသက်ရှူကျပ်ကာ အောက်စီဂျင်စက်ဖြင့် မကူနိုင်ပါက အသက်အန္တရာယ်ရှိသည်။ ပုံမှန်လူတစ်ဦး၏ သွေးထဲရှိ အောက်စီဂျင်ပမာဏမှာ ၉၅ % အထက်ရှိပြီး ရောဂါပိုးကူးစက်ခံရသူများသည် ယင်းပမာဏအောက်ကျလာတတ်ကာ ၉၀ % အောက်ဆိုပါက ဆေးကုသမှုခံယူရန် လိုအပ်သည်။

ရှင်သန်ခွင့်လူမှုကူညီရေးအသင်း၌ အောက်ဆီဂျင် အလုံး ၈၀ ရှိသော်လည်း ရန်ကုန်တိုင်းတစ်ခုလုံးတွင် အောက်ဆီဂျင်လိုအပ်မှု မြင့်တက်လာကာ စက်ရုံ၌ သုံးရက်ခန့် တန်းစီစောင့်ရသည်အထိ ပြတ်လပ်နေသည်ဟုလည်း ဒေါ်သန်းသန်းစိုးက ပြောသည်။

“အိမ်မှာလည်း အောက်ဆီဂျင်ရှိရင်တော့ ရှူကြတာပေါ့။ မရှိရင်တော့ မရှူကြဘူးပေါ့။ ကျွန်မတို့လည်း ငှားရင်းငှားရင်းနဲ့ လက်ပန်းကျနေပြီ။ စိတ်မကောင်းစွာနဲ့ပဲ ငြင်းနေရတာများနေပြီ” ဟုလည်း ၎င်းက ဆက်ပြောသည်။

အောက်ဆီဂျင်ထုတ်လုပ်ရာ စက်ရုံများ ကန့်သတ်ခံနေရ 

Signal-2021-07-11-164916_003.Jpeg

တောင်ဒဂုံမြို့နယ်တွင် အောက်ဆီဂျင်ဖြည့်သွင်းရန် စောင့်ဆိုင်းနေသူများကို ဇူလိုင် ၁၁ ရက်က တွေ့ရစဉ်။ (ဓာတ်ပုံ − Myanmar Now)

ကိုဗစ်နိုင်တင်း ကူးစက်ခံထားရသူများအတွက် အောက်ဆီဂျင်လိုအပ်ချက် မြင့်မားနေချိန်တွင် ရန်ကုန်မြို့ရှိ အောက်ဆီဂျင်ထုတ်လုပ်ဖြန့်ဖြူးပေးနေသည့် စက်ရုံအချို့ကို ပုဂ္ဂလိကသို့ ရောင်းချခြင်းမပြုရန် အာဏာသိမ်းစစ်ကောင်စီက တားမြစ်လျက်ရှိသည်။

ဗိုလ်တထောင်မြို့နယ် သိမ်ဖြူသင်္ဘောကျင်းရှိ အောက်ဆီဂျင်ထုတ်လုပ်သည့်စက်ရုံမှာ ဌာနဆိုင်ရာ စက်ရုံဖြစ်သဖြင့် ထွက်သမျှအောက်စီဂျင်ကို ကိုဗစ်စင်တာများသို့ ပေးပို့ရမည်ဟုဆိုကာ ပုဂ္ဂလိကသို့ ရောင်းချခြင်းကို ဇူလိုင် ၁၀ ရက်တွင် စစ်ကောင်စီက တားမြစ်ခဲ့ခြင်းဖြစ်သည်ဟု စက်ရုံတာဝန်ရှိသူတစ်ဦးက ပြောသည်။

အလားတူ ရွှေပြည်သာမြို့နယ်ရှိ ပုဂ္ဂလိကပိုင် Unity အောက်ဆီဂျင်စက်ရုံ၌ ယမန်နေ့ နံနက်ပိုင်းတွင် စစ်တပ်က လီတာ ၄၀ ဆန့် အောက်ဆီဂျင်အိုးကြီး ၆၂ လုံး လာရောက်ဝယ်ယူပြီးနောက် ပြည်သူများကို ဝယ်ယူခွင့်မပြုတော့ကြောင်း သိရသည်။

“တပ်ကနေ ပြောသွားတယ်။ ကိုဗစ်စင်တာတွေကိုပဲ အဓိက ရောင်းပေးရမယ်ပေါ့နော်။ ပရဟိတတို့ ဘာတို့၊ ပုဂ္ဂလိကကိစ္စပေါ့နော် တစ်ဦးတစ်ယောက်ချင်းစီကို မပေးနဲ့လို့ပြောတာ။ တချို့တွေ အခြေအနေတော်တော်ဆိုးတယ်။ ငိုယိုပြီး တောင်းပန်းပြီးယူတာတောင် မရဘူး” ဟု အဆိုပါစက်ရုံ၌ အောက်ဆီဂျင်ဖြည့်ရန် သွားရောက်တန်းစီခဲ့သူ အမျိုးသားတစ်ဦးက ပြောသည်။

စက်ရုံများကို ဝင်စီးခြင်းမျိုး မရှိဟုဆိုသော်လည်း ပုဂ္ဂလိကပိုင် အောက်ဆီဂျင်စက်ရုံအချို့တွင် တစ်ဦးချင်းလာဖြည့်ခြင်းကို လက်မခံရန် ညွှန်ကြားထားသည်ဟု ယနေ့သတင်းစာရှင်းလင်းပွဲတွင် စစ်ကောင်စီပြောခွင့်ရပုဂ္ဂိုလ်က ဝန်ခံပြောကြားခဲ့သည်။

ရာနှင့်ချီသော ပြည်သူများသည် အောက်စီဂျင်ထုတ်ယူခွင့်ရရန် နေ့စဉ် အချိန်ကြာမြင့်စွာ စောင့်ဆိုင်းတန်းစီနေရသဖြင့် အောက်စီဂျင်ထုတ်ယူရင်းပင် ကိုဗစ်ကူးစက်ခံရမည့်အခြေအနေဖြစ်နေသည်ဟု ရန်ကုန်မြို့တွင် နေထိုင်သူတစ်ဦးက ဆိုသည်။

တောင်ဒဂုံစက်မှုဇုန် စစ်ကိုင်းလမ်းရှိ  နိုင်’ အောက်စီဂျင်စက်ရုံ၌ အောက်စီဂျင်ထုတ်ယူရန် စောင့်ဆိုင်းခဲ့ရသည့် အတွေ့အကြုံနှင့် ပတ်သက်၍ ၎င်းက အထက်ပါအတိုင်းပြောဆိုခြင်းဖြစ်သည်။ “ရောဂါက ဘယ်သူ့မှာ ပါလာမှန်းလည်း မသိဘူး။ ပါလာရင် ကျွန်တော်တို့လည်း ကူးမှာပဲ။ ဒါပေမဲ့ ကိုယ့်ပတ်ဝန်းကျင်မှာ ဖြစ်နေတဲ့လူတွေကို မကြည့်ရက်လို့ ဒုက္ခခံပြီးလာတာ” ဟု ၎င်းက ပြောသည်။

တောင်ဒဂုံစက်မှုဇုန်ရှိ ‘နိုင်’အောက်စီဂျင်စက်ရုံ၌ စက်နှစ်လုံးပျက်နေသဖြင့် စောင့်ဆိုင်းရသူများပြားကာ အလွတ်တကူဝယ်မရကြောင်း၊ အောက်ဆီဂျင်ဈေးများလည်း အဆမတန်မြင့်တက်နေကြောင်း ရန်ကုန်လူငယ် ကိုဗစ်ထိန်းချုပ်ကာကွယ်ရေးအဖွဲ့ထံမှ သိရသည်။

“အခုလက်ရှိ အိုးကြီးတစ်အိုးကို လေးသိန်းရှိတယ်။ အဲဒါတောင် တဖြည်းဖြည်းနဲ့ ဝယ်လို့မရဘူး။ အရေးပေါ်ဆောင်ထားဖို့ သွားမေးတော့ မရှိတော့ဘူးတဲ့၊ ကုန်သွားပြီလို့ပြောတယ်။ စစ်အာဏာရှင်က ရပ်ခိုင်းလို့ မရောင်းတော့တာလား။ ပိုက်ဆံပေးပြီး ဝယ်တာတောင်မှ မရောင်းတော့တဲ့အခြေအနေက ဘာလို့ဖြစ်နေတာလဲ” ဟု အဆိုပါအဖွဲ့ဝင်တစ်ဦးက မေးခွန်းထုတ်သည်။

မြဝတီဒေသခံတစ်ဦးကလည်း “အောက်ဆီဂျင်အိုးတွ သွင်းလို့မရတော့ဘူး။ ပစ္စည်းပြတ်လပ်နေတယ်လို့ ပြောတယ်။ ဘန်ကောက်ကနေ မှာတာတောင် လကုန်ထိ စောင့်ရမယ်တဲ့” ဟု ပြောသည်။

ရန်ကုန်အခြေစိုက် လူမှုကူညီရေးအသင်းအဖွဲ့များအနေဖြင့် မနက်သုံးနာရီထ၍ အောက်ဆီဂျင်ဖြည့်ရန် တန်းစီစောင့်ဆိုင်းကာ လိုအပ်သည့်လူနာများထံ လိုက်လံပို့ဆောင်ရခြင်း၊ ကိုဗစ်သံသယလူနာအပါအဝင် အခြားလူနာများကို လူနာတင်ယာဉ်ဖြင့် လိုက်လံပို့ဆောင်နေရခြင်းအပြင် အောက်ဆီဂျင်လိုအပ်သူများ၏ စုံစမ်းမေးမြန်းမှုများကိုလည်း ဖြေဆိုနေရသည့်အတွက် ဝန်နှင့်အားမမျှဖြစ်နေသည်ဟု ဆိုသည်။

“ဒီတစ်ခေါက်ကတော့ ကျွန်မတို့ သေမယ်နဲ့တူပါတယ်။ ပထမလှိုင်း၊ ဒုတိယလှိုင်းတုန်းက ဘာမှမဖြစ်ပေမဲ့ ဒီလှိုင်းမှာတော့ ကျွန်မတို့ပါသွားမယ်ထင်တာပဲ။ ပင်ပန်းပြီး စိတ်ဆင်းရဲလွန်းလို့” ဟု ရှင်သန်ခွင့်လူမှုကူညီရေးအသင်းဥက္ကဋ္ဌ ဒေါ်သန်းသန်းစိုးက ပြောလိုက်သည်။

Myanmar Now