ရခိုင်ပြည်နယ်၊ ဘူးသီးတောင်နဲ့ မြောက်ဦးမြို့နယ်မှာ ဒီဇင်ဘာ ၂၈ ရက် တစ်ရက်တည်းမှာတင် စစ်ကောင်စီတပ်ရဲ့ လက်နက်ကြီးနဲ့ လေကြောင်း တိုက်ခိုက်မှုကြောင့် ရိုဟင်ဂျာ ဆယ်ဦး သေဆုံးပြီး၊ ၁၇ ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။
ဘူးသီးတောင်မြို့နယ်၊ စေတီတောင်ရွာမှာ ဒီဇင်ဘာ ၂၈ ရက် ည ၉ နာရီခန့်က စစ်ကောင်စီ တပ်စခန်းကနေ ပစ်ခတ်လိုက်တဲ့ လက်နက်ကြီးကျည် ကျရောက်ပေါက်ကွဲပြီး နေအိမ်မှာ အိပ်ပျော်နေတဲ့ ရိုဟင်ဂျာ ကလေးသုံးဦး အပါအဝင် တစ်မိသားစုတည်းကနေ မိသားစုဝင် ခြောက်ဦး သေဆုံးခဲ့ပါတယ်။ နောက်ထပ် မိသားစုဝင် တစ်ဦး ဒဏ်ရာ အပြင်းအထန် ရရှိခဲ့တယ်လို့ ရွာသားတွေက ပြောပါတယ်။
သေဆုံးသူတွေဟာ အသက် ၆၀ အရွယ် ဦးဇာဖောရ်၊ အသက် ၁၉ နှစ်အရွယ် မောင်အာန်ဆာရ်အူလာ၊ အသက် ငါးနှစ်အရွယ် မောင်ဆော့ယောဒ်အာမိန့်၊ အသက် သုံးနှစ်အရွယ် မောင်နိုရိုလ်အာမိန်၊ အသက် ၁၁ နှစ်အရွယ် မောင်ဟာလယာနဲ့ အသက် နှစ်ဆယ်အရွယ် မတောစ်မီနာရာတို့ ဖြစ်ပါတယ်။
လက်နက်ကြီးကြောင့် သူတို့ရဲ့နေအိမ် မီးလောင်ပျက်စီးခဲ့သလို အိမ်သားတွေလည်း ကျည်ထိမှန်ရုံမက မီးလောင် သေဆုံးခဲ့တယ်လို့ လုံခြုံရေးအရ အမည်မဖော်လိုတဲ့ စေတီတောင်ရွာခံ ရိုဟင်ဂျာတစ်ဦးက RFA ကို ဒီနေ့မနက်ပိုင်းက ပြောပါတယ်။
“မနေ့ည (ကြာသပတေးည) က ရွာထဲကို လက်နက်ကြီး သုံးလုံးကျပါတယ်။ တစ်လုံးက နေအိမ်ပေါ် တိုက်ရိုက်ကျတယ်။ အိမ်မှာ အိပ်နေတဲ့ မိသားစု ခြောက်ယောက်လုံး သေသွားပါတယ်။ အိမ်လည်း မီးလောင်သွားတယ်။ အလောင်းတွေလည်း မီးလောင်သွားပါတယ်။ ဒဏ်ရာရတဲ့ တစ်ယောက်ကတော့ ကယ်ဖို့လုပ်တုန်း ဒဏ်ရာရသွားတာပါ”
အဲဒီလက်နက်ကြီးကျည်ဆန်ဟာ ဘူးသီးတောင်မြို့နယ်၊ သုံးဆယ့်တစ်ဘုံ စေတီကုန်းမှာ တပ်စွဲထားတဲ့ စစ်ကောင်စီ တပ်စခန်းကနေ ပစ်ခတ်ခဲ့တာလို့လည်း သူက ပြောပါတယ်။
စေတီတောင် ရိုဟင်ဂျာရွာမှာ အိမ်ခြေ ခြောက်ဆယ်ကျော်၊ လူဦးရေ သုံးရာကျော်ရှိတယ်လို့ ဒေသခံတွေက ပြောပါတယ်။
သေဆုံးထိခိုက်မှုတွေကြောင့် ရွာသူ၊ ရွာသား အားလုံး စိုးရိမ်ထိတ်လန့်နေပေမယ့် ရိုဟင်ဂျာ မွတ်စလင်တွေဟာ အစကတည်းက ရခိုင်ပြည်နယ်အတွင်းမှာတောင် လွတ်လပ်စွာ သွားလာပြောင်းရွှေ့ခွင့် မရတာကြောင့် အခုလို အသက်ဘေးကြုံရချိန်မှာ ပြေးစရာနေရာမရှိဘဲ ရွာမှာပဲ ဆက်လက် နေထိုင်ရတယ်လို့ ဒေသခံတွေက ပြောပါတယ်။
အလားတူ ဒီဇင်ဘာ ၂၈ ရက် တစ်ရက်တည်းမှာပဲ မြောက်ဦးမြို့နယ်က ကိုင်းတော၊ ဘူးတစ်လုံး၊ ပေါင်းတုတ် စတဲ့ ရိုဟင်ဂျာရွာတွေကို စစ်ကောင်စီတပ်က လက်နက်ကြီးနဲ့ ပစ်ခတ်ခဲ့သလို လေကြောင်းကနေပါ တိုက်ခိုက်ခဲ့တဲ့အတွက် ရိုဟင်ဂျာ လေးဦးသေဆုံးပြီး၊ ၁၆ ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။
ကိုင်းတောရွာမှာ ရိုဟင်ဂျာအမျိုးသား နှစ်ဦးသေဆုံးပြီး ၁၁ ဦး ဒဏ်ရာရခဲ့တာပါ။ ဘူးတစ်ဦးရွာမှာလည်း ရိုဟင်ဂျာ အမျိုးသမီးတစ်ဦး သေဆုံးပြီး၊ နောက်ထပ် အမျိုးသားတစ်ဦး ဒဏ်ရာရခဲ့ပါတယ်။ ပေါင်းတုတ်ရွာမှာတော့ ရိုဟင်ဂျာ အမျိုးသမီးတစ်ဦး သေဆုံးပြီး၊ နောက်ထပ် အမျိုးသားလေးဦး ဒဏ်ရာရခဲ့တာလို့ ဆိုပါတယ်။
မြောက်ဦးမြို့နယ် မြောင်းဘွေရဲစခန်းကို ရက္ခိုင့်တပ်တော် (AA) က ဒီဇင်ဘာ ၂၈ ရက် မနက်ပိုင်းက တိုက်ခိုက်ခဲ့တဲ့အတွက် မြောက်ဦးနဲ့ မင်းပြားမှာရှိတဲ့ စစ်ကောင်စီ တပ်စခန်းတွေကနေ ကျေးရွာတွေဘက်ကို လက်နက်ကြီးနဲ့ ပစ်ခတ်ခဲ့သလို လေကြောင်းကနေပါ တိုက်ခိုက်ခဲ့တယ်လို့ လုံခြုံရေးအရ အမည်မဖော်လိုတဲ့ ဒေသခံတစ်ဦးက RFA ကို ဒီနေ့ မနက်ပိုင်းက ပြောပါတယ်။
“မနေ့က AA က မြောင်းဘွေ ရဲစခန်းကို ဝင်တိုက်တယ်လေ။ အဲဒီမှာ စစ်ကောင်စီတပ်က လက်နက်ကြီးတွေရော၊ လေယာဉ်နဲ့ရော လာပစ်တာပါ။ အနီးအနား ရွာတွေကို ပစ်တဲ့အချိန်မှာ အခုလို သေဆုံး ဒဏ်ရာရသွားတာ။ နေအိမ်တွေလည်း မီးလောင်သွားပါတယ်။ မြောက်ဦးဘက်ကရော၊ မင်းပြားဘက်ကရော လက်နက်ကြီးတွေနဲ့ ပစ်တယ်။ ဂျက်လေယာဉ်တွေနဲ့လည်း လာပစ်ပါတယ်”
ရက္ခိုင့်တပ်တော် (AA) ကတော့ စစ်ကောင်စီတပ်ဟာ အရပ်သားတွေရှိတဲ့ မြို့ရွာတွေကို ရည်ရွယ်ချက်ရှိရှိ လက်နက်ကြီးနဲ့ပစ်၊ လေကြောင်း တိုက်ခိုက်မှုတွေ လုပ်နေတာလို့ ဒီဇင်ဘာ ၂၈ ရက်ညပိုင်းက ထုတ်ပြန်ထားပါတယ်။
စစ်ကောင်စီကတော့ ဒီဇင်ဘာလ ၂၈ ရက်နေ့က မြောက်ဦးမြို့နယ် မြောင်းဘွေကျေးရွာအနီး ပတ်ဝန်းကျင်ကို တပ်မတော်က လေကြောင်းကနေ ပစ်ခတ်တိုက်ခိုက်တယ်ဆိုတာ ကောလာဟလသာဖြစ်ပြီး အဲဒီနေ့မှာ လေကြောင်း တိုက်ခိုက်တာတွေမရှိဘူးလို့ ဒီနေ့ ညနေပိုင်းမှာ စစ်ကောင်စီ ထိန်းချုပ်ထားတဲ့ နိုင်ငံပိုင်ရုပ်သံတွေကနေတစ်ဆင့် တုံ့ပြန်ပါတယ်။
မြောင်းဘွေ ရဲစခန်းနေရာကို အေအေ အဖွဲ့က ဒရုန်းအသုံးပြုပြီး အဝေးကနေ လာရောက်တိုက်ခိုက်စဉ် လုံခြုံရေးတပ်ဖွဲ့ဝင်တွေက ဒရုန်းခွင်း သေနတ်တွေနဲ့ တန်ပြန် အသုံးပြုတိုက်ခိုက်ရာမှာ ဒရုန်းဗုံးသီးတွေက ပတ်ဝန်းကျင်ရွာတွေအနီးမှာ ကျရောက်ခဲ့တာလို့လည်း ထုတ်ပြန်ချက်မှာ ဖော်ပြပါတယ်။ ဒါပေမဲ့ ဘူးသီးတောင်မြို့နယ် စေတီတောင်ကျေးရွာမှာ ရိုဟင်ဂျာတွေ ထိခိုက်သေဆုံးတဲ့ ကိစ္စနဲ့ပတ်သက်လို့ ထုတ်ပြန်ချက်မှာ တစ်စုံတစ်ရာ ဖော်ပြထားတာ မရှိပါဘူး။ ဒီကိစ္စနဲ့ ပတ်သက်လို့ စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကို RFA က ဖုန်းခေါ်ခဲ့ပေမယ့် လက်ခံဖြေဆိုခြင်း မရှိပါဘူး။
RFA က ပြုစုထားတဲ့ စာရင်းတွေအရ ရခိုင်ပြည်နယ်မှာ စစ်ကောင်စီတပ်နဲ့ ရက္ခိုင့်တပ်တော် (AA) တို့ တိုက်ပွဲစတင်တဲ့ ဒီဇင်ဘာ ၁၃ ရက်ကနေ ဒီဇင်ဘာ ၂၉ ရက် ဒီနေ့အထိ တစ်လကျော်အတွင်း သေဆုံးတဲ့ အရပ်သား အယောက် လေးဆယ်နဲ့ ဒဏ်ရာရသူ တစ်ရာကျော် ရှိသွားပါပြီ။
