စစ်ကိုင်းတိုင်း၊ ယင်းမာပင်မြို့နယ်၊ ချင်းတွင်းမြစ်ကမ်းဘေးကျေးရွာများကို ယနေ့ (ဇူလိုင် ၃၁) နံနက်မှစပြီး စစ်ကြောင်းထိုးနေသဖြင့် စုန်းချောင်းရွာအပါအဝင် အနီးအနား ကျေးရွာများမှ ထောင်နှင့်ချီသည့် ဒေသခံများ ဘေးလွတ်ရာ ထွက်ပြေး တိမ်းရှောင်နေရသည်။
ပြီးခဲ့သည့် ဇူလိုင် ၂၁ ရက်တွင် စုန်းချောင်းရွာအနီး ရွှေတောင်ဦးကုန်း၌ တပ်စွဲထားသည့် စစ်ကောင်စီတပ်ဖွဲ့ဝင်များက ရွာကို တိတ်တဆိတ်ဝင်ရောက် စီးနင်းပြီး ကျေးရွာ ပကဖ၊ ပအဖ အဖွဲ့ဝင်များ အပါအဝင် ၁၄ ဦးကို နှိပ်စက် ညှဉ်းပန်းသတ်ဖြတ်ခဲ့သည်ဟု သိရသည်။
ထိုစီးနင်းမှုအပြီး ဆယ်ရက်ခန့်အကြာ စုန်းချောင်းရွာနှင့် အနီးအနားကျေးရွာများကို တစ်ကျော့ပြန် စစ်ကြောင်းထိုးလာခြင်းဖြစ်သည်။
အိမ်ခြေ တစ်ထောင်ကျော်ရှိသည့် စုန်းချောင်းရွာမှ ဒေသခံများမှာ ထိုစဉ်ကတည်းက ထွက်ပြေးတိမ်းရှောင်ခဲ့ကြကြောင်း၊ နေ့အချိန် ရွာအတွင်း ခေတ္တပြန်ဝင်သည့် ဒေသခံတချို့မှာ ယနေ့ စစ်တပ်စီးနင်းမှုကြောင့် ထွက်ပြေးခဲ့ရကြောင်း ရွာခံတစ်ဦးက ပြောသည်။
“နေ့ခင်းတော့ ဝင်လို့ရ…ညဘက်မှာ ပြန်မအိပ်ရဲသေးဘူး။ ဒီနေ့ (စစ်တပ်) ဝင်လာတော့ အကုန်ပြန်ပြေးကြရပြီ။ ဒုတိယအကြိမ် ပြန်ပြေးရတာပေါ့” ဟု လုံခြုံရေးအရ အမည်မဖော်လိုသည့် စုန်းချောင်းရွာမှ အဆိုပါ အမျိုးသားက ပြောသည်။
ယနေ့ နံနက်က အနောက်မြောက်ပိုင်းစစ်ဌာနချုပ် (နမခ) မှ ထွက်လာသည့် စစ်ကောင်စီတပ်ဖွဲ့ဝင်များသည် ရွှေတောင်ဦးကုန်းမှတစ်ဆင့် ချင်းတွင်းမြစ်ကမ်းဘေးကျေးရွာများဖြစ်သည့် စုန်းချောင်းရွာ၊ ကပ်လျက်ရှိ သံပိုရွာနှင့် စေသူရွာတို့ကို အင်အား ၃ ဖွဲ့ခွဲပြီး စစ်ကြောင်းထိုးလာခြင်းဖြစ်သည်။
ထိုအခြေအနေကြောင့် ချင်းတွင်းမြစ်ကမ်းဘေးကျေးရွာများဖြစ်သည့် စုန်းချောင်း၊ စည်သူ၊ သံပို၊ ပန်းတိမ်ပြင်၊ ကျောက်မှော် စသည့် ကျေးရွာများမှ ဒေသခံ ၅၀၀၀ ထက်မနည်း ဘေးလွတ်ရာ ထွက်ပြေးနေရသည်ဟု စစ်ရှောင်အရေးကူညီနေသူများထံမှ သိရသည်။
ယနေ့ နံနက်ပိုင်း မုံရွာမြို့၊ စစ်ပင်ဆိပ်ကမ်းမှ စတင်ထွက်ခွာလာသည့် စစ်သင်္ဘော ၂ စီး ဦးဆောင်ပြီး ဖလက်ခွံ ၇ စီးပါ စစ်ကောင်စီ ထောက်ပို့ရေယာဉ်အုပ်စုကို အကာအကွယ်ပေးရန် ရည်ရွယ်ပြီး ချင်းတွင်းမြစ်ကမ်းဘေးကျေးရွာများကို စစ်ကြောင်းထိုးခြင်း ဖြစ်နိုင်ကြောင်း ဒေသခံများက သုံးသပ်သည်။
ချင်းတွင်းမြစ်ကြောင်းအတိုင်း ဆန်တက်လာသည့် ထိုရေယာဉ်အုပ်စုမှာ စစ်ကောင်စီတပ်နှင့် ဒေသကာကွယ်ရေးအဖွဲ့များ စစ်ရေးတင်းမာနေသည့် စစ်ကိုင်းတိုင်းအထက်ပိုင်းသို့ ဦးတည်နေကြောင်း ဒေသခံများက ပြောသည်။
“ဟုမ္မလင်း၊ မော်လိုက်ဘက်အထိ ပို့မယ့်ရိက္ခာ၊ ခဲယမ်းလက်နက်တွေ ဖြစ်မယ်လို့ ယူဆရတယ်။ ဒီနေ့မနက် ကုန်းကြောင်းက စစ်ကြောင်းထိုးတော့ မြစ်ကမ်းဘေးက စေသူရွာကို သေနတ်တွေ ပစ်ဖောက်ပြီး ဝင်တယ်။ ကာကွယ်ရေးအဖွဲ့တွေက တိုက်ခိုက်မှာစိုးလို့ မြေပြင်စစ်ကြောင်းကလည်း ရေကြောင်းနဲ့အပြိုင် တက်မဲ့သဘော ရှိတယ်” ဟု ယင်းမာပင်မြို့နယ်မှ အသက် ၃၀ ခန့်အရွယ် ဒေသခံအမျိုးသားတစ်ဦးက ပြောသည်။
စစ်ရေယာဉ်အုပ်စု၏ ရှေ့ပြေးအမြန်ရေယာဉ် (Speed Boat) နှစ်စီးမှာ ကျောက်မှော်ကျေးရွာအနီး ကမ်းကပ်ထားကြောင်း ဒေသခံများထံမှ သိရသည်။
တော်လှန်ခုခံမှုအားကောင်းရာ စစ်ကိုင်းတိုင်းတွင် မိုင်းဆွဲတိုက်ခိုက်ခြင်း၊ ကြားဖြတ် ချုံခိုတိုက်ခိုက်ခြင်းတို့နှင့် ရင်ဆိုင်နေရသည့် စစ်ကောင်စီတပ်ဖွဲ့သည် ယခင်ကလည်း စစ်ကိုင်းတိုင်းအထက်ပိုင်းမြို့နယ်များသို့ လက်နက်ခဲယမ်း ပို့ဆောင်ရန်အတွက် ချင်းတွင်းမြစ်ကြောင်းကို အသုံးပြုဖူးသည်ဟု သိရသည်။
ချင်းတွင်းမြစ်ကမ်းတစ်လျှောက် ကြိုတင်နေရာယူထားသည့် ဒေသကာကွယ်ရေးအဖွဲ့များကလည်း စစ်ရေယာဉ်အုပ်ကို စောင့်ကြိုတိုက်ခိုက်လေ့ရှိရာ စစ်ကောင်စီတပ်ကလည်း မြစ်ကမ်းဘေးကျေးရွာများကို စစ်ကြောင်းထိုးလေ့ရှိသည်။
စစ်တပ် အာဏာသိမ်းပြီးနောက် နှစ်နှစ်ကျော်ကာလအတွင်း ပဋိပက္ခများနှင့် မလုံခြုံမှုများကြောင့် နိုင်ငံတစ်ဝန်း ပြည်သူ ၁ ဒသမ ၆ သန်းကျော် နေရပ်စွန့်ခွာထွက်ပြေး တိမ်းရှောင်နေရသည်ဟု ကုလသမဂ္ဂလူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ဇူလိုင်အတွင်း ထုတ်ပြန်ထားသည်။
