စစ်ကိုင်းတိုင်း၊ ရွှေဘိုမြို့နယ်နဲ့ ခင်ဦးမြို့နယ်မှာ စစ်ကောင်စီတပ်က စစ်ကြောင်းထိုး လာတာကြောင့် ဇူလိုင်လ ၁၆ ရက်မှာ ကျေးရွာ ၁၂ ရွာက အရပ်သားရှစ်ထောင်ကျော် ထွက်ပြေးတိမ်းရှောင်နေရတယ်လို့ ဒေသခံတွေက ပြောပါတယ်။
ရွှေဘိုမြို့နယ် ညောင်ပင်သာရွာ၊ ကျားရွာနဲ့ အင်ပင်လှရွာ၊ ခင်ဦးမြို့နယ်က တယ်ဘိုပင်ရွာ၊ ကြာပင်အိုင်ရွာ၊ တပင်ကောင်းရွာ၊ သိန်တော်ရွာ၊ ညောင်ပင်ကြီးစုရွာ၊ ကျွန်းလည်ရွာ၊ ကျွန်းဆွယ်ရွာ၊ မှန်သာရွာနဲ့ မှန်တော်ရွာတွေက ဒေသခံတွေ ထွက်ပြေးနေရတာပါ။
စစ်ကောင်စီတပ်သားအင်အား ၁၀၀ ကျော်ဟာ ဇူလိုင် ၁၅ ရက်မှာ ရွှေဘိုမြို့နယ် ညောင်ပင်သာရွာကနေ ခင်ဦးမြို့နယ် တယ်ဘိုပင်ရွာကို ဝင်ရောက်ခဲ့တာပါ။
ဇူလိုင် ၁၆ ရက်၊ ဒီနေ့မှာလည်း ဆက်ပြီးစစ်ကြောင်းထိုးနေတာကြောင့် တယ်ဘိုပင်ရွာအနီး ကျေးရွာတွေက အရပ်သားတွေပါ ထွက်ပြေးနေရတယ်လို့ ဒေသခံတစ်ဦးက ပြောပါတယ်။
“ဒေသခံတွေဟာ မိုးရွာထားလို့ လမ်းမကောင်းတဲ့ကြားက အသက်ဘေးလွတ်ရာကို အိုးအိမ်စွန့်ခွာပြီး ပြေးနေကြရပါတယ်”
အခုစစ်ကြောင်းထိုးနေတဲ့ စစ်ကောင်စီတပ်ဟာ ရွှေဘိုမြို့က အမှတ် (၈) စစ်အခြေခံ လေ့ကျင့်ရေးတပ်ဖြစ်တယ်လို့ ဒေသခံတွေက ပြောပေမယ့် RFA က သီးခြား အတည်မပြုနိုင်သေးပါဘူး။
စစ်ကောင်စီရဲ့ စစ်ကိုင်းတိုင်း ပြောခွင့်ရ ဦးစောနိုင်ကို RFA က ဖုန်းနဲ့ဆက်သွယ်ခဲ့ပေမယ့် လက်ခံဖြေဆိုတာ မရှိခဲ့ပါဘူး။
အာဏာသိမ်းပြီးနောက် စစ်ရေးပဋိပက္ခတွေကြောင့် စစ်ကိုင်းတိုင်းမှာ အရပ်သား ခုနစ်သိန်းခွဲကျော် (၇၆,၅၂၀၀) အိုးအိမ်စွန့်ခွာထွက်ပြေးခဲ့ရပါတယ်။
