စစ်ကောင်စီတပ်ဟာ ထားဝယ်ခရိုင်သပိတ်ကော်မတီဝင် ကိုမင်းလွင်ဦးကို သူ့မိဘတွေရဲ့ နေအိမ်ဖြစ်တဲ့ လောင်းလုံးမြို့နယ်၊ ပြင်းထိန်ကျေးရွာက အိမ်မှာ ဇွန်လ ၁၉ ရက်နေ့က စစ်ကားလေးစီး၊ အင်အား ၃၀ ခန့်နဲ့ ဝင်ရောက်ရှာဖွေခဲ့ပြီး သူ့ကိုမတွေ့လို့ ဖခင်ကို ဖမ်းသွားပါတယ်။
နေအိမ်ထဲ ဝင်ရောက်ရှာဖွေတဲ့အခါ ကျောင်းသားသမဂ္ဂလက်ပတ်နဲ့ တီရှပ်တစ်ထည်တွေ့တာကြောင့် ဖခင်ဖြစ်သူကို ဖမ်းဆီးသွားခဲ့ပြီး ဘတ္ထရီအိုးနှစ်လုံးကြားဆက်တဲ့ ကြိုးကိုတွေ့တဲ့အခါ ဒီပစ္စည်းတွေကို အိမ်မှာသုံးလို့မရကြောင်း စစ်ကောင်စီတပ်ဖွဲ့ဝင်တွေက ခြိမ်းခြောက် ပြောဆိုခဲ့တယ်လို့ ကိုမင်းလွင်ဦး ကပြောပါတယ်။
“ဒီဟာတွေ တွေ့တယ်ပေါ့ဗျာ။ သူတို့ရှာဖွေတော့ အဲ့တော့ကျွန်တော့်အဖေကို ဖမ်းမယ်ပေါ့ဗျာ။ လယ်ထွန်စက်မှာ ဘတ္ထရီအိုးတွေ Join ဖို့အတွက် ကျွန်တော့်အမေဝယ်ထားတဲ့ ကြိုးတစ်ပင်ကိုတွေ့တယ်။ ဘတ္ထရီအိုးဆက်ဖို့ ဝယ်ထားတယ်လို့ ပြောတော့ ဒါမျိုးကို အိမ်မှာသုံးလို့မရဘူး ဆိုတာမသိဘူးလားလို့ ပြောတယ်။ စက်တွေမှာ ဘတ္ထရီအိုးဒေါင်းသွားလို့ရှိရင် တခြားတစ်လုံးနဲ့ ချိတ်ပြီးနှိုးတဲ့ကြိုးမျိုးပါ။”
စစ်ကောင်စီက ဖမ်းဆီးသွားတဲ့ အသက် ၆၅ နှစ်အရွယ် ဖခင် ဦးအောင်ဖေကို လောင်းလုံးမြို့နယ် ရဲစခန်းမှာ ထိန်းသိမ်းထားတယ်လို့ ကိုမင်းလွင်ဦးက ပြောပါတယ်။
ကိုမင်းလွင်ဦးဟာ စစ်အာဏာသိမ်းပြီးနောက် လူထုသပိတ်လှုပ်ရှားမှုတွေကိုသာ တစိုက်မတ်မတ် လုပ်ဆောင်ခဲ့တယ်လို့ ဆိုပါတယ်။ သူလုပ်ဆောင်ခဲ့တာတွေဟာ မိဘဖြစ်သူတွေရဲ့ တိုက်တွန်းမှု တစ်စုံတစ်ရာမပါဘဲ မိမိသဘောဆန္ဒအရသာလုပ်ဆောင်ခဲ့တာလို့ ပြောပါတယ်။
စစ်ကောင်စီဘက်ကတော့ သူ့ကို ဖမ်းဆီးဖို့ သတင်းပေးနိုင်တဲ့သူတွေကို ကျပ်သိန်းသုံးရာ ပေးမယ်ဆိုပြီး ဓာတ်ပုံနဲ့တကွ လောင်းလုံးမြို့နယ်က လူစည်ကားရာနေရာတွေမှာ ကြေညာထားတာဖြစ်ပါတယ်။
ကိုမင်းလွင်ဦးဟာ ရာဇသတ်ကြီး ဥပဒေပုဒ်မ ၅၀၅ (က)အပြင် အကြမ်းဖက်မှုတိုက်ဖျက်ရေးဥပဒေပုဒ်မတွေနဲ့ ဖမ်းဝရမ်း ထုတ်ခံထားရသူ ဖြစ်ပါတယ်။
ပြီးခဲ့တဲ့နှစ်ကလည်း ကိုမင်းလွင်ဦးရဲ့ မိခင်ကို စစ်ကောင်စီတပ်ဖွဲ့ဝင်တွေက လေးရက်ကြာ ဖမ်းဆီးစစ်ဆေးခဲ့ပါတယ်။
