စစ်ကိုင်းတိုင်း၊ ဆားလင်းကြီးမြို့နယ် အနောက်ဘက်ခြမ်းကို စစ်ကောင်စီတပ်က စစ်ကြောင်း ထိုးနေတဲ့အတွက် ကျေးရွာ ၂၅ ရွာက အရပ်သားရှစ်ထောင်ကျော် အိုးအိမ်စွန့်ခွာ ထွက်ပြေးနေရတယ်လို့ ဒေသခံတွေက ပြောပါတယ်။
စစ်ကောင်စီတပ် အင်အားတစ်ရာနီးပါးရှိတဲ့ စစ်ကြောင်းနှစ်ကြောင်းနဲ့ ဇူလိုင်လ ၂၁ ရက်ကစလို့ ဒီကနေ့ ဇူလိုင် ၂၃ ရက်အထိ နယ်မြေရှင်းလင်းရေး လုပ်နေတာပါ။
ရွှေလှေ၊ လက်ပံတောင်း၊ ရွာသစ်ကလေး၊ ဝဲကြီး၊ ဝဲကွဲ၊ တုံတောကျောင်း၊ တုံအလယ်ရွာ၊ တုံရွာမ၊ တုံရွာသစ်၊ တုံထန်းတော၊ တုံအလယ်တော၊ နတ်ကျွန်း၊ နတ်စက်၊ သဲကောကြီး၊ လယ်တီ၊ ရွှေကုန်း၊ ပေါင်းဝ၊ ဆားခါး၊ ခွန်သာ၊ ညောင်ပင်ကိုင်း၊ သံလျက်ကိုင်း၊ အောင်ချမ်းသာ၊နှောကူးတို့၊ ထန်းပု၊ ထန်းဇင်စတဲ့ ရွာက ဒေသခံတွေ ထွက်ပြေးနေရပါတယ်။
ဆားလင်းကြီးမြို့နယ်အတွင်း မိုးအဆက်မပြတ်ရွာနေလို့ အိုးအိမ်စွန့်ခွာသူတွေအတွက် တိမ်းရှောင်စရာနေရာလည်း အခက်အခဲဖြစ်နေတယ်လို့ ဒေသခံတစ်ဦးက ပြောပါတယ်။
“အရင်တုန်းတော့ စစ်ကြောင်းလွတ်ရာ ဘယ်နေရာမဆို ရှောင်လို့ရပေမယ့် အခုကြ မိုးကလည်း အရမ်းရွာ ချင်းတွင်းရေကလည်း တက်တော့ မိုးရေစို တစ်ပိုင်းနဲ့ စစ်ရှောင်နေကြရတယ်။ တချို့တွေဆို ထမင်းတောင် မစားကြရဘူး။ စားစရာလည်း မရှိကြ၊ ချက်လို့ပြုတ်လို့ မရဘူး၊ ဘုရားကြို၊ ဘုရားကြားတွေ အကာအကွယ်ရှိတဲ့ နေရာလေးတွေမှာ အုပ်စုလိုက် ရှောင်နေကြရတာပေါ့”
လက်ရှိမှာ အမိုးအကာနဲ့ အသင့်စား စားနပ်ရိက္ခာတွေ လိုအပ်နေတယ်လို့ ဒေသခံတွေက ပြောပါတယ်။
စစ်ကြောင်းဝင်ရောက်တဲ့ ရွာတွေမှာ နေအိမ်မီးရှို့ဖျက်ဆီးခံရတာတွေ ရှိပေမယ့် ရွာထဲ ပြန်မဝင်နိုင်သေးတဲ့အတွက် အရေအတွက် တိတိကျကျ မသိရသေးဘူးလို့ ဒေသခံတွေက ပြောပါတယ်။
ဒီကိစ္စနဲ့ပတ်သက်လို့ စစ်ကောင်စီရဲ့ စစ်ကိုင်းတိုင်းပြောခွင့်ရသူ ဦးစောနိုင်ကို RFA က ဖုန်းနဲ့ ဆက်သွယ်ခဲ့ပေမယ့် လက်ခံဖြေဆိုတာ မရှိပါဘူး။
ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးရုံး (UNOCHA) ရဲ့ ဇူလိုင်လ ၁၅ ရက်က ထုတ်ပြန်တဲ့ အစီရင်ခံစာအရ စစ်အာဏာသိမ်းပြီးနောက်ပိုင်း ပဋိပက္ခတွေကြောင့် နေရပ်စွန့်ခွာထွက်ပြေးခဲ့ရသူ တစ်ဒသမ ခြောက်သန်း နီးပါးရှိလာပါတယ်။ အဲဒီထဲက စစ်ဘေးဒုက္ခသည် ၇၇၈၉၀၀ ဟာ စစ်ကိုင်းတိုင်းက ဖြစ်ပါတယ်။
