စစ်ကိုင်းတိုင်း၊ ဝက်လက်မြို့နယ် အောင်ချမ်းသာရွာကို ဧပြီလ ၂၃ ရက် ဒီနေ့ နေ့လယ် ၂ နာရီဝန်းကျင်မှာ အင်အား ၆၀ ကျော်ရှိတဲ့ စစ်ကြောင်း ဝင်ရောက်မီးရှို့တာကြောင့် နေအိမ် ၁၄၀ ဝန်းကျင် မီးလောင် ပျက်စီးပြီး ဒေသခံ တစ်ထောင်ကျော် အိုးအိမ်စွန့်ခွာထွက်ပြေး နေရတယ်လို့ ဒေသခံတွေက ပြောပါတယ်။
အောင်ချမ်းသာရွာဟာ ဒုတိယအကြိမ်မြောက် မီးရှို့ခံရတာလို့ လုံခြုံရေးအရ အမည်မဖော် လိုတဲ့ ဒေသခံတစ်ဦးက RFA ကို ပြောပါတယ်။
“အိမ်ခြေအကုန်လုံးရှိတာက ၂၇၀ လောက်ရှိတယ်။ အရင်က ၁၀၉ အိမ်ရှို့ခံရတာ ဆိုတော့ အခုက ၁၄၀ ဝန်းကျင်လောက် ရှို့သွားတယ်။ ဘာမှ မကျန်တော့ဘူး။ တစ်ရွာလုံးကုန်သလောက်ပဲ”
အောင်ချမ်းသာရွာအနီးမှာ ဒီနေ့မနက် ၁၁ နာရီဝန်းကျင်က ဒေသခံကာကွယ်ရေးတပ်တွေနဲ့ တိုက်ပွဲဖြစ်ပြီးနောက် အဲဒီစစ်ကြောင်းကပဲ ရွာထဲက နေအိမ်တွေကို မီးစရှို့တာလို့ ဆိုပါတယ်။
နေအိမ်တွေကိုမီးရှို့ပြီးတာနဲ့ စစ်ကောင်စီတပ်စစ်ကြောင်း ပြန်လည်ထွက်ခွာသွားပေမယ့် ဒေသခံတွေ ရွာထဲ ပြန်မဝင်ရဲကြသေးဘူးလို့ ဒေသခံတစ်ဦးက ပြောပါတယ်။
အခုကိစ္စနဲ့ ပတ်သက်ပြီး စစ်ကောင်စီရဲ့ စစ်ကိုင်းတိုင်းပြောခွင့်ရသူကို RFA က ဖုန်းနဲ့ ဆက်သွယ်မေးမြန်းခဲ့ပေမယ့် လက်ခံဖြေဆိုခြင်းမရှိပါဘူး။
စစ်ကောင်စီပြောခွင့်ရသူ ဗိုလ်ချုပ်ဇော်မင်းထွန်းကတော့ သူတို့တပ်သားတွေဟာ ဒေသခံတွေရဲ့ နေအိမ်တွေကို ဘယ်တော့မှ မီးမရှို့ဘူးလို့ အရင်က RFA ကမေးမြန်းချိန် ငြင်းဆိုထားဖူးပါတယ်။
လွတ်လပ်တဲ့သုတေသနအဖွဲ့တစ်ခုဖြစ်တဲ့ Data For Myanmar ရဲ့ မတ်လ ၁၉ ရက်အထိ စာရင်းအရ စစ်တပ် အာဏာသိမ်းပြီးချိန်ကနေ ၂၀၂၃ ခုနှစ်၊ ဖေဖော်ဝါရီလ ၂၈ ရက်အထိ စစ်ကိုင်းတိုင်းမှာ နေအိမ် ၄၇,၇၇၈ လုံး မီးရှို့ ဖျက်ဆီးခံခဲ့ရပါတယ်။
