ချင်းပြည်နယ်၊ ပလက်၀မြို့နယ်၊ ကုလားတန်မြစ်ဘေးက ထရွန်အိုင်ရွာကို မေလ ၂၁ ရက်နေ့မှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်တာကြောင့် အရပ်သားငါးဦး သေဆုံးပြီး ဆယ်ဦးထက်မနည်း ဒဏ်ရာရခဲ့တယ်လို့ ဒေသခံတွေက ပြောပါတယ်။
သေဆုံးသူတွေက အသက် ၁၇ နှစ်အရွယ် မစန္ဒာ၊ အသက် ၄၇ နှစ်အရွယ် ဒေါ်လှခိုင်ဦး၊ အသက် ၃၂ နှစ်အရွယ် ကိုမောင်သိန်းနိုင်၊ အသက် ၃၃ နှစ်အရွယ် ကိုအောင်ကျော်ညွန့်နဲ့ အသက် ၇၆ နှစ်အရွယ် ဦးအောင်ထွန်းတို့ ဖြစ်ကြပါတယ်။
တိုက်ပွဲဖြစ်တာမရှိဘဲ လေကြောင်းကနေ သုံးကြိမ်ဗုံးကြဲခဲ့လို့ အရပ်သားတွေ ထိခိုက်သေဆုံးရတာလို့ ဒေသခံတစ်ဦးက ပြောပါတယ်။
“တိုက်ပွဲမရှိဘူး။ စစ်ကောင်စီတပ်က လေယာဉ်ဂျက်ဖိုင်တာနဲ့ သုံးကြိမ် ဗုံးကြဲတယ်။ ထရွန်အိုင် အထက်ဈေးတန်းမှာ ကြဲသွားတာ ငါးဦး သေတယ်။ သေတဲ့သူတွေက အမျိုးသမီးနှစ်ဦးနဲ့ အမျိုးသားသုံးဦး”
ဒီတိုက်ခိုက်မှုမှာ နေအိမ်တစ်လုံးနဲ့ ဈေးဆိုင်ခန်းတစ်ခုလည်း ပျက်စီးခဲ့တယ်လို့ သူကဆိုပါတယ်။
ဒီအခြေအနေနဲ့ပတ်သက်လို့ တုံ့ပြန်ချက်ရနိုင်ဖို့ စစ်ကောင်စီရဲ့ ချင်းပြည်နယ်ပြောခွင့်ရသူ ပြည်နယ်အတွင်းရေးမှူး ဦးအောင်ချိုကို RFA က တယ်လီဖုန်းနဲ့ဆက်သွယ်မေးမြန်းခဲ့ပေမဲ့ လက်ခံဖြေဆိုတာ မရှိပါဘူး။
ထရွန်အိုင်ရွာဟာ စစ်ကောင်စီတပ်ရဲ့ ဗျူဟာကုန်းစခန်း တည်ရှိတဲ့နေရာဖြစ်ပြီး ပြီးခဲ့တဲ့ ၂၀၂၃ ခုနှစ်၊ ဒီဇင်ဘာလ ၄ ရက်နေ့မှာ ရက္ခိုင့်တပ်တော် AA က သိမ်းယူခဲ့တာလည်း ဖြစ်ပါတယ်။
RFA က ပြုစုထားတဲ့စာရင်းအရ စစ်ကောင်စီတပ်ရဲ့ လေကြောင်းနဲ့ လက်နက်ကြီးကြောင့် ၂၀၂၄ ခုနှစ်၊ ဇန်နဝါရီကနေ ဧပြီလအထိ လေးလအတွင်းမှာ သေဆုံးသူ ၅၁၄ ဦးရှိခဲ့ပြီး ဒဏ်ရာရသူက ၁၁၅၂ ဦးအထိ ရှိခဲ့ပါတယ်။
