စစ်ကိုင်းတိုင်း၊ ကျွန်းလှနဲ့ ကန့်ဘလူမြို့နယ်တွေမှာ ဇန်နဝါရီလ ၁၄ ရက်က စစ်ကောင်စီတပ်က ကျေးရွာ ၁၄ ရွာကို စစ်ကြောင်းထိုးလို့ အရပ်သား ငါးထောင်ကျော် အိုးအိမ်စွန့်ခွာ ထွက်ပြေးနေရတယ်လို့ ဒေသခံတွေက ပြောပါတယ်။
ကျွန်းလှမြို့နယ် တောင်ယာဆိပ်၊ မြင်သာဦး၊ သံပရာပင်စု၊ မြဘုံသာ၊ တကုန်း၊ ကုက္ကိုကုန်းနဲ့ ကန့်ဘလူမြို့နယ် ညောင်ကုန်း၊ ပလူသာ၊ သရက်တော၊ မကျီးကုန်း၊ တည်ပင်၊ ချောင်းကြား ရွာတွေ အပါအဝင် ၁၄ ရွာက ဒေသခံတွေ ထွက်ပြေးနေရတာပါ။
ကန့်ဘလူမြို့နယ် ညောင်ကုန်းရွာကို ဇန်နဝါရီလ ၁၄ ရက်ညနေပိုင်းမှာ စစ်ကောင်စီ တပ်တွေက မီးရှို့တယ်လို့ ဒေသခံတစ်ဦးက RFA ကို ပြောပါတယ်။
“မနေ့ညနေက ညောင်ကုန်းရွာကို မီးဝင်ရှို့တယ်။ ကန့်ဘလူ ချပ်ကြီးရွာဘက်နေ ညောင်ကုန်းရွာဘက်ကို စစ်ကြောင်းထိုးလာတာ။ ညောင်ကုန်းရွာက ဒုတိယအကြိမ် မီးရှို့ခံရတာ။ ပထမတစ်ကြိမ်တုန်းက နေအိမ် ၃၀ လောက်မီး လောင်ပျက်စီးခဲ့ သေးတယ်။ ရွာစဉ်တစ်လျှောက် စစ်ကြောင်းထိုးတဲ့နေရာက တောတိုက် (တဲ) တွေတော့ မီးရှို့ခံလိုက်ရတယ်”
ညောင်ကုန်းရွာက နေအိမ် အလုံး ၅၀ နဲ့ စပါးကျီ ၁၅ လုံး၊ တဲခုနစ်လုံး မီးရှို့ဖျက်ဆီးခံလိုက် ရတယ်လို့ သူက ပြောပါတယ်။
ဒီကိစ္စနဲ့ပတ်သက်လို့ စစ်ကောင်စီရဲ့ စစ်ကိုင်းတိုင်းပြောခွင့်ရသူ ဦးအေးလှိုင်ကို တယ်လီဖုန်းနဲ့ဆက်သွယ်ခဲ့ပေမယ့် လက်ခံဖြေဆိုတာမရှိပါဘူး။
ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးမှူးရုံး (UN OCHA) ရဲ့ စာရင်းတွေအရ အာဏာသိမ်းပြီးနောက် ၂၀၂၂ ခုနှစ်၊ ဒီဇင်ဘာလကုန်အထိ မလုံခြုံမှုနဲ့ ပဋိပက္ခတွေကြောင့် စစ်ကိုင်းတိုင်းက ဒေသခံ ခြောက်သိန်းခွဲကျော် အိုးအိမ်စွန့်ခွာ ထွက်ပြေးနေရပါတယ်။
