လူငယ်ထိန်းသိမ်းရေး သင်တန်းကျောင်းတချို့မှာ နိုင်ငံရေးနဲ့ဆက်နွယ်ပြီး ဖမ်းဆီးခံထားရတဲ့ အသက်မပြည့်သေးတဲ့ အမျိုးသမီးတွေ အပါအဝင် ထိန်းသိမ်းခံထားရတဲ့ အမျိုးသမီးငယ်တွေဟာ လိင်ပိုင်းဆိုင်ရာ ဖိနှိပ်မှု၊ လိင်ပိုင်းဆိုင်ရာ အရှက်ရစေမှုနဲ့ ကလေးသူငယ် အခွင့်အရေးချိုးဖောက်ခံရမှုတွေရှိနေတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က မေလ ၃၀ ရက်နေ့မှာ ထုတ်ပြန်ပါတယ်။
စစ်ကောင်စီရဲ့ လူမှုဝန်ထမ်းဦးစီးဌာန လက်အောက်မှာရှိတဲ့ ရန်ကုန်တိုင်း ဗဟန်းနဲ့ ကော့မှူးမြို့နယ်တို့က သင်တန်းကျောင်း နှစ်ခုနဲ့ မန္တလေးတိုင်း ပုသိမ်ကြီးမြို့နယ်က လူငယ်သင်တန်းကျောင်းတို့မှာ အခွင့်အရးချိုးဖောက်မှုတွေ ကြုံနေရတာလို့ ဆိုပါတယ်။
အဲဒီသင်တန်းကျောင်းတွေမှာ အမျိုးသမီးငယ်တွေကို အဝတ်အစားတွေ ချွတ်ခိုင်းပြီး အပြစ်ပေးတာ၊ အမျိုးသမီးနေရာတွေကို အမျိုးသမီးဝန်ထမ်းရဲ့ မိသားစုဝင် အမျိုးသားတွေက ဝင်ထွက်နေတာ၊ အိပ်ခန်း အပါအဝင် ရေချိုးဖို့ သတ်မှတ်ထားတဲ့နေရာနဲ့ အိမ်သာတွေကို မြင်နိုင်တဲ့နေရာတွေမှာ CCTV ကင်မရာ တပ်ဆင်ထားတာတွေကြောင့် စိတ်ပိုင်းနဲ့ ရုပ်ပိုင်းဆိုင်ရာ မလုံခြုံမှုတွေ ရှိနေတာလို့ PPNM က ပြောပါတယ်။
ဒီအပြင် အစားအစာ လုံလောက်မှုမရှိတာ၊ အမျိုးသမီးလစဉ်သုံးပစ္စည်း မလုံလောက်တာတွေ ကြုံနေရသလို တုတ်နဲ့ရိုက် အပြစ်ပေးတာနဲ့ ထင်းခွဲခိုင်းတာလိုမျိုး ပင်ပန်းတဲ့အလုပ်တွေကိုပါ ခိုင်းစေနေတာတွေရှိတယ်လို့လည်း ဆိုပါတယ်။
ဒီလို လူ့အခွင့်အရေး ချိုးဖောက်ခံနေရမှုအပေါ် ကန့်ကွက်တယ်လို့ PPNM ရဲ့ ဦးဆောင်ကော်မတီဝင် ကိုသိုက်ထွန်းဦးက RFA ကို ပြောပါတယ်။
“လက်ရှိအချိန်မှာ စားသောက်နေထိုင်ရေးဖြစ်တဲ့ အခြေခံထောက်ပံ့မှုတွေကို လုံလုံလောက်လောက် မရရှိနေခြင်းဟာလည်း လူ့အခွင့်အရေး ချိုးဖောက်ခံနေရခြင်း ဖြစ်ပါတယ်။ ပိုပြီးဆိုးရွားတာက အမျိုးသမီးငယ်တွေ အိပ်တဲ့အခန်းတွေ၊ ပြီးတော့ သူတို့တွေ ရေချိုးတဲ့နေရာတွေနဲ့ အိမ်သာတွေကို မြင်ရတဲ့ ထောင့်တွေမှာ စီစီတီဗီတွေကို တပ်တပ်ထားတာ ဖြစ်တယ်ပေါ့။ ဒီလိုမျိုးထားခြင်းဟာ အမျိုးသမီးငယ်တွေ ရေချိုးရမှာသော်လည်းကောင်း၊ အိမ်သာတက်ရမှာသော်လည်းကောင်းပေါ့။ သူတို့ရဲ့ ရုပ်ပိုင်းနဲ့ စိတ်ပိုင်းဆိုင်ရာ မလုံခြုံမှုတွေ၊ ဒီရဲ့ စီစီတီဗီ မှတ်တမ်းတွေက ပြင်ပကိုပေါက်ကြားသွားခဲ့သည်ရှိသော် သူတို့ရဲ့ ဂုဏ်သိက္ခာ ထိခိုက်နိုင်တဲ့အရာတွေပေါ့”
ဒီအခြေအနေတွေနဲ့ပတ်သက်လို့ တုံ့ပြန်ချက်ရနိုင်ဖို့ စစ်ကောင်စီရဲ့ လူမှုဝန်ထမ်းဦးစီးဌာန ဒုတိယညွှန်ကြားရေးမှူးချုပ် ဦးလွင်ဦးကို RFA က ဆက်သွယ်မေးမြန်းတဲ့အခါ တယ်လီဖုန်းကတစ်ဆင့် ဖြေကြားနိုင်မှာမဟုတ်ဘူးလို့ တုံ့ပြန်ပါတယ်။
စစ်ကောင်စီရဲ့ လူမှုဝန်ထမ်းဦးစီးဌာန စာရင်းတွေအရ ရန်ကုန်တိုင်း၊ မန္တလေးတိုင်း၊ ဧရာ၀တီတိုင်း၊ ရှမ်းပြည်နယ်နဲ့ မွန်ပြည်နယ်တို့မှာ လူငယ်သင်တန်းကျောင်း ၁၁ ခုရှိပါတယ်။
