ကချင်လွတ်မြောက်ရေးတပ်မတော် (KIA) ဌာနချုပ်ရှိရာ ကချင်ပြည်နယ်၊ လိုင်ဇာမြို့ အနီးက နမ်ဆန်ယန်ရွာနားမှာ ဇူလိုင်လ ၃ ရက် မနက် ၅ နာရီလောက်ကစလို့ KIA နဲ့ စစ်ကောင်စီတပ်တို့ တိုက်ပွဲဖြစ်နေလို့ ဒေသခံ ငါးရာလောက် ဘေးလွတ်ရာကို ရုတ်တရက် တိမ်းရှောင်နေရတယ်လို့ ဒေသခံတွေက ပြောပါတယ်။
KIA တပ်က နေရာယူထားတဲ့ ဌာနချုပ် လိုင်ဇာမြို့နဲ့ ငါးမိုင်ကျော်အကွာက နမ်ဆန်ယန်ရွာ ဘက်ကို စစ်ကောင်စီတပ်က ဝင်ရောက်လာတဲ့နောက် တိုက်ပွဲဖြစ်ပွားခဲ့တာလို့ နမ်ဆန်ယန်ဒေသခံတစ်ဦးက ပြောပါတယ်။
“တိုက်ပွဲက ဒီနေ့မနက်က စဖြစ်လာတာ။ လက်နက်ကြီးတွေလည်း တောက်လျှောက် ပစ်ကြတယ်။ ရွာထဲမှာ မဖြစ်သေးပေမယ့် လက်နက်ကြီးတွေ ပစ်တော့ လာထိမှာ ကြောက်လို့ ကျေးရွာဒေသခံတွေကလည်း တချို့က ထွက်ပြေးကြတယ်။ တချို့က အခြေအနေစောင့်ကြည့်နေသေးတယ်။ အများပိုင်းကတော့ ပစ္စည်းတွေထုတ်ပြီး ရွှေ့ထားကြပြီ”
လက်ရှိတိုက်ပွဲဖြစ်ပွားနေတဲ့အတွက် မြစ်ကြီးနား-ဗန်းမော် ကားလမ်းပိုင်းကို ယာယီ ပိတ်ထားတယ်လို့လည်း ဒေသခံ ယာဉ်မောင်းတစ်ဦးက ပြောပါတယ်။
KIO သတင်းနဲ့ ပြန်ကြားရေးတာဝန်ခံ ဗိုလ်မှူးကြီး နော်ဘူက အခုမနက် ၅ နာရီလောက် ကနေ လက်နက်ကြီးတွေနဲ့ အပြန်အလှန် ပစ်ခတ်ကြတာဖြစ်ပြီး အသေးစိတ်ကိုတော့ မသိရသေးဘူးလို့ ပြောပါတယ်။
စစ်ကောင်စီရဲ့ ကချင်ပြည်နယ်ပြောရေးဆိုခွင့်ရှိသူ ပြည်နယ် လူမှုရေးဝန်ကြီး ဦးဝင်းရဲထွန်းကို RFA ဆက်သွယ်ခဲ့ပေမယ့် ဆက်သွယ်လို့မရသေးပါဘူး။
နမ်ဆန်ယန်ရွာဟာ မြစ်ကြီးနား-ဗန်းမော် လမ်းပေါ်မှာရှိတဲ့ကျေးရွာဖြစ်ပြီး တစ်ကျော့ပြန် ကချင်စစ်ပွဲအပြီး နေရပ်ပြန်လာသူတွေ၊ ဈေးလာရောင်းသူတွေနဲ့ နေရပ်အပြီး မပြန်သေးပေမယ့် တောင်ယာ၊ လယ်ယာ လာလုပ်ရင်းနေထိုင်တဲ့ စစ်ဘေးဒုက္ခသည်စတဲ့ လူဦးရေ တစ်ထောင်ခန့် နေထိုင်တဲ့ ရွာတစ်ရွာဖြစ်ပါတယ်။
ပြီးခဲ့တဲ့ ဇွန်လ ၁၆ ရက်နေ့ကလည်း နမ်ဆန်ယန်ရွာနားမှာ တိုက်ပွဲဖြစ်ပွားခဲ့ပြီး စစ်ကောင်စီတပ်ရဲ့ လက်နက်ခဲယမ်းအချို့ကို KIA က သိမ်းဆည်းခဲ့တယ်လို့ KIA တပ်ဖွဲ့ဝင်တွေက ပြောပါတယ်။
ကချင်ပြည်နယ် ဝိုင်းမော်မြို့နယ် ဝိုင်းမော် – ကန်ပိုင်တည်လမ်းပေါ်က လဂတ်ကောင်ရွာ နားမှာလည်း စစ်ကောင်စီတပ်နဲ့ ကေအိုင်အေတို့ကြား ဇူလိုင်လ ၁ ရက်နေ့က တိုက်ပွဲ ဖြစ်ပွားခဲ့ပါတယ်။
