စစ်ကိုင်းတိုင်း၊ တမူးမြို့နယ်၊ ခါမ်းပါတ်မြို့ မှာ စစ်ကောင်စီတပ်က ဒီဇင်ဘာ ၆ ရက်နေ့ကစပြီး ထိုးစစ်ဆင်လာ တာကြောင့် ဒေသခံတွေ ထပ်မံထွက်ပြေးနေရတယ်လို့ ခါမ်းပါတ်မြို့ခံတွေက RFA ကို ပြောပါတယ်။
ဒေသကာကွယ်ရေးပူးပေါင်းအဖွဲ့တို့ သိမ်းပိုက်ထားတဲ့ ခါမ်းပါတ်မြို့ကို စစ်ကောင်စီတပ်က နယ်မြေပြန်လည်စိုးမိုးနိုင်ဖို့အတွက် ကလေးမြို့ကနေ စစ်ကြောင်းထိုးလာတာဖြစ်ပြီး ဒေသခံတွေက တိုက်ပွဲဖြစ်လာနိုင်တဲ့အတွက် ထွက်ပြေးတိမ်းရှောင်နေရတာလို့ လုံခြုံရေးအရအမည်မဖော်လိုတဲ့ ဒေသခံတစ်ဦးက ပြောပါတယ်။
“စစ်ကောင်စီတပ်တွေက ခါမ်းပါတ်မြို့ကို စစ်ကြောင်းထိုး လာတာကြောင့် ကျွန်တော်တို့က ကြိုရှောင်နေရတာ ပေါ့ အနီးနားကရွာတွေမှာ။ စစ်ကောင်စီတပ်တွေကတော့ ခါမ်းပါတ်မြို့တော့ မရောက်သေးဘူး။ နီးတော့ နီးလာပြီလို့ ပြောကြတယ်။ အဓိက ကတော့ လေကြောင်းနဲ့ လက်နက်ကြီးတွေ ကြောက်လို့ပါ။ ထွက်ပြေးနေရတဲ့ လူဦးရေကတော့ အတိအကျ မပြောနိုင်သေးဘူး”
ဒီကိစ္စနဲ့ပတ်သက်လို့ စစ်ကောင်စီရဲ့ စစ်ကိုင်းတိုင်းပြောခွင့်ရ တိုင်းရင်းသားရေးရာဝန်ကြီး ဦးစိုင်းနိုင်နိုင်ကျော်ကို RFA က ဒီနေ့ ဆက်သွယ်ခဲ့ပေမယ့် ဖုန်းလက်ခံဖြေကြားတာမရှိပါဘူး။
ခါမ်းပါတ်ကို စစ်ကြောင်းထိုးလာတဲ့ စစ်ကောင်စီတပ်သားတွေက ဒီဇင်ဘာ ၅ ရက်နေ့ ညပိုင်းမှာ ကင်းစောင့်နေတဲ့ ပြည်သူ့ကာကွယ်ရေးတပ်ဖွဲ့၀င် ခြောက်ဦးကို ဖမ်းဆီးခဲ့ပြီး နှစ်ဦး ထွက်ပြေးလွတ်မြောက်ခဲ့ပေမယ့် လေးဦး သတ်ဖြတ်ခံရတယ်လို့ တမူးပြည်သူ့ကာကွယ်ရေးတပ်ဖွဲ့၊ တပ်ရင်း အမှတ် ၂ သတင်းပြန်ကြားရေးတာဝန်ခံက ပြောပါတယ်။
အခုလက်ရှိမှာ တမူးမြို့နယ်မှာလည်း စစ်ကောင်စီတပ်ဖွဲ့နဲ့ ပြည်သူ့ကာကွယ်ရေးတပ်ဖွဲ့တို့ စစ်ရေးတင်းမာနေတယ်လို့ ဆိုပါတယ်။
ခါမ်းပါတ်မြို့ကို ပြီးခဲ့တဲ့ ၂၀၂၃ နိုဝင်ဘာလ ၇ ရက်နေ့မှာ KIA နဲ့ ဒေသခံ PDF ပူးပေါင်းတပ်ဖွဲ့တို့က သိမ်းယူခဲ့တာ ဖြစ်ပါတယ်။
