Blog Single Author Small

မြန်မာနိုင်ငံမှာ ရောက်နေတဲ့ ကုလသမဂ္ဂ အတွင်းရေးမှူးချုပ်ရဲ့ အထူးကိုယ်စားလှယ်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဒီနေ့တွေ့ဆုံပြီး ရခိုင်ပြည်နယ်အရေး ဆွေးနွေးကြပါတယ်။ အထူးကိုယ်စားလှယ် Christine Schraner Burgener နဲ့ နေပြည်တော်မှာ တွေ့ဆုံရာမှာတော့ နေရပ်စွန့်ခွာသွားသူတွေ ပြန်လည်လက်ခံနိုင်ရေး၊ အစိုးရက ဖွဲ့စည်းထားတဲ့ စုံစမ်းစစ်ဆေးရေး ကော်မရှင်ရဲ့ လုပ်ငန်းတွေ အပါအဝင် ရခိုင်ပြည်နယ်က အခြေအနေတွေနဲ့ ပတ်သက်လို့ ဆွေးနွေးခဲ့ကြောင်းလည်း နိုင်ငံတော် အတိုင်ပင်ခံရုံးက သတင်းထုတ်ပြန်ထားတာပါ။

သိန်းနဲ့ချီတဲ့ ဒုက္ခသည်တွေ ရောက်ရှိနေတဲ့ ဘင်္ဂလားဒေ့ရှ်နိုင်ငံနဲ့ သဘောတူညီချက်အရ နေရပ်ပြန် ရေး အစီအစဉ်နဲ့ ပတ်သက်တဲ့ ကိစ္စတွေ၊ ရခိုင်ပြည်နယ် အကျပ်အတည်းကို ဖြေရှင်းရာမှာ ရင်ဆိုင် နေရတဲ့ စိန်ခေါ်မှုတွေ၊ မြန်မာအစိုးရနဲ့ ကုလသမဂ္ဂ အတွင်းရေးမှူးချုပ်ရုံး ပူးပေါင်းဆောင်ရွက်နိုင်မယ့် အစီအစဉ်တွေကို ဆွေးနွေးခဲ့ကြောင်းလည်း ပြောဆိုထားပါတယ်။ ကုလသမဂ္ဂ အထူးကိုယ်စားလှယ် ရဲ့ ခရီးစဉ်အစ မနေ့တုန်းကလည်း မြန်မာစစ်တပ်က ဒုတိယဗိုလ်ချုပ်မှူးကြီး စိုးဝင်းနဲ့ နေပြည်တော် မှာ တွေ့ဆုံပြီး စုံစမ်းရေးကော်မရှင်ရဲ့ လုပ်ငန်းတွေ၊ အပါအဝင် ရခိုင်ပြည်နယ်အရေး ဆွေးနွေးခဲ့ သလို မတည်မငြိမ် အခြေအနေတွေ ကြုံခဲ့ရတဲ့ ရခိုင်ပြည်နယ် မြောက်ပိုင်းမှာ လုံခြုံရေးအတွက် ဆောင်ရွက်ချက်တွေကိုလည်း ဆွေးနွေးခဲ့ကြောင်း သတင်းထုတ်ပြန်ထားတာပါ။

ရခိုင်ပြည်နယ် မြောက်ပိုင်းမှာ ပြီးခဲ့တဲ့နှစ် သြဂုတ်လထဲ လုံခြုံရေးကင်းစခန်းတွေကို စီးနင်းတိုက်ခိုက် ခဲ့တဲ့ ARSA အစွန်းရောက်အုပ်စုကို မြန်မာလုံခြုံရေးတပ်ဖွဲ့တွေ ရှင်းလင်းရာက ရိုဟင်ဂျာ မူဆလင်တွေ အပေါ် လူ့အခွင့်အရေး ချိုးဖောက်မှုတွေ ဆိုးဆိုးရွားရွား ကျုးလွန်ခဲ့ကြောင်း ကုလ သမဂ္ဂ အပါအဝင် နိုင်ငံတကာ အသိုင်းအဝန်းက စွပ်စွဲနေပြီး၊ သိန်းနဲ့ချီတဲ့ ဒုက္ခသည်တွေ နေရပ်ပြန်နိုင်ရေး အစီအစဉ်တွေ နှောင့်နှေးနေတဲ့အပေါ် ဝေဖန်မှုတွေလည်း ထွက်ပေါ်နေချိန်မှာပဲ အတွင်းရေးမှူးချုပ်ရဲ့ အထူးကိုယ်စားလှယ် မြန်မာနိုင်ငံကို ထပ်မံသွားရောက်ခဲ့တာလည်း ဖြစ်ပါ တယ်။ မြန်မာအစိုးရကတော့ ရိုဟင်ဂျာဆိုတဲ့ အမည်ကို တရားဝင် အသိအမှတ်ပြု လက်ခံ မထားသလို နိုင်ငံတကာ အသိုင်းအဝန်းက စွပ်စွဲနေတဲ့အထိ လူ့အခွင့်အရေး ချိုးဖောက်မှုတွေ ကျုးလွန်ခဲ့တာ မရှိကြောင်းနဲ့ ဒုက္ခသည်တွေ နေရပ်ပြန်နိုင်ရေး အဆင်သင့် ရှိနေကြောင်းလည်း တုံ့ပြန်ပြောဆိုထားပါတယ်။

VOA News