ND Burma အကြောင်း
ကွန်ရက်၏အဖွဲ့ဝင် တို့သည် မြန်မာနိုင်ငံရှိ လူမှု အသိုင်းအဝိုင်းများတွင် မည်သို့သော ဒုက္ခဝေဒနာများ ခံစားနေရပုံ အကြောင်း အဖြစ်မှန် အမှန်တရားကို စုပေါင်း အသုံးပြုကာ၊ လောလောဆယ် စည်းရုံးတိုက်တွန်း တင်ပြခြင်း နည်းလမ်းဖြင့် စစ်အစိုးရ၏ အာဏာကို စုပေါင်းစိန်ခေါ်ရန် ကြိုးစားနေ ကြပါသည်။ ထို့အပြင် နိုင်ငံရေး အသွင်ကူးပြောင်း ရေးကာလတွင် တရားမျှတမှုနှင့် တာဝန်သိမှုရှိသော လုပ်ဆောင်ချက် အစီအစဉ်များ အတွက် လည်း ကြိုတင် ပြင်ဆင်ထားရန် ကြိုးစားနေပါသည်။ အပြည့်အစုံ..
Recent Posts
- လက်ဗလောမှသည် သောလွန်ရကောင်ေးမွန်သည့်စနစ်ဆီသို့
- သတင်းထုတ်ပြန်ချက် – အာဏာရှင်များ ကြီးစိုးရာ အရပ်တွင် ဒီမိုကရေစီ မရှင်သန်နိုင်- အတုအယောင် ရွေးကောက်ပွဲနောက် ပိုင်း စစ်အုပ်စု၏ လူ့အခွင့် အရေး ချိုးဖောက်မှုများ”
- သတင်းထုတ်ပြန်ချက် – “အာဏာရှင်များ ကြီးစိုးရာ အရပ်တွင် ဒီမိုကရေစီ မရှင်သန်နိုင်- အတုအယောင် ရွေးကောက်ပွဲနောက် ပိုင်း စစ်အုပ်စု၏ လူ့အခွင့် အရေး ချိုးဖောက်မှုများ” ဆိုသည့် အစီရင်ခံစာအကျဉ်း
- “စစ်အာဏာသိမ်းတဲ့အကြောင်း စာအုပ်ရေးသူ အမေရိကန်လုပ်ငန်းရှင်တစ်ဦး ဖမ်းဆီးခံရ “
ကချင်အမျိုးသမီး အစည်းအရုံး- ထိုင်းနိုင်ငံ (KWAT) သတင်းထုတ်ပြန်ချက်
“စစ်အာဏာသိမ်းပြီးနောက် မြန်မာနိုင်ငံလူ့အခွင့်အရေးအခြေအနေ အပတ်စဥ် ထုတ်ပြန်ချက် ” (ဇွန်လ ၇ – ၁၃)ရက်နေ့ထိ
“စစ်အာဏာသိမ်းပြီးနောက် မြန်မာနိုင်ငံလူ့အခွင့်အရေးအခြေအနေ အပတ်စဥ် ထုတ်ပြန်ချက် ”
မြန်မာနိုင်ငံတွင် အရပ်သားပြည်သူများသည် ဒုက္ခပြသနာများကို ပုံစံအမျိုးမျိုးနှင့် ရင်ဆိုင်နေရပြီး အသက်အန္တရာယ် စိုးရိမ်ရသောကြောင့် နေရပ်စွန့်ခွာစစ်ဘေးရှောင် အရေအတွက်မှာ နေ့စဥ် တိုးလာလျှက်ရှိသည်။ အာဆီယံနှင့် နိုင်ငံတကာ အသိုင်းအ၀ိုင်းတို့မှ မြန်မာပြည်သူတို့အတွက် ပို၍ လုပ်ဆောင်ပေးရမည် ဖြစ်သည်။
ဒီးမော့ဆိုမြို့နယ်တွင်း အာဏာသိမ်းစစ်ကောင်စီတပ်၏ တပ်စွဲထားသည့် နေရာများတွင် နေအိမ်နှင့် ဆိုင်ခန်းများ ဖောက်ထွင်းခိုးယူဖျက်ဆီးခံရ
မြန်မာနိုင်ငံအရှေ့တောင်ပိုင်း၌ ဖြစ်ပေါ်နေသော လူသားချင်းစာနာမှုဆိုင်ရာ အခြေအနေများနှင့် စပ်လျဉ်း၍ မြန်မာနိုင်ငံရှိ ကုလသမဂ္ဂအဖွဲ့၏ ထုတ်ပြန်
မြန်မာနိုင်ငံအရှေ့တောင်ပိုင်း၌ ဖြစ်ပေါ်နေသော လူသားချင်းစာနာမှုဆိုင်ရာ အခြေအနေများနှင့် စပ်လျဉ်း၍ မြန်မာနိုင်ငံရှိ ကုလသမဂ္ဂအဖွဲ့၏ ထုတ်ပြန်ချက်
(ရန်ကုန်) – မြန်မာနိုင်ငံအရှေ့တောင်ပိုင်းရှိ ကယားပြည်နယ်နှင့် အခြားဒေသများတွင် လျင်မြန်စွာဆိုးရွားလာသည့် လုံခြုံရေးနှင့် လူသားချင်းစာနာမှုဆိုင်ရာ အခြေ အနေများနှင့် စပ်လျဉ်း၍ မြန်မာနိုင်ငံရှိ ကုလသမဂ္ဂအဖွဲ့ကြီးကစိုးရိမ်လျက်ရှိပါသည်။
လုံခြုံရေးတပ်ဖွဲ့များက အရပ်သားများနေထိုင်ရာနေရာများသို့ ခွဲခြားမှုမရှိဘဲသိမ်းကြုံး တိုက်ခိုက်နေခြင်း များအပါအဝင် ကယားပြည်နယ်တွင် မကြာသေးမီက ဖြစ်ပွားလျှက်ရှိသော အကြမ်းဖက်မှုများကြောင့် ခန့်မှန်းခြေအားဖြင့် အမျိုးသား၊ အမျိုးသမီးနှင့် ကလေးငယ်စသည့် လူဦးရေ ၁၀၀,၀၀၀ ခန့် သည် ပြည်တွင်းတွင် နေရပ်စွန့်ခွာ တိမ်းရှောင်နေရပါသည်။ အိုးအိမ်စွန့်ခွာရသူအများစုမှာ ကယားပြည်နယ်နှင့် ယင်းနှင့်ထိစပ်ရာ ရှမ်းပြည်နယ်တောင်ပိုင်းရှိ ဘေးကင်းလုံခြုံရာနယ်ခံများနှင့် သစ်တောများထဲတွင် ခိုလှုံနေထိုင်လျက်ရှိကြပါသည်။ ဤအရေးကိစ္စသည် မြန်မာနိုင်ငံ၏ အခြားဒေသများတွင် တွေ့မြင်ရပြီး ဖြစ်သကဲ့သို့ အိုးအိမ်စွန့်ခွာရသူများကို နယ်စပ်ဖြတ်ကျော်ထွက်ပြေးခိုလှုံရသည့် အခြေအနေသို့ တွန်းပို့နိုင်ပါသည်။
ပဋိပက္ခတွင် ပါဝင်ပတ်သက်သူအားလုံးအနေဖြင့် အရပ်သားများနှင့် အရပ်သားများနှင့်သက်ဆိုင်သော အခြေခံအဆောက်အဦများ၊ အထူးသဖြင့် ဆေးကုသရာနေရာများနှင့် ဆေးဝန်ထမ်းများ အစရှိသည့် အကာအကွယ်ပေးရမည့်အရာများကို အကာအကွယ်ပေးရန်အတွက် လိုအပ်သော အစီအမံနှင့် ကြိုတင်ကာကွယ်မှုများကို အရေးတကြီး လုပ်ဆောင်ရန်နှင့် တိုက်ခိုက်သူနှင့်အရပ်သားများအကြား ပစ်မှတ်ခွဲခြားခြင်း၊ လိုအပ်မှသာ ပစ်ခတ်ခြင်း၊ အင်အားအလွန်အကျွံအသုံးမပြုခြင်းနှင့် အရပ်သားများကို ကာကွယ်စောင့်ရှောက်ခြင်း အစရှိသည့် အခြေခံမူများကို လိုက်နာရန် ကုလသမဂ္ဂက ထပ်လောင်းတောင်းဆို တိုက်တွန်းအပ်ပါသည်။
ဖြစ်ပွားနေသော တိုက်ပွဲများကြောင့်အိုးအိမ်စွန့်ခွာထွက်ပြေးကြရသူများနှင့် တိုက်ပွဲဒဏ်ခံဒေသများတွင် ကျန်ရှိနေသူများသည် စားနပ်ရိက္ခာ၊ ရေ၊ နေစရာ၊ လောင်စာနှင့် ကျန်းမာရေးစောင့်ရှောက်မှုများ အရေးပေါ်လိုအပ်လျက်ရှိကြပါသည်။ ဒေသခံများသည် ကူညီတုန့်ပြန်မှုများကို ချက်ချင်းလက်ငင်း လုပ်ဆောင်နိုင်ကြသော်လည်း လိုအပ်ချက်အားလုံး အထူးသဖြင့် ဝေးလံသောနေရာတွင် ရောက်ရှိနေသူများထံသို့ ရောက်ရှိရန် လိုအပ်နေဆဲဖြစ်သည်။ ဒေသခံများ၏ ကူညီဆောင်ရွက်မှုများကို ပံ့ပိုးဖြည့်ဆည်းပေးရန် ကုလသမဂ္ဂနှင့် ယင်း၏မိတ်ဖက် အဖွဲ့အစည်းများတွင် စားနပ်ရိက္ခာ၊ အိုးအိမ်ဆိုင်ရာပစ္စည်းများနှင့် အခြားအခြေခံ ကယ်ဆယ်ရေးပစ္စည်းများအပါအဝင် လူသားချင်း စာနာမှုဆိုင်ရာ အကူအညီများ အဆင်သင့်ရှိနေပါသည်။ ဆက်လက်ပေါ်ပေါက်နေသည့် လုံခြုံရေး အခြေအနေ၊ လုံခြုံရေးတပ်ဖွဲ့များက ချမှတ်ထားသည့် အသွားအလာကန့်သတ်ချက်များနှင့် လမ်းပန်း ဆက်သွယ်ရေးကောင်းမွန်မှုမရှိခြင်းများကြောင့် ဤအကူအညီများကိုပေးဝေရန် ကြန့်ကြာလျက် ရှိပါသည်။
လူသားချင်းစာနာမှုဆိုင်ရာ အကူအညီများနှင့် သွားရောက်ကူညီသူများကို ဘေးကင်းစွာသွားလာခွင့်ပြုရန် နှင့် ကုလသမဂ္ဂနှင့် မိတ်ဖက်အဖွဲ့အစည်းများအား ကယားပြည်နယ်အပါအဝင် နိုင်ငံအတွင်းရှိ အခြားပြည်နယ်နှင့် တိုင်းဒေသကြီးများရှိ လူသားချင်းစာနာမှုဆိုင်ရာ အကူအညီများ အရေးတကြီး လိုအပ်နေသူများအားလုံးထံ အကူအညီများတိုက်ရိုက်သွားရောက်ပေးခွင့်ပြုရန် လုံခြုံရေးတပ်ဖွဲ့များအား ကုလသမဂ္ဂအဖွဲ့က တောင်းဆိုပါသည်။
၂၀၂၀ ပြည့်နှစ် မတ်လအတွင်းက ကုလသမဂ္ဂအတွင်းရေးမှူးချုပ်၏ ကမ္ဘာလုံးဆိုင်ရာ အပစ်အခတ်ရပ်ရေး တောင်းဆိုမှုနှင့် ပြန်လည်ဖြစ်ပွားလာသော ကိုဗစ်-၁၉ ရောဂါနှင့် အခြားသော လူသားချင်း စာနာမှုဆိုင်ရာနှင့် ကျန်းမာရေးဆိုင်ရာပြသနာများကို ပူးပေါင်းရင်ဆိုင်ဖြေရှင်းကြရန် တောင်းဆိုမှုကို ကုလသမဂ္ဂက ထပ်လောင်းတိုက်တွန်းတောင်းဆိုအပ်ပါသည်။
Myanmar UN
ကလေးသူငယ်တွေ သတ်ဖြတ်ခံရမှုကို UNICEF နဲ့ NUG လက်မခံ
စစ်တပ်က အာဏာသိမ်းပြီး သုံးလကျော်အတွင်း တစ်နိုင်ငံလုံး အတိုင်းအတာနဲ့ စစ်ကောင်စီတပ်ဖွဲ့ဝင်တွေရဲ့ သတ်ဖြတ်ခံခဲ့ရတဲ့ ကလေးသူငယ်စုစုပေါင်း ၇၃ ဦးထိ ရှိလာပြီလို့ အမျိုးသားညီညွတ်ရေးအစိုးရ (NUG) လူ့အခွင့်အရေးဝန်ကြီး ဦးအောင်မျိုးမင်းက RFA ကို ပြောပါတယ်။
ဒီအရေအတွက်ဟာ ဆိုရှယ်မီဒီယာပေါ်တက်လာတဲ့ သတင်းတွေပေါ် အခြေခံပြီး ဒေသခံတွေနဲ့ မျက်မြင် တွေ့ရှိသူတွေ ပြောပြတဲ့ ခိုင်မာတဲ့ အချက်အလက်တွေကို ကောက်ယူစုဆောင်းထားတဲ့ အရေအတွက် ဖြစ်တယ်လို့ ဦးအောင်မျိုးမင်းက ဆိုပါတယ်။
ကလေးသူငယ်ဆိုတာ ဘယ်လိုအခြေအနေမှာပဲဖြစ်ဖြစ် ကာကွယ်ပေးရမယ့်သူတွေဖြစ်ပေမယ့် စစ်ကောင်စီက ကလေးသူငယ်တွေကို ရည်ရွယ်ချက်ရှိရှိ သတ်ဖြတ်တာဟာ ကြီးမာတဲ့ ရာဇဝတ်မှုကို ကျူးလွန်တာဖြစ်တယ် လို့ ဦးအောင်မျိုးမင်းက ပြောပါတယ်။
“သာမန်အကြမ်းဖက်မှုတွေ ရှိနေသည့်တိုင်အောင်၊ အကြမ်းဖက်သည့်တိုင်အောင် ကလေးသူငယ်ဆိုတာက ဘယ်လိုကာလမျိုးဖြစ်ပါစေ ကာကွယ်ပေးရမယ်ဆိုတာ အားလုံးသိပြီးသားပါ။ ကလေးတွေက နုနယ် သေးတဲ့သူ ဖြစ်တယ်။ ကလေးသူငယ် အခွင့်အရေးအရ ကာကွယ်ပေးရမယ်ဆိုတဲ့ အမျိုးအစား သတ်မှတ်ချက် ဖြစ်တယ်။ အဲနေရာမျိုးမှာမှ သေဆုံးမှုတွေဖြစ်တယ်ဆိုတာ ဘယ်လိုမှ မဖြစ်သင့်တဲ့အချက် ဖြစ်တယ်။ သေဆုံးမှုတွေမှာ မတော်တဆ ထိခိုက်မှုတွေ မကတော့ဘူ။ ကလေးမှန်းသိရဲ့သားနဲ့ တမင် သက်သက် ရည်ရွယ်ပြီးတော့ သတ်ဖြတ်တာကတော့ ရည်ရွယ်ချက်တွေ ပါသွားပြီ။ ရည်ရွယ်ချက်ရှိရှိ သတ်ဖြတ်မှုကတော့ သာမန် လူ့အခွင့်အရေး ချိုးဖောက်မှုတွေ မကတော့ဘဲနဲ့ ကလေးသူငယ်တွေကို ကြီးမားသော ရာဇဝတ်မှု ကျူးလွန်တဲ့အဆင့်ကို ရောက်ရှိသွားပါပြီ။”
ကလေးငယ်တွေဟာ လမ်းပေါ်မှာ ဆန္ဒပြရင်း အပစ်ခံရတာတွေ မဟုတ်ဘဲ၊ နေအိမ်မှာ နေထိုင်ရင်း အာဏာရှင် ဆန့်ကျင်ရေး ကန့်ကွက်ဆန္ဒပြသူတွေကို ရဲနဲ့ စစ်တပ်က လိုက်လံပစ်ခတ်မှုကြောင့် ကျည်ထိမှန် သေဆုံးခဲ့ရတာ ဖြစ်ပါတယ်။
ပြီးခဲ့တဲ့ မတ်လ ၂၇ ရက်နေ့က ရွှေဘိုမြို့မှာ နေထိုင်တဲ့ အသက် ၁၃ နှစ်အရွယ် မောင်ထူးမြတ်ဝင်း ဟာ အိမ်ထဲမှာ နေနေတဲ့အချိန် စစ်တပ်က ပစ်ခတ်တဲ့ကျည်ဆန် ဝမ်းဗိုက်ထိမှန်ပြီး သေဆုံးခဲ့ရပါတယ်။
မောင်ထူးမြတ်ဝင်း ရှင်ပြုအလှူလုပ်ဖို့ စုဆောင်းထားတဲ့ ချွေးနည်းစာဟာ သူ့ရဲ့ ဈာပနအလှူ ဖြစ်သွားတာ ကြောင့် ဝမ်းနည်းမိတယ်လို့ မောင်ထူးမြတ်ဝင်းရဲ့ ဖခင်က ပြောပါတယ်။
“တအား နှမျောတယ်။ ကျွန်တော့သား ရှင်ပြုဖို့အတွက် ရည်မှန်းထားတာ။ ကျွန်တော့် သားသမီးအတွက် အစစအရာရာ လှူဖို့အတွက် ချွေးနည်းစာနဲ့ စုဆောင်းထာပြီးသား။ စုဆောင်းထားတာ ဒါနဲ့ဆို နှစ်နှစ်ရှိပြီ။ ကိုဗစ်ရယ်၊ စစ်ဘေးရယ်။ ကိုဗစ်ကတည်းက လှူရမယ့်အလှူက စစ်ဘေးကျမှ ကျွန်တော့်သား ပျက်စီးသွား တယ်။ အိမ်ထဲမှာနေရင်းနဲ့ ပျက်စီးသွားတော့ ကျွန်တော့်သားအလှူ မအောင်မြင်လိုက်တဲ့အတွက် တော်တော်လေး ဝမ်းနည်းတယ်။ သူ့ရဲ့ ဈာပနကို ကျွန်တော်စုဆောင်းထားတာတွေ အကုန် လှူပစ်လိုက် တယ်။”
ကယားပြည်နယ် လွိုင်ကော်မြို့အနီးက ကယန်းသာယာရွာမှာ နေထိုင်တဲ့ အသက် ၁၄ နှစ်အရွယ် မောင်ဆန်းဒေးအေး ဟာလည်း စစ်ကောင်စီတပ်တွေရဲ့ ပစ်ခတ်မှုကြောင့် မေလ ၂၇ ရက်နေ့က သေဆုံးခဲ့ရပါတယ်။
မောင်ဆန်းဒေးအေး ဟာ၊ ကယန်းသာယာရွာမှာဖြစ်နေတဲ့ တိုက်ပွဲတွေကြောင့် ဘေးလွတ်ရာမှာ ပုန်းအောင်း နေချိန် ဖခင်ဖြစ်သူက ခိုင်းစေတာကြောင့် ရွာထဲကို ခဏပြန်ဝင်လာစဉ် စစ်သားတွေနဲ့ တည့်တည့် တိုးတာကြောင့် ကြောက်လန့်တကြား ထွက်ပြေးရာမှာ ဦးခေါင်းကို တည့်တည့်ချိန်ရွယ်ပြီး ပစ်သတ်ခံခဲ့ရတာ လို့ လုံခြုံရေးအရ အမည်မဖော်လိုတဲ့ ဒေသခံတွေက RFA ကို ပြောပြကြပါတယ်။
NUG လူ့အခွင့်အရေးဝန်ကြီး ဦးအောင်မျိုးမင်း က ကယန်းသာယာရွာက ပစ်သတ်ခံရတဲ့ မောင်ဆန်းဒေးအေး ရဲ့ အဖြစ်အပျက်မျိုးကို ကမ္ဘာကသိအောင် ကြိုးစားနေတယ်လို့ ပြောပါတယ်။
“ဒီဟာမျိုးတစ်ခုကတော့ ကျနော်တို့ လူ့အခွင့်အရေးနဲ့ ပတ်သက်ပြီး အချက်အလက်တွေ စုဆောင်း နေပါတယ်၊ ဒါ့ကြောင့် ဟိုတစ်နေ့က ကရင်နီမှာ သေသွားတဲ့ မောင်ဆန်းဒေးအေး တို့လို ကိစ္စတွေကို ကမ္ဘာကသိအောင်၊ နောက်တစ်ခါ ကလေးသူငယ် အခွင့်အရေးချိုးဖောက်မှု၊ ဒီလိုကိစ္စတွေဟာ ကလေး သူငယ်တွေကို လက်နက်ကိုင် ပဋိပက္ခတွေကနေ အကာအကွယ်ပေးရမယ်ဆိုတာတွေကို ကမ္ဘာက သိအောင် လုပ်ဆောင်နေပါတယ်။”
ကုလသမဂ္ဂ ကလေးများရန်ပုံငွေအဖွဲ့ ယူနီဆက် (UNICEF) က ကောက်ယူထားတဲ့ စာရင်းတွေအရ၊ စစ်တပ် အာဏာသိမ်းပြီးချိန်ကစပြီး အခုချိန်ထိ လေးလကျော် ကာလအတွင်းမှာ၊ စစ်ကောင်စီတပ်တွေရဲ့ ပစ်ခတ်မှု ကြောင့် ယောင်္ကျားလေး ၄၈ ဦးနဲ့ မိန်းကလေး ခုနစ် ဦး၊ စုစုပေါင်း ကလေးသူငယ် ၅၅ ဦး သေဆုံးခဲ့တယ်လို့ ဇွန်လ (၃) ရက်နေ့က ကလေးသူငယ်တွေ အသတ်ခံရမှုနဲ့ပတ်သက်ပြီး RFA က မေးမြန်းစဥ် တုံ့ပြန်ဖြေကြား ခဲ့ပါတယ်။
ကုလသမဂ္ဂ ကလေးများရန်ပုံငွေအဖွဲ့ ယူနီဆက် မြန်မာနိုင်ငံဆိုင်ရာ ဌာနေကိုယ်စားလှယ် Guy Taylor က “ကလေးသူငယ်တွေကို သေစေနိုင်လောက်တဲ့ လက်နက်ခဲယမ်း အပါအဝင် အင်အားသုံးမှုတွေနဲ့ ဖမ်းဆီးမှု တွေဟာ လက်ခံနိုင်စရာ မရှိပါဘူး။ တစ်ချိန်တည်းမှာပဲ ကလေးတွေကို အကြမ်းဖက်မှုတွေကနေ အကာ အကွယ်ပေးရမှာဖြစ်သလို အန္တရာယ်ရှိနိုင်တဲ့ အနေအထားတွေထဲမှာ မကျရောက်စေသင့်ပါဘူး။” လို့ RFA ရဲ့မေးမြန်းချက်ကို တုံ့ပြန်ဖြေကြားခဲ့ပါတယ်။
“လက်ရှိ မြန်မာနိုင်ငံက အဖြစ်အပျက်တွေကြောင့် ကလေးသူငယ်တွေနဲ့ ပြည်သူတွေရဲ့ ရုပ်ပိုင်း၊ စိတ်ပိုင်း ဆိုင်ရာ ထိခိုက်နစ်နာမှုတွေကို တရားဝင် အကူညီပေးနိုင်ဖို့ လုပ်ဆောင်နေတယ်၊ မြန်မာနိုင်ငံရဲ့ လူသားချင်း စာနာထောက်ထားမှု အခြေအနေတွေနဲ့ ပတ်သက်ပြီး စိုးရိမ်မိတယ်” လို့ လည်း သူက ဆိုပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP ရဲ့ ဇွန်လ (၈) ရက်မွန်းလွဲပိုင်း ထုတ်ပြန်ချက် အရ၊ မြန်မာနိုင်ငံမှာ ဖေဖော်ဝါရီ ၁ ရက် စစ်အာဏာသိမ်းချိန်ကစလို့ လေးလကျော် ကာလအတွင်း၊ လုံခြုံရေး တပ်ဖွဲ့တွေရဲ့ ပစ်ခတ်နှိမ်နင်းမှုကြောင့် သေဆုံးသူ ၈၅၇ ယောက်၊ အဖမ်းခံထားရသူ ၄၆၇၇ ယောက်နဲ့ ဖမ်းဝရမ်း အထုတ်ခံထားရသူ ၁၉၀၀ ကျော် ရှိနေပါတယ်။
အဲဒီသေဆုံးသူ ၈၅၇ ယောက်ထဲမှာ ကလေးသူငယ် ၇၃ ယောက် ပါဝင်တယ်လို့ NUG က ပြောထားပြီး၊ UNICEF ကတော့ သူတို့စာရင်းအရ ကလေး ၅၅ ယောက်အသတ်ခံထားရတယ်လို့ RFA ကို ပြောကြားထားတာ ဖြစ်ပါတယ်။
RFA News
မင်းတပ်အချုပ်မှာ အရပ်သားတွေကို အစားအသောက် မကျွေးဘဲ နှိပ်စက်နေ
စစ်ကောင်စီရဲ့တပ်တွေကို ခုခံတော်လှန်နေတာ တစ်လခွဲကျော်နေပြီဖြစ်တဲ့ ချင်းပြည်နယ် မင်းတပ်မြို့ မှာ နှစ်ဖက် သေဆုံးဒဏ်ရာရတာ ရှိသလို၊ အဖမ်းခံထားရတဲ့ အရပ်သားတွေ အချုပ်ထဲမှာ နှိပ်စက်ခံရတာလည်း ရှိနေပါတယ်။
ချင်းပြည်နယ် တောင်ပိုင်း မင်းတပ်မြို့ရဲစခန်းမှာ အချုပ်ကျနေတဲ့သူ ဒေသခံအရပ်သား ၂၀ လောက်ရှိနေပြီး သူတို့ကို အစားအသောက် လုံလောက်အောင် မကျွေးသလို၊ ရေပဲသောက်နေရတာ နှစ်ရက်လောက်ရှိပြီလို့ RFA က စုံစမ်းသိရှိရပါတယ်။
ဒါကြောင့် အပြင်ကဒေသခံတွေကို ဆက်သွယ်ဖို့ ကြိုးစားနေတယ်လို့ မင်းတပ်မြို့ CDF အဖွဲ့ ပြန်ကြားရေး တာဝန်ခံက RFA ကို ပြောပါတယ်။
“ရဲစခန်းမှာ အချုပ်ကျနေတဲ့သူတွေ အကုန် အယောက် ၂၀ ကျော်လောက် စားစရာ မရှိတော့ဘူးတဲ့။ ထမင်းမစားရဘူး။ ရေပဲသောက်နေရတာ နှစ်ရက်ရှိပြီတဲ့။ စားစရာလည်း ပေးကြပါဦးပေါ့။ ရဲစခန်းကလည်း ဂရုမစိုက်ဘူး။ အဲဒီအချုပ်ကျနေတဲ့သူတွေ လုံးဝထမင်းမစားရဘဲ ဆန်ပြုတ်ပဲ သောက်ရတာကို တစ်နေ့ တစ်ကြိမ်ပဲ သောက်ရတယ်တဲ့၊ ဆန်ပြုတ်တောင် မသောက်ရတာ နှစ်ရက်ရှိပြီတဲ့၊ ရေပဲ သောက်ရတာ။ အဲဒါ ကျွန်တော်တို့ ငတ်နေပါပြီလို့ လုပ်ကြပါဦး ဆိုပြီး ဆိုင်ရာဆိုင်ရာကို ဖုန်းဆက်ဖို့ ကြိုးစားတယ်လို့ ကြားရတယ်”
စစ်ကောင်စီတပ်တွေကို ရရာလက်နက်နဲ့ ပြန်လည်ခုခံနေတဲ့ မင်းတပ်မြို့မှာ ဇွန်လ ၃ရက်နေ့ကနေ ဒီနေ့ ဇွန်လ ၈ နေ့အထိလည်း မင်းတပ်ဒေသကာကွယ်ရေး CDF အဖွဲ့နဲ့ တိုက်ပွဲတွေဆက်ဖြစ်နေပါတယ်။ ဒီနေ့ မနက်မှာတော့ CDF အဖွဲ့ဝင် တစ်ဦး သေဆုံးခဲ့ပြီး ငါးဦး ဒဏ်ရာရခဲ့တယ်လို့ မင်းတပ်မြို့ CDF အဖွဲ့ ပြန်ကြားရေးတာဝန်ခံက ပြောပါတယ်။
“ဒီနေ့လည်း တိုက်ပွဲတွေဆက်ဖြစ်တယ်။ တိုက်ပွဲတွေဆက်ဖြစ်တော့ လက်နက်ကြီးထိလို့ ဒီမနက် ချောင်းဆုံတိုက်ပွဲဘက်က တစ်ယောက်ကျဆုံး၊ ဒဏ်ရာရတဲ့သူလည်း လေးဦး၊ ငါးဦးလောက်ရှိတယ်ဗျ။ မင်းတပ်မှာ တိုက်ပွဲအတွင်း ကျဆုံးခဲ့ CDF အဖွဲ့ဝင် စုစုပေါင်း ဒီနေ့ကျဆုံးတာပါရင် ၂၂ ယောက်ရှိနေပါပြီ။” လို့ မင်းတပ်မြို့ CDFအဖွဲ့ ပြန်ကြားရေးတာဝန်ခံက RFAကို ပြောပါတယ်။
မင်းတပ်မြို့ပေါ်ကနေ နီးစပ်တဲ့ရွာတွေ၊ တောတောင်တွေနဲ့ ယောနယ်ဘက်တွေကို တိမ်းရှောင်နေရတဲ့ စစ်ပြေး ဒုက္ခသည်ဦးရေ တစ်သောင်းကျော်ဝန်းကျင် ရှိနေပြီး သူတို့ရှောင်တဲ့နေရာတွေကိုပါ စစ်တပ်က လက်နက်ကြီး တွေနဲ့ ပစ်ခတ်တာတွေရှိတယ်လို့ ထွက်ပြေးနေရတဲ့ ဒုက္ခသည်တစ်ယောက်က RFA ကိုပါတယ်။
“အခု ကျွန်တော်တို့ရဲ့ စစ်ဘေးရှောင်တွေရှိနေတဲ့ စစ်ဘေးရှောင်စခန်းတွေကိုပါ လက်နက်ကြီးတွေနဲ့ ပစ်နေတယ်။ စစ်ဘေးရှောင်တွေနေတဲ့နေရာတွေကိုပါ စစ်ကြောင်းသုံးကြောင်းနဲ့ အတင်းထိုးစစ်ဆင် နေတယ်။ လုံခြုံရေးကအဓိကပေါ့။ ကျွန်တော်တို့မှာ စားစရာဆန်တွေလည်း မရှိတော့ဘူး။ မိုးရာသီလည်း ရောက်လာပြီ။ တာလပတ် လိုလာတယ်။ မြို့ပေါ်ကနေ စစ်ဘေး ရှောင်လာတာကို ထပ်တိုက်တယ်ဆိုတော့ ထပ်စစ်ဘေးရှောင်ရတာပေါ့။ အခုလို မိုးရာသီထဲမှာ တောထဲ ပြေးလွှားရှောင်တိမ်းနေရတော့ ပိုခက်ခဲတာပေါ့”
စစ်ကောင်စီတပ်နဲ့ မင်းတပ် CDF တို့ ဧပြီ ၂၄ ရက်နေ့ကစပြီး ဒီနေ့ တိုက်ပွဲအထိ တစ်လခွဲကျော်အတွင်း အရပ်သားတွေဘက်က သေဆုံး၊ ဒဏ်ရာရတာရှိသလို၊ စစ်တပ်ဘက်က သေဆုံးသူလည်း ဒါဇင်နဲ့ချီရှိနိုင် တယ်လို့ CDF မင်းတပ်အဖွဲ့က ခန့်မှန်းပြောဆိုပါတယ်။
ဒီအတောအတွင်းမှာပဲ စစ်ကိုင်းတိုင်း ဒီပဲယင်းမြို့နယ်ထဲက ယဉ်ကျေးရွာအနီးမှာ ပြည်သူ့ကာကွယ်ရေးတပ်နဲ့ စစ်ကောင်စီတပ်တို့ ဒီကနေ့မွန်းတည့် ၁၂ နာရီလောက်က စပြီး အပြန်အလှန် ပစ်ခတ်နေကြရင်း ကနဦး သတင်းအရ စစ်ကောင်စီဘက်က သုံးယောက် ဒဏ်ရာရသွားတယ်လို့ ဒီပဲယင်း ပြည်သူ့ကာကွယ်ရေးတပ်ဖွဲ့ ဝင် တစ်ယောက်က ပြောပါတယ်။
“လွန်ခဲ့တဲ့ ၃ ရက်လောက်က ဒီမှာ မိုင်းကွဲတော့ အဲဒီကိစ္စကြောင့် လာတာထင်တယ်။ ကား သုံးစီး၊ အင်အား ၅၀ လောက်ရှိမယ်။ စက်သေနတ်တွေနဲ့ပါ ပစ်တယ်။ စစ်သား သုံးယောက် ဒဏ်ရာရထားတယ်။ ပြည်သူ့ ကာကွယ်ရေးအဖွဲ့ကတော့ ဒဏ်ရာရသူမရှိသေးဘူး”
မင်းတပ်နဲ့ ဒီပဲယင်းဖြစ်ရပ်မှာ စစ်တပ်ဘက်က အသေအပျောက်ရှိတယ် ဆိုတဲ့ကိစ္စနဲ့ ပတ်သက်လို့ စစ်ကောင်စီ ရဲ့ ပြန်ကြားရေး ဒုဝန်ကြီး ဗိုလ်ချုပ်ဇော်မင်းထွန်းကို RFA က ဆက်သွယ်မေးမြန်းခဲ့ပေမယ့် တယ်လီဖုန်းလက်ခံ ဖြေဆိုတာမရှိပါဘူး။
အခုသတင်းရေးနေတဲ့ မွန်းလွဲပိုင်းအချိန်ထိ တိုက်ပွဲဆက်ဖြစ်နေသေးတဲ့အတွက် နှစ်ဖက်ထိခိုက်ဒဏ်ရာရတာ ဘယ်နှစ်ယောက်ရှိလဲဆိုတဲ့ သတင်းအချက်အလက်ကို RFA က သီးခြားအတည် မပြုနိုင်သေးပါဘူး။
စစ်ကောင်စီရဲ့တပ်ဖွဲ့ဝင်တွေဟာ မူးကမ်းကြီးရွာဘက်ကို ဆက်ထွက်သွားပြီး အဲဒီရွာဘက်မှာလည်း ဒေသခံ ပြည်သူ့ကာကွယ်ရေးတပ်နဲ့ ထပ်ပြီးတိုက်ပွဲဖြစ်တယ်လို့ ပြောပါတယ်။
RFA News