မန္တလေးတိုင်း၊ နွားထိုးကြီးမြို့နယ်မှာ အင်အားသုံးရာနီးပါးရှိတဲ့ စစ်ကောင်စီတပ်ရဲ့ စစ်ကြောင်းသုံးခုနဲ့ ဒေသကာကွယ်ရေးတပ်ဖွဲ့တွေအကြား ဇွန်လ ၈ ရက်နေ့ကစလို့ တိုက်ပွဲတွေ ပြင်းထန်နေပြီး ရွာငါးရွာထက်မနည်း မီးရှို့ခံထားရတယ်လို့ ဒေသခံတွေက ဇွန်လ ၁၀ ရက်နေ့မှာ ပြောပါတယ်။
နွားထိုးကြီးမြို့နယ်ထဲက မကျီးကန်၊ ဆူးဖြူကုန်း၊ ဖောင်ကျင်း (ဖောင်းချဉ်)(မြောက်)၊ ဖောင်ကျင်း (ဖောင်းချဉ်)(တောင်)၊ နဘူးတော၊ ဘုတ်ကုန်း စတဲ့ရွာတွေက နေအိမ်တွေ မီးရှို့ခံရတာလို့ ဒေသခံတွေက ပြောပါတယ်။
အခု မီးရှို့ခံရတဲ့ ရွာတွေဟာ အိမ်ခြေငါးရာကနေ ခုနစ်ရာဝန်းကျင်ရှိတဲ့ ရွာကြီးတွေဖြစ်ပြီး စစ်ကြောင်းတွေ ဒီနေ့အထိ ရှိနေတာကြောင့် မီးလောင်သွားတဲ့ နေအိမ်အရေအတွက် အသေးစိတ်မသိရသေးဘူးလို့ ဒေသခံတွေက ပြောပါတယ်။
ဇွန်လ ၁၀ ရက် မနက်ပိုင်းမှာလည်း တိုက်ပွဲတွေပြင်းထန်နေပြီး စစ်ကောင်စီတပ်က ဘုတ်ကုန်းရွာကို မီးရှို့နေတယ်လို့ လုံခြုံရေးအရ အမည်မဖော်လိုတဲ့ နွားထိုးကြီးဒေသခံတစ်ဦးက RFA ကို ပြောပါတယ်။
“တိုက်ပွဲက အပြင်းအထန်ပဲ ကျွန်တော်တို့နဲ့ဆိုရင် နှစ်မိုင်လောက်ပဲ ဝေးတယ်။ အခု ဘုတ်ကုန်းရွာကို မီးရှို့တာ ဘာမှမကျန်တော့ဘူး။ အဲဒီနားမှာပဲ ခံစပ်ကုန်း အရှေ့ရွာ၊ အနောက်ရွာရှိတယ်။ စစ်ကြောင်းက ခံစပ်ကုန်းဘက်ကို စစ်ကြောင်းထိုးမယ့် အခြေအနေမှာတော့ ရှိတယ်”
တိုက်ပွဲတွေပြင်းထန်နေတာကြောင့် ရွာပေါင်းနှစ်ဆယ်နီးပါးက ဒေသခံတစ်သောင်းကျော်လည်း ဘေးလွတ်ရာကို ထွက်ပြေးတိမ်းရှောင်နေရတယ်လို့ ဒေသခံတွေက ပြောပါတယ်။
ဒီအခြေအနေနဲ့ ပတ်သက်လို့ တုံ့ပြန်ချက်ရဖို့ စစ်ကောင်စီရဲ့ မန္တလေးတိုင်းပြောခွင့်ရသူ တိုင်းစီးပွားရေးဝန်ကြီး ဦးသိန်းဌေးကို RFA က တယ်လီဖုန်းနဲ့ ဆက်သွယ်ခဲ့ပေမဲ့ ဖုန်းလက်ခံဖြေကြားတာ မရှိပါဘူး။
Data for Myanmar ရဲ့ စာရင်းတွေအရ အာဏာသိမ်း သုံးနှစ်ကျော်ကာလအတွင်း နိုင်ငံတစ်ဝန်း နေအိမ်ပေါင်း ကိုးသောင်းနီးပါး (၈၈,၃၇၃ လုံး) မီးရှို့ဖျက်ဆီးခံခဲ့ရပါတယ်။
