မန္တလေးမြို့မှာ အင်္ဂါနေ့က စစ်ကောင်စီတပ်တွေနဲ့ မန္တလေးပြည်သူ့ကာကွယ်ရေးအဖွဲ့ PDF-Mdy တို့ကြား အပြန်အလှန်ပစ်ခတ်ခဲ့တဲ့ သတင်းတွေနဲ့ ပတ်သက်လို့ အကြမ်းဖက်မှု ပုံစံအားလုံးကို ရှုတ်ချကြောင်း ကုလသမဂ္ဂက ပြောကြားလိုက်ပါတယ်။ နယူးရောက် ကုလသမဂ္ဂဌာနချုပ်မှာ အင်္ဂါနေ့က ပြုလုပ်တဲ့ ပုံမှန်သတင်းစာရှင်းလင်းပွဲမှာ အတွင်းရေးမှူးချုပ်ရုံးရဲ့ပြောခွင့်ရ Stephane Dujarric က-
”ဒီကနေ့ ထိတ်လန့်စရာကောင်းတဲ့ မန္တလေးက အကြမ်းဖက်မှုသတင်းကို ကျနော်တို့ ကြားသိ တွေ့မြင်ခဲ့ရပါတယ်။ အကြမ်းဖက်မှု ပုံစံအားလုံးကို ထပ်ပြီး ရှုတ်ချပါတယ်။ဒီမိုကရေစီ၊ ငြိမ်းချမ်းရေး၊ လူ့အခွင့်အရေးနဲ့ တရားဥပဒေစိုးမိုးရေးအတွက်မြန်မာပြည်သူတွေရဲ့လှုပ်ရှားမှုတွေအပေါ် ကုလသမဂ္ဂရဲ့ မဆုတ်မနစ်ထောက်ခံမှုကို ထပ်လောင်းအတည်ပြုပါတယ်။” လို့ပြောသွားပါတယ်။
ဒါအပြင် ကုလသမဂ္ဂအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ် Christine Schraner Burgener ကိုယ်တိုင်လည်း ပြီးခဲ့တဲ့ သီတင်းပတ်က ကုလသမဂ္ဂ အထွေထွေညီလာခံအတွင်း မြန်မာ့အရေးဆွေးနွေးတင်ပြရာမှာ ကြီးမားတဲ့ အကြမ်းဖက်မှုတွေရဲ့ အန္တရာယ်နဲ့ ပတ်သက်လို့သတိပေးခဲ့သလို တတ်နိုင်သမျှ ထိန်းထိန်းသိမ်းသိမ်းလုပ်ဆောင်ကြဖို့လည်း တိုက်တွန်းခဲ့တဲ့အကြောင်း Stephane Dujarric ကသတင်းထောက်တွေကို ပြောကြားခဲ့ပါတယ်။
အလားတူ မန္တလေးမှာဖြစ်ခဲ့တဲ့ မနေ့က ပစ်ခတ်တိုက်ခိုက်မှုတွေအတွက် စိုးရိမ်မကင်းဖြစ်တဲ့အကြောင်း ရန်ကုန်အခြေစိုက် အမေရိကန် ကနေဒါနဲ့ ပြင်သစ်သံရုံးတို့က အသီးသီးထုတ်ပြန်ခဲ့ကြပါတယ်။ မန္တလေးမြို့မှာ အရပ်သားတွေ သေဆုံး၊ ဒဏ်ရာရတာ ရှိနိုင်တယ်ဆိုတဲ့ သတင်းတွေအပါအဝင် ပစ်ခတ်မှုသတင်းတွေကို စောင့်ကြည့်နေတယ်လို့ ရန်ကုန်၊ အမေရိကန်သံရုံးက အင်္ဂါနေ့က ကြေညာချက် ထုတ်ပြန်ခဲ့ပါတယ်။
ဇွန်လ ၂၂ ရက်နေ့ မနက်က မန္တလေးက ပစ်ခတ်မှုတွေအတွင်း လက်နက်ကိုင်တွေဖက်က ၄ ယောက်သေဆုံးခဲ့ပြီး လုံခြုံရေးတပ်ဖွဲ့ဝင်တချို့ အပြင်းအထန်ဒဏ်ရာရခဲ့တယ်လို့ စစ်ကောင်စီက ပြောပါတယ်။
ဒီအတောအတွင်း အရပ်သားအစိုးရကို ဖြုတ်ချပြီး စစ်တပ်အာဏာသိမ်းပြီး ငါးလနီးပါးကြာရှိနေတဲ့ မြန်မာနိုင်ငံမှာ လုံခြုံရေးတပ်ဖွဲ့တွေရဲ့ အကြမ်းဖက်နှိမ်နင်းမှုတွေ ဆက်ပြီးဖြစ်နေတဲ့ သတင်းတွေအပေါ်မှာ အခြေအနေတွေဟာ ဆက်လက် စိုးရိမ်ဖွယ်ရာဖြစ်နေတယ်လို့လည်း မြန်မာ ကုလသမဂ္ဂရုံးက ပြောကြားခဲ့ပါတယ်။ အနည်းဆုံး လက်နက်မဲ့ အမျိုးသမီး၊ ကလေးနဲ့ အမျိုးသား စုစုပေါင်း ၈၇၂ ဦး သေဆုံးခဲ့ပြီး လူပေါင်း ထောင်နဲ့ချီပြီး ထိခိုက်ဒဏ်ရာရခဲ့တယ်လို့လည်း အင်္ဂါနေ့က ကုလသမဂ္ဂက သတင်းထုတ်ပြန်ထားပါတယ်။
မြန်မာနိုင်ငံမှာ အကြမ်းဖက်မှုတွေ ဖြစ်ပေါ်နေတဲ့ အခြေအနေနဲ့ ပတ်သက်လို့ ပြီးခဲ့တဲ့ သတင်းပတ်က လုံခြုံရေးကောင်စီမှာရော၊ အထွေထွေညီလာခံမှာပါ နိုင်ငံတွင်းရှိနေတဲ့ အင်အားစုအားလုံးအနေနဲ့ အပြုသဘောဆောင် တွေ့ဆုံဆွေးနွေးပြီး ပြန်လည်ရင်ကြားစေ့ရေးကနေ တဆင့် အစွမ်းကုန်ထိန်းသိမ်းဆောင်ရွက်ဖို့၊ ငြိမ်းချမ်းတဲ့ အဖြေရှာဖို့ တိုက်တွန်းထားပါတယ်။
