အင်းစိန်အကျဉ်းထောင်မှာ နှစ်ရှည်ထောင်ဒဏ်ချမှတ်ခံထားရတဲ့ အသက် ၂၁ နှစ်အရွယ် နိုင်ငံရေးအကျဉ်းသား ကိုမင်းဟိန်းခန့် (ခေါ်) အားကျယ်ဟာ နှလုံးရောဂါနဲ့ စက်တင်ဘာလ ၂၄ ရက်က သေဆုံးသွား တယ်လို့ မိသားစုနဲ့ နီးစပ်သူတွေက RFA ကို ပြောပါတယ်။
ထောင်အာဏာပိုင်တွေက ကိုမင်းဟိန်းခန့် သေဆုံးသွားတဲ့အကြောင်းကို မနေ့ ညနေပိုင်းမှာ မိသားစုဝင်တွေကို အကြောင်းကြားခဲ့တာဖြစ်ပြီး ဒီနေ့မှာတော့ မိသားစုဝင်တွေ ရုပ်အလောင်းကိုတွေ့ရဖို့ အင်းစိန်ထောင်ကို လိုက်သွားကြတယ်လို့ ဆိုပါတယ်။
အဖမ်းမခံရခင်မှာ ကိုမင်းဟိန်းခန့်က ကျန်းကျန်းမာမာဖြစ်ပေမယ့် ဖမ်းဆီးခံရပြီး စစ်ကြောရေးမှာ ပြင်းပြင်းထန်ထန် နှိပ်စက်ခံခဲ့ရသလို ထောင်ထဲရောက်မှ ရခဲ့တဲ့ နှလုံး ရောဂါအတွက်လည်း လုံလောက်တဲ့ ဆေးကုသခွင့်မရခဲ့ဘူးလို့ မိသားစုနဲ့ နီးစပ်သူတစ်ဦးက ပြောပါတယ်။
“သူ နှလုံးရောဂါဖြစ်တာ သိတာက ငါးလပိုင်းမှာပေါ့နော်။ သူ မူးလဲတော့ ထောင်ဆေးရုံ ကိုရောက်တယ်။ အဲဒီမှာ ဆရာဝန်တွေ စစ်ဆေးကြည့်တော့ နှလုံးရောဂါဖြစ်နေတာ သိရတယ်။ ဒါပေမဲ့ သူ ထောင်က ထွက်မှပဲ အထူးကုနဲ့ပြဖို့ ပြောတယ်။ ထောင်ထဲမှာက ဘာမှမရှိဘူးလေ။ လောလောဆယ် ဆေးစာ ရေးပေးတယ်ပေါ့နော်။ ဩဂုတ်လထဲမှာ တစ်ခါ မူးလဲတယ်။ ဖြစ်တဲ့နေ့ မနေ့ကလည်း အကောင်းကြီးကနေ မူးလဲပြီး ဆုံးသွားတာ လို့ ကြားတယ်။ အဓိကတော့ ထောင်ထဲမှာဆိုတော့ ဆေးကောင်းကောင်းကုလို့မရဘူး ပေါ့နော်”
ကိုမင်းဟိန်းခန့်ဟာ ပုဇွန်တောင် နဲ့ ဗိုလ်တထောင်မြို့နယ် လူငယ်များသပိတ်ကော်မတီ (PBYSC) ရဲ့ အဖွဲ့ဝင်တစ်ဦး ဖြစ်ပြီး ၂၀၂၁ ခုနှစ် နိုဝင်ဘာလ ၁ ရက်မှာ ဖမ်းဆီးခံခဲ့ရတာပါ။ သူ့ကို ရာဇသတ်ကြီးပုဒ်မ ၅၀၅ (က) အပါအဝင် ပေါက်ကွဲစေတတ်သောဝတ္တုပစ္စည်းများ အက်ဥပဒေ၊ အကြမ်းဖက်မှုတိုက်ဖျက်ရေးဥပဒေတွေနဲ့ ထောင်ဒဏ် ၂၇ နှစ် ချမှတ်ထား ပါတယ်။
နေပြည်တော် ဗုဗ္ဗသီရိမြို့နယ် အမျိုးသားဒီမိုကရေစီအဖွဲ့ချုပ် (NLD) ပါတီဝင် ဦးခင်မောင်တင့်လည်း ရမည်းသင်းထောင်မှာ အကျဉ်းကျနေတုန်း ကျန်းမာရေးဆိုးရွားလာ လို့ ထောင်အပြင်ဆေးရုံကို ထုတ်ပြီး ဆေးကုသမှုခံယူရင်း၂၀၂၃ ခုနှစ် မတ်လ ၇ ရက်မှာ သေဆုံးခဲ့ပါတယ်။
အခုလို နိုင်ငံရေးအကျဉ်းသားတွေ အကျဉ်းထောင်တွင်း ကျန်းမာရေးစောင့်ရှောက်မှု အလုံအလောက်မရတာနဲ့ ပတ်သက်လို့ မိသားစုဝင်တွေနဲ့ ဒီမိုကရေစီအရေးလှုပ်ရှားသူ တွေက စိုးရိမ်နေပါတယ်။
ဒီကိစ္စနဲ့ပတ်သက်လို့ စစ်ကောင်စီအကျဉ်းဦးစီးဌာနကို RFA က ဖုန်းနဲ့ဆက်သွယ်မေးမြန်းခဲ့ ပေမယ့် အကြောင်း မပြန်ပါဘူး။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ရဲ့ စက်တင်ဘာလ ၂၂ ရက်နေ့ထိ စာရင်းတွေအရ အာဏာသိမ်းပြီးနောက် နိုင်ငံတစ်ဝန်းက ဒီမိုကရေစီရေး လှုပ်ရှားသူနဲ့ ပြည်သူ ၁၉,၂၆၀ ဦး ဖမ်းဆီးထိန်းသိမ်းခံထားရပြီး အဲဒီအထဲက ၇၃၆၄ ဦး ထောင်ဒဏ်ချမှတ်ခံထားရပါတယ်။
