ND Burma အကြောင်း
ကွန်ရက်၏အဖွဲ့ဝင် တို့သည် မြန်မာနိုင်ငံရှိ လူမှု အသိုင်းအဝိုင်းများတွင် မည်သို့သော ဒုက္ခဝေဒနာများ ခံစားနေရပုံ အကြောင်း အဖြစ်မှန် အမှန်တရားကို စုပေါင်း အသုံးပြုကာ၊ လောလောဆယ် စည်းရုံးတိုက်တွန်း တင်ပြခြင်း နည်းလမ်းဖြင့် စစ်အစိုးရ၏ အာဏာကို စုပေါင်းစိန်ခေါ်ရန် ကြိုးစားနေ ကြပါသည်။ ထို့အပြင် နိုင်ငံရေး အသွင်ကူးပြောင်း ရေးကာလတွင် တရားမျှတမှုနှင့် တာဝန်သိမှုရှိသော လုပ်ဆောင်ချက် အစီအစဉ်များ အတွက် လည်း ကြိုတင် ပြင်ဆင်ထားရန် ကြိုးစားနေပါသည်။ အပြည့်အစုံ..
Recent Posts
- လက်ဗလောမှသည် သောလွန်ရကောင်ေးမွန်သည့်စနစ်ဆီသို့
- သတင်းထုတ်ပြန်ချက် – အာဏာရှင်များ ကြီးစိုးရာ အရပ်တွင် ဒီမိုကရေစီ မရှင်သန်နိုင်- အတုအယောင် ရွေးကောက်ပွဲနောက် ပိုင်း စစ်အုပ်စု၏ လူ့အခွင့် အရေး ချိုးဖောက်မှုများ”
- သတင်းထုတ်ပြန်ချက် – “အာဏာရှင်များ ကြီးစိုးရာ အရပ်တွင် ဒီမိုကရေစီ မရှင်သန်နိုင်- အတုအယောင် ရွေးကောက်ပွဲနောက် ပိုင်း စစ်အုပ်စု၏ လူ့အခွင့် အရေး ချိုးဖောက်မှုများ” ဆိုသည့် အစီရင်ခံစာအကျဉ်း
- “စစ်အာဏာသိမ်းတဲ့အကြောင်း စာအုပ်ရေးသူ အမေရိကန်လုပ်ငန်းရှင်တစ်ဦး ဖမ်းဆီးခံရ “
ကျန်းမာရေးလုပ်သားများသည် ပစ်မှတ်များမဟုတ်
မြန်မာနိုင်ငံရှိ လူ့အခွင့်အရေးအခြေအနေမှာ ပို၍ မတည်မငြိမ်ဖြစ်လျှက်ရှိသည်။ သိန်းနှင့်ချီသည့် ပြည်သူလူထု မှာ မဖြစ်မနေ ထွက်ပြေးတိမ်းရှောင်နေရသည်။ ဒဏ်ရာရ ပြည်သူများ၊ ဆန္ဒပြသူများနှင့် PDFs တပ်သားများအား ကြိုးစား ကုသပေးနေသူများမှာ ဆေးဘက်ဆိုင်ရာကျွမ်းကျင်သူများဖြစ်သည်။ ထို့ကြောင့် လက်နက်အားကိုးဖြင့် ဆေးရုံ၊ ဆေးခန်းများအား ဖျက်ဆီး၍ဆေးဝါးများ မတရားသိမ်းဆည်းနေသည့် မြန်မာစစ်အာဏာရှင်တပ် များ၏ ပစ်မှတ်ထားခြင်းခံနေရသည်။ကမ္ဘာ့ကပ်ရောဂါ ဖြစ်ပွားနေချိန်တွင် ထိုသို့လုပ်ဆောင်မှုကြောင့် ကျန်းမာရေးဆိုင်ရာ ပြဿနာများကို ပို၍ဖြစ်ပေါ်စေသည်။
CDM တွင် ပူးပေါင်းပါဝင်သည့် ဆရာဝန်နှင့် သူနာပြုများသည် တိမ်းရှောင်နေကြရသည်။ ဖမ်းဝရမ်းများ အထုတ်ခံထားကြရသော်လည်း ဆရာဝန်နှင့် သူနာပြုများက တိတ်တဆိတ် ကုသ၍ ကျန်းမာရေး စောင့်ရှောက်ပေးကြသည်။ ၎င်းတို့၏ စိတ်ဓာတ်နှင့် ဆန္ဒကို စစ်အာဏာရှင်များမှ ရိုက်ချိုး၍ မရပေ။ အာဏာကို ငန်းငန်းတက် လိုချင်၍ မြန်မာစစ်တပ်မှ ရက်ရက်စက်စက် ဆင်နွှဲနေသည့် စစ်ပွဲသည် ထိန်းချုပ် ပြုပြင်၍ မရလောက်အောင် မတည်မငြိမ်ဖြစ်ပေါ်စေသည်။ ကျန်းမာရေးစောင့်ရှောက်မှု ကဏ္ဌသည် ဖျက်ဆီးခံရသည့် ကဏ္ဌများထဲမှ တခုဖြစ်သည်။ ကျန်းမာရေးစောင့်ရှောက်မှုသည် နိုင်ငံတဝှန်း ပဋိပက္ခများကြောင့် အကြီးအကျယ်ထိခိုက်ကသောင်းကနင်း ဖြစ်နေပြီး အနိမ့်ဆုံးအဆင့်ဝင်ငွေဖြင့် အသက်ရှင်သန်ရန် ရုန်းကန်နေရသည့် အရပ်သားပြည်သူများ လက်လှမ်းမမီနိုင်သည့် အခြေအနေတွင် ရှိနေသည်။
ကမ္ဘာ့ကျန်းမာရေးနေ့တွင် မြန်မာစစ်တပ်မှ စစ်သားများက ကျန်းမာရေးလုပ်သားများအပေါ် မတရားမှုများကျူးလွန်နေသည်ကို မိမိတို့ လူ့အခွင့်အရေးမှတ်တမ်းကွန်ရက် (မြန်မာနိုင်ငံ) (ND-Burma) မှ သိရှိနားလည်သဘောပေါက်ပါသည်။ ယခုလို မတရား တိုက်ခိုက်နေမှုများကို ပြစ်တင်ရှုံ့ချပြီး ကျန်းမာရေးလုပ်သားများအား အလျင်အမြန် အကာအကွယ်ပေးရန်နှင့် ဖမ်းဆီးထိန်းသိမ်း ခံထားရသူများအားလည်း အမှုများမှ ရုပ် သိမ်း၍ အမြန်ဆုံးလွှတ်ပေးရန် တောင်းဆိုပါသည်။
Channel Mandalay သတင်းထောက်ချုပ်ဟောင်း ထောင် ၅ နှစ် ချခံရ
လွတ်ငြိမ်းသက်သာစာရင်းတွင် ပါဝင်ခဲ့သော သတင်းသမားကို စစ်ကောင်စီက ပြန်မလွှတ်ဘဲ အမှုထပ်ဖွင့်ကာ ထောင် ၅ နှစ် ချလိုက်သည်။
မန္တလေးမြို့အခြေစိုက် Channel Mandalay သတင်းဌာနမှ သတင်းထောက်ချုပ်ဟောင်း ကိုဝင်းနိုင်ဦး ယနေ့ (ဧပြီ ၅) တွင် အကြမ်းဖက်ပုဒ်မ၅၂ (က) ဖြင့် ထောင်ဒဏ် ၅ နှစ် ချမှတ်ခံရသည်ဟု မန္တလေးရှေ့နေအသိုင်းအဝိုင်းထံမှ သိရသည်။
အိုးဘိုထောင်တွင်းအထူးတရားရုံးက စီရင်ခြင်းဖြစ်သည်ဟု ရှေ့နေတစ်ဦးက ဆိုသည်။
“အကြမ်းဖက်ပုဒ်မနဲ့ ချလိုက်တာ။ ဒီနေ့ နေ့လယ်ပိုင်းက ချလိုက်တာ။ သူ ကျန်းမာရေးတော့ ကောင်းပါတယ်” ဟု ထိုရှေ့နေက ပြောသည်။
သူ၏ အမှုတွဲများဖြစ်သော ကိုမင်းသွေး၊ ကိုကျော်ဦး၊ ကိုဇော်မင်းဦးတို့ကိုလည်း ယင်းပုဒ်မဖြင့် ထောင်ဒဏ် ၅ နှစ်စီ ချမှတ်ကြောင်း ရှေ့နေက ဆက်ပြောသည်။
ထို့ပြင် ကိုကျော်ဦးနှင့် ကိုဇော်မင်းဦးတို့သည် ပုဒ်မ၅၀၅ (က) ဖြင့်လည်းကောင်း၊ ကိုကျော်ဦးသည် လက်နက်ဥပဒေ ၁၉ (စ) ဖြင့်လည်းကောင်း သီးခြားထောင်ဒဏ်များ ချမှတ်ခံရသည်ဟု ရှေ့နေက ဆိုသည်။
“စုစုပေါင်း ကိုမင်းသွေးက ၅ နှစ်၊ ကိုဇော်မင်းဦးက ၈ နှစ်ဖြစ်ပြီး ကိုကျော်ဦးက ၁၀နှစ်ပေါ့။ ထောင်ထဲနေတဲ့ရက်တွေ ထုတ်နုတ်ခံစားခွင့်ပြုပါတယ်” ဟု ရှေ့နေက ပြောသည်။
စစ်ကောင်စီတပ်က အသက် ၃၅ နှစ်အရွယ် ကိုဝင်းနိုင်ဦး၊ ၎င်း၏ဇနီး၊ အိမ်အလည်လာရောက်သူ အသက် (၄၀) ကျော် အမျိုးသားတစ်ဦးတို့ကို ဩဂုတ် ၃၁ တွင် စဉ့်ကိုင်မြို့နယ်ရှိ သရက်ခြံတစ်ခုအတွင်း ဝင်ရောက်ဖမ်းဆီးခဲ့ခြင်းဖြစ်ပြီး တစ်ပတ်ကျော်ခန့်အကြာတွင် ဇနီးဖြစ်သူကို ပြန်လည်လွှတ်ပေးခဲ့သည်ဟု မိသားစုနီးစပ်သူ အမျိုးသမီးတစ်ဦးက ဆိုသည်။
“သူတို့လင်မယားနေနေတဲ့ခြံမှာ စစ်ကောင်စီအလိုရှိနေတဲ့ ဧည့်သည်တစ်ဦးကို မိသွားတာ။ အဲဒီကနေ သူပါ ရောဖမ်းခံရတာ။ တကယ်တမ်းကျ သူက PDF လည်း မဟုတ်ဘူး။ သတင်းအလုပ်တွေကလည်း မလုပ်တော့တာ ကြာပြီ” ဟု ထိုအမျိုးသမီးက ပြောသည်။
သတင်းသမားဟောင်း ကိုဝင်းနိုင်ဦးကို စစ်ကောင်စီက ဖမ်းဆီးအပြီး (၁၅) ရက်အကြာ နိုင်ငံတော်ဆူပူအောင်လှုံ့ဆော်မှုဆိုင်ရာ ပုဒ်မ၅၀၅ (က) ဖြင့် အမှုဖွင့်ခဲ့ပြီး၊ ယင်းအမှုဖြင့် အိုးဘိုထောင်တွင် တရားရင်ဆိုင်နေစဉ် လွတ်ငြိမ်းသက်သာခွင့်ရသည့် အကျဉ်းသားစာရင်းတွင် ပါဝင်ခဲ့သည်။ သို့သော်လည်း သူ့ကို အကြမ်းဖက်ပုဒ်မဖြင့် ဇန်နဝါရီ(၁၇)တွင် အမှုဖွင့် တရားစွဲဆိုပြီး ဆက်ဖမ်းထားခဲ့ခြင်း ဖြစ်သည်ဟု တရားလွှတ်တော်ရှေ့နေက ဆိုသည်။
ကိုဝင်းနိုင်ဦး ဖမ်းဆီးခံရခြင်းနှင့် ပတ်သက်ပြီး စစ်ကောင်စီက သတင်းထုတ်ပြန်ခြင်း မရှိပေ။
ကိုဝင်းနိုင်ဦးသည် ၂၀၁၉၊ မေလကလည်း ပြင်ဦးလွင်မြို့အနီး တပ်သိမ်းမြေယာပြဿနာအကြောင်း Channel Mandalay တွင် ထုတ်လွှင့်သည့် ရုပ်သံသတင်းနှင့် ပတ်သက်ပြီး အမှတ် (၁၂၁) ထောက်ပို့တပ်၏ ဆက်သွယ်ရေးပုဒ်မ ၆၆ (ဃ) ဖြင့် တရားစွဲခံခဲ့ရသေးသည်။
စစ်တပ်အာဏာသိမ်းပြီးနောက် အထက်မြန်မာပြည်သတင်းသမားအများအပြားမှာ သတင်းလုပ်ငန်း ရပ်ဆိုင်းထားသော်လည်း အချို့မှာ ဖမ်းဆီးထိန်းသိမ်းခံခဲ့ရသည်။
ဇန်နဝါရီတွင် စစ်ကိုင်းမြို့အခြေစိုက် ဇေယျာတိုင်းသတင်းဌာနတွင် လုပ်ကိုင်ခဲ့ဖူးသူ ဒုအယ်ဒီတာ ကိုပြည့်ဖြိုးအောင်၊ သတင်းထောက် ကိုမြင့်မြတ်အောင် (ခေါ်) ကိုဒီမြတ်ငြိမ်းတို့ကို စစ်ကောင်စီက နိုင်ငံတော်ဆူပူအောင်လှုံ့ဆော်မှုဆိုင်ရာပုဒ်မ ၅၀၅ (က) ဖြင့် ထောင်ဒဏ် ၂နှစ်စီ ချမှတ်လိုက်သည်ဟု အမှုလိုက်ပါကူညီပေးနေသူ ရှေ့နေထံမှ သိရသည်။
၎င်းတို့နှစ်ဦးထဲမှ ကိုဒီမြတ်ငြိမ်းမှာမူ ထောင်ဒဏ်၂နှစ်အပြင် အကြမ်းဖက်ပုဒ်မ၅၂ (က) ဖြင့် ထပ်မံတရားရင်ဆိုင်ရန် ကျန်ရှိသေးသည်ဟု ဆိုသည်။
စစ်ကောင်စီက အဆိုပါသတင်းဌာနမှ ကိုငြိမ်းဇော်လင်း၊ သတင်းထောက် ကိုဝဏ္ဏအောင်၊ အယ်ဒီတာချုပ် ကိုစောရန်ပိုင်တို့ကိုလည်း ဝရမ်းထုတ်ထားသည်။
Myanmar Now News
မိသားစု အသိုက်အမြုံ အလုံးစုံ ဖျက်ဆီးခြင်း
အပတ်စဉ်ထုတ်ပြန်ချက် မြန်မာနိုင်ငံလူ့အခွင့်အရေးအခြေအနေ (မတ်လ ၂၈ မှ ဧပြီ ၃ရက်)ထိ
စစ်အာဏာရှင်ဆန့်ကျင်ရေး ဆန္ဒပြရာတွင် ပါ၀င်မှုကြောင့် လူငယ်များသည် အကြမ်းဖက်စစ်ခုံရုံးတွင် တရားမျှတမှုမရှိသော ပြစ်ဒဏ်ချခံနေရမှုများ တိုးလာနေသည်။ နေ့စဥ် ဖမ်းဆီးချုပ်နှောင်ခံထားမှုနှင့် ပျောက်ဆုံးမှုများသည် တိုင်းပြည်တွင်း စိုးရိမ်ပူပန်မှုများကိုသာ ဆက်လက်ဖြစ်ပေါ်စေသည်။ နောက်ဆုံးအခြေအနေအား အကျဥ်းချုပ်တွင်ရှုပါ။
တန့်ဆည်မြို့နယ်မှာ တိုက်ပွဲဖြစ်ပြီးနောက် အရပ်သား ငါးဦး သေဆုံး
တန့်ဆည်တွင် တိုက်ပွဲဖြစ်ပွားပြီး ရွာထဲမှ အမျိုးသမီး ၂ ဦး သေဆုံး
စစ်ကိုင်းတိုင်းအတွင်း စစ်ကောင်စီတပ် လက်ချက်ကြောင့် ဆယ်ကျော်သက်တစ်ဦး ကျည်ထိသေဆုံးပြီး အဘွားတစ်ဦး မီးရှို့ခံရသည့်အိမ်အတွင်း ပိတ်မိသေဆုံးသွားသည်ဟု သိရသည်။
စစ်ကိုင်းတိုင်း၊ တန့်ဆည်မြို့တောင်ဘက် စိမ်းစားရွာတွင် ယနေ့ (မတ် ၁၂) နံနက်ပိုင်းက တိုက်ပွဲဖြစ်ပွားစဉ် သက်ကြီးရွယ်အိုတစ်ဦးအပါအဝင် အမျိုးသမီး ၂ ဦးသေဆုံးရခြင်းမှာ စစ်ကောင်စီတပ်ကြောင့် ဖြစ်သည်ဟု ဒေသခံကာကွယ်ရေးအဖွဲ့များက ပြောသည်။
စစ်ကောင်စီတပ်က ရွာအတွင်း လိုက်လံပစ်ခတ် ၁၅ နှစ်အရွယ် မသဲဦးဖြူ၏ ရင်ဘတ်နှင့် ပေါင်တို့တွင် ကျည်ထိမှန်ခဲ့ကြောင်း၊ စစ်တပ်က နေအိမ်အချို့ကို မီးရှို့စဉ် အသက် ၇၀ အရွယ်အမျိုးသမီး နေအိမ်အတွင်း ရှိနေကြောင်း တန့်ဆည်မြို့နယ် ဒေသခံကာကွယ်ရေးအဖွဲ့ဝင် တစ်ဦးက အတည်ပြုသည်။
“(အဘွားအိုက) နေအိမ်မှာမီးလောင်လို့ သေဆုံးတာ။ သူတို့က လမ်းဘေးက အိမ်တွေကိုရှို့တာ။ ပိတ်မိပြီး မပြေးနိုင်တဲ့အချိန်မှာဖြစ်သွားတာ” ဟု အထက်ပါ ကာကွယ်ရေးအဖွဲ့ ဝင်ကပြောသည်။
ယနေ့ နံနက် ၁၁ နာရီဝန်းကျင်က စိမ်းစားရွာတွင် စစ်တပ်နှင့် ဒေသခံကာကွယ်ရေးအဖွဲ့များ တစ်နာရီနီးပါးကြာ တိုက်ပွဲဖြစ်ပွားပြီး စစ်ကောင်စီတပ်ဖွဲ့ဝင်များဘက်မှ ထိခိုက်သေဆုံးမှုများရှိပြီး သေနတ် ၅ လက်နှင့် ခဲယမ်းတချို့ သိမ်းဆည်းရမိခဲ့ကြောင်း သူက ဆက်ပြောသည်။
တိုက်ပွဲအပြင်းအထန် ဖြစ်ပွားပြီးနောက် စစ်ကောင်စီတပ်များသည် စိမ်းစားရွာမှ နေအိမ် ၅ လုံး၊ အနီးအနားရှိ ချောင်းရိုးရွာမှ ကြက်ခြံနှင့်နေအိမ်အချို့၊ ဒယ်ရောက်ကျေးရွာမှ နေအိမ်အချို့တို့ကို မီးရှို့ခဲ့ ကြောင်း ဒေသခံများထံမှ သိရသည်။
ထိုရွာသုံးရွာတွင် မီးရှို့မှုကြောင့် နေအိမ် ၈ လုံးထက်မနည်း လောင်ကျွမ်းခဲ့သည်ဟု ဆိုသည်။ အသေးစိတ် အခြေအနေကို မသိရသေးသလို ယနေ့ အမျိုးသမီး ၂ ဦး သေဆုံးမှု၊ မီးလောင်မှုများနှင့် ပတ်သက်ပြီး တန့်ဆည်မြို့နယ် မြို့မရဲစခန်းကိုလည်း ဆက်သွယ် မေးမြန်း၍ မရသေးပေ။
အရပ်သားများကို သတ်ဖြတ်ခြင်း၊ တော်လှန်ရေးသမားတို့နှင့် ဆက်စပ်ဖွယ်ရှိသည့် ရပ်ကွက်ကျေးရွာတို့ကို မီးရှို့ခြင်းများနှင့် ပတ်သက်ပြီး စစ်ကောင်စီက ဆက်တိုက် ငြင်းဆိုလေ့ရှိသည်။
တန့်ဆည်မြို့တွင် အာဏာသိမ်းပြီးချိန်မှ တစ်နှစ်တာကာလအတွင်း ရွာပေါင်း ၂၀ ကျော်မှ အိမ်ခြေ ၃၀၀ မီးရှို့ဖျက်ဆီးခံခဲ့ရပြီး အရပ်သားပြည်သူ ၆၀ ကျော် အသတ်ခံခဲ့ရကြောင်း ဒေသခံကာကွယ်ရေးအဖွဲ့များထံမှ သိရသည်။
စစ်ကိုင်းတိုင်းအတွင်းရှိ မြို့နယ်ပေါင်း ၃၀ ကျော်ကို မတ်လ ၃ ရက် ညပိုင်းမှစတင်ကာ အင်တာနက်ဖြတ်တောက်ထားသည့် စစ်တပ်က ကျေးရွာများကို စစ်ကြောင်းထိုး စီးနင်းခြင်း၊ နေအိမ်များကိုမီးရှို့ခြင်း၊ စစ်ဘေးရှောင်များ စုဝေးရှောင်ပုန်းသည့်နေရာများကို လက်နက်ကြီးများ ပစ်ခတ်ခြင်းတို့ကို ခပ်စိတ်စိတ်လုပ်ဆောင်လာသည်။
အာဏာသိမ်းပြီးချိန်မှ တစ်နှစ်ကျော်ကာလအတွင်း စစ်တပ်နှင့်လက်အောက်ခံအဖွဲ့စည်းများ၏ မီးရှို့မှုကြောင့် လူနေအိမ်ခြေ ၆၇၀၀ ကျော်ဖျက်ဆီးခံခဲ့ရပြီး ထက်ဝက်ကျော်မှာ စစ်ကိုင်းတိုင်းမှဖြစ်ကြောင်း အချက်အ လက်များကောက်ယူကာ စာရင်း ပြုစုနေသည့် အမှီအခိုကင်းသည့် အဖွဲ့တစ်ခုဖြစ်သည့် Data for Myanmar အဖွဲ့က မတ် ၉ ရက်နေ့တွင် ထုတ်ပြန်ထားသည်။
မတ်လအတွင်းမီးရှို့ခံရသည့်အိမ်ခြေ ၅၉၀ ကျော်ရှိကြောင်း အဆိုပါ အဖွဲ့၏ ထုတ်ပြန်ချက်တွင်ဖော်ပြထားသည်။
စစ်ကောင်စီတပ် လက်ချက်ကြောင့် သေဆုံးခဲ့သည့် အရပ်သား အရေအတွက်မှာလည်း ၁၆၅၂ ဦးထက်မနည်းရှိကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က ယမန်နေ့က ထုတ်ပြန်ထားသည်။ စစ်ကောင်စီကမူ ထိုအသင်း၏ ကိန်းဂဏန်း မှန်ကန်မှုမရှိဟု တုံ့ပြန်ထားသည်။
Myanmar Now News