ဇန်နဝါရီလ ၆ ရက်နေ့က ပုသိမ်အကျဉ်းထောင်မှာ နိုင်ငံရေးအကျဉ်းသား နှစ်ဦးသေဆုံးရတဲ့ ထောင်ဆူပူမှုမှာ အကြမ်းဖက်ဖြိုခွင်းမှုဖြစ်ခဲ့ပါတယ်။ အဲဒီနောက် ထောင်ဝင်စာပစ္စည်း ပို့ခွင့်ကို တစ်လပိတ်လိုက်တယ်လို့ အကျဉ်းသားမိသားစုဝင်တွေက ပြောပါတယ်။
နိုင်ငံရေးအကျဉ်းသားတစ်ဦးဆီက လက်ကိုင်ဖုန်းတွေ့တဲ့အတွက် ထောင်အာဏာပိုင်တွေ က ရိုက်နှက်စစ်ဆေးခဲ့တာကို ဇန်နဝါရီ ၆ ရက်မှာ ထောင်တွင်းနိုင်ငံရေးအကျဉ်းသားတွေ ကန့်ကွက်ဆန္ဒပြတာကနေ ထောင်အာဏာပိုင်တွေနဲ့ ရဲတပ်ဖွဲ့က ပစ်ခတ်ဖြိုခွင်းခဲ့တာပါ။
“ပို့ထားတဲ့မုန့်ပဲ သရေစာတွေ ဘာတွေတောင်မှ သိမ်းသွားတယ်ဆိုပြီး ပြောသံကြားတယ်”
ဒီဖြစ်စဉ်ပြီးနောက်ရက် ဇန်နဝါရီလ ၇ ရက်ကစပြီး ပုသိမ်အကျဉ်းထောင်မှာ ထောင်ဝင်စာ ပို့ခွင့် ပိတ်လိုက်တယ်လို့ အကျဉ်းသားမိသားစုဝင်တစ်ဦးက ပြောပါတယ်။
“တစ်လ ပိတ်ထားတယ်။ ရှေ့လငါးရက်နေ့မှာ ပြန်ဖွင့်မယ်လို့ပြောတယ်။ လောလောဆယ် အဲဒီတစ်လလုံးကတော့ ထောင်ဝင်စာမပို့ရဘူးပေါ့။ အစားအသောက် အခက်အခဲဖြစ်မှာပေါ့နော်။ နဂိုဆိုရင်တော့ ထောင်ဝင်စာပိတ်တယ်ဆိုရင်တောင် အထဲသက်သာဆိုင်ကနေပြီးတော့ မှာစားလို့ရတယ်။ အခုက အထဲသက်သာဆိုင်ရော အကုန်လုံးပိတ်ထားတယ်။ သူတို့ကျွေးတာနဲ့ ပဲစားရမှာပေါ့ ဒါပဲရှိတယ်။ အရင်က ပို့ထားတဲ့ (အစားအသောက်) တွေကိုလည်း သိမ်းတယ်လို့ကြားတယ်။ သူတို့ကျွေးတာပဲ စားရေးမှာပေါ့လေ အဲဒါပဲရှိတယ်”
နောက်ထပ် အကျဉ်းသားမိသားစုဝင်တစ်ဦးကလည်း ဒီတစ်လတော့ အကျဉ်းသားတွေဟာ ထောင်အာဏာပိုင်တွေ ကျွေးသလောက်သာစားပြီး ခက်ခက်ခဲခဲနေရတော့မယ်လို့ RFA ကို ပြောပါတယ်။
“၆ ရက်နေ့က ပါဆယ်ပေးမယ်ဆိုပြီး သွားတဲ့နေ့ကတည်းက ပိတ်ထားတာ။ ကျမတို့ ဟိုနေ့ကတော့ သွားပြီးစုံစမ်းသေးတယ်။ တစ်လပိတ်တယ်ဆိုပြီးတော့ ထောင်အရှေ့က ဝန်ထမ်းတွေက ပြောလိုက်တယ်။ အဆက်သွယ်ကျတော့လည်းဘာမှ ဆက်သွယ်လို့ မရတော့တာ။ စားရေးသောက်ရေးကတော့ အထဲကပစ္စည်းတွေ၊ ပို့ထားတဲ့မုန့်ပဲ သရေစာတွေ ဘာတွေတောင်မှ သိမ်းသွားတယ်ဆိုပြီး ပြောသံကြားတယ်။ သူတို့ကျွေးတာလေးပဲ စားပြီးတော့ အဆင်ပြေသလိုပဲနေရမှာပေါ့။ အခက်အခဲက ရှိမှာပေါ့”
အကြမ်းဖက်ဖြိုခွင်းမှုဖြစ်ပြီးနောက် နိုင်ငံရေးအကျဉ်းသားတွေကို ထမင်းတစ်နပ်ပဲ ကျွေးတယ်ဆိုတဲ့ သတင်းတွေလည်း ထွက်ပေါ်နေတာကြောင့် စိုးရိမ်တယ်လို့ မိသားစုဝင်တွေက ပြောပါတယ်။
ဒီဖြစ်စဉ်မတိုင်ခင်တုန်းက တစ်ပတ်မှာ တစ်ရက် ထောင်ဝင်စာပစ္စည်းပို့ခွင့် ရခဲ့ပါတယ်။
ထောင်ဝင်စာပစ္စည်းပို့ခွင့် ပိတ်လိုက်တာက အကျဉ်းသားတွေရဲ့ အခွင့်အရေးဆုံးရှုံးမှု ဖြစ်တယ်လို့ အမှုလိုက်ပါဆောင်ရွက်ပေးနေတဲ့ ရှေ့နေတစ်ဦးက ဝေဖန်ပါတယ်။
“ကိုဗစ်ရောဂါ ကပ်ဘေးကြောင့် ၂၀၂၀၊ မတ်လကတည်းက စပြီးတော့ အကျဉ်းထောင် တိုင်းမှာ လူထောင်ဝင်စာ တွေ့ဆုံခွင့်၊ လူတွေ့တွေ့ဆုံခွင့် ပိတ်ထားတယ်။ အခုထပ်ပြီး ပိတ်လိုက်တာသည် ပစ္စည်းပေးခွင့်နဲ့ စာပေးစာယူအခွင့်အရေးကို ပိတ်လိုက်တယ်ဆိုရင် အကျဉ်းသား၊ အချုပ်သားတွေမှာ စားဝတ်နေရေးနဲ့ပတ်သက်ပြီး အခက်အခဲတော့ ရှိလာနိုင်တာပေါ့။ အဲလိုတော့ ဖြစ်လာနိုင်တယ်။ စစ်ဆေးမှုပြီးဆုံးသွားရင်တော့ ပြန်ပြီး တော့ဖွင့်ပေးမှာပါ။ ပြဿနာကြီးကြီးမားမား ဖြစ်ထားတဲ့ထောင်မှာ နောက်ထပ် အကျဉ်းသားတွေအပေါ်မှာ ဖိအားဖြစ်စေနိုင်တာမျိုး မဖန်တီးမိဖို့ ထောင်အာဏာပိုင်တွေ က နားလည်သဘောပေါက်ပါတယ်။ ထပ်ပြီးတော့မှ ဖိအားသဘောမျိုး ဖြစ်လာရင် နောက်ဆက်တွဲ အလားတူဖြစ်သွားမှာလည်း ကြိုတင်တွက်ဆထားပြီးသားဆိုတော့ သိပ်တော့မကြာလောက်ပါဘူး”
ပုသိမ်မြို့အကျဉ်းထောင်က အဓိကရုဏ်းအတွင်း နိုင်ငံရေးအကျဉ်းသား ကိုဝေယံဖြိုးနဲ့ ကိုဝင်းမင်းထက်တို့ နှစ်ဦးသေဆုံးခဲ့ပြီး အကျဉ်းသား ၇၀ နီးပါး ထိခိုက်ဒဏ်ရာရခဲ့ပါတယ်။
ပဋိပက္ခမှာပါဝင်တဲ့ နိုင်ငံရေးအကျဉ်းသား ၆၀ ကျော်ကို စစ်ကောင်စီက ထပ်တိုးပုဒ်မတွေနဲ့ တရားစွဲဆိုထားတယ်လို့ သတင်းထွက်ပေါ်နေပါတယ်။
ဒီကိစ္စနဲ့ပတ်သက်လို့ စစ်ကောင်စီ အကျဉ်းဦးစီးဌာန ပြောရေးဆိုခွင့်ရှိသူ ဦးနိုင်ဝင်းကို RFA က တယ်လီဖုန်းနဲ့ဆက်သွယ်ခဲ့ပေမယ့် လက်ခံဖြေကြားတာ မရှိပါဘူး။
၂၀၂၂ ခုနှစ်၊ အောက်တိုဘာလ ၁၉ ရက်က ရန်ကုန်တိုင်း၊ အင်းစိန်အကျဉ်းထောင်က ထောင်ဝင်စာဌာနမှာ လူရှစ်ဦးအထိသေဆုံးခဲ့တဲ့ ဗုံးပေါက်ကွဲမှုဖြစ်ပြီးနောက် နိုင်ငံ တစ်ဝန်းက အကျဉ်းထောင်တွေမှာ ထောင်ဝင်စာ ပစ္စည်းပို့ခွင့် နှစ်ပတ်နီးပါးပိတ်ခဲ့ပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ရဲ့ ဇန်နဝါရီလ ၁၃ ရက် ထုတ်ပြန်ချက်အရ အာဏာသိမ်းပြီးနောက် နိုင်ငံတစ်ဝန်း ဖမ်းဆီးခံရသူ ၁၃,၄၉၅ ဦးရှိပါတယ်။
