မြန်မာနိုင်ငံမှာ စစ်တပ်က အာဏာသိမ်းခဲ့ပြီးနောက်ပိုင်း အကျဉ်းထောင်ထဲမှာ အကျဉ်းသား သေဆုံးမှုတွေ အတွက် စစ်ကောင်စီရဲ့ စစ်တပ်နဲ့ ရဲတပ်ဖွဲ့မှာ တာဝန်ရှိတယ်လို့ နိုင်ငံတကာ လူ့အခွင့်အရေး စောင့်ကြည့်လေ့လာရေး အဖွဲ့ (HRW) က သူတိုရဲ့ ဝက်ဘ်ဆိုက်ဒ် စာမျက်နှာကနေ စက်တင်ဘာ ၁၃ ရက် ဒီနေ့မှာ ထုတ်ပြန်ပါတယ်။
အကျဉ်းထောင်ထဲမှာ သေဆုံးခဲ့သူခြောက်ဦးရဲ့ မှတ်တမ်းအချက်အလက်တွေကိုလည်း HRW က ပူးတွဲဖော်ပြခဲ့ပြီး သိသာထင်ရှားတဲ့ နှိပ်စက်ညှဉ်းပန်းမှုတွေ ပါဝင်သလို လိုအပ်တဲ့ ကျန်းမာရေး ပြုစုစောင့်ရှောက်မှုပေးဖို့ ငြင်းပယ်ခဲ့တဲ့ အချက်အလက်တွေလည်း ပါဝင်နေ ပါတယ်။
စစ်ကောင်စီရဲ့ စစ်တပ်နဲ့ ရဲက ဖမ်းဆီးပြီး နှိပ်စက်ညှဉ်းပန်းခံရတာတွေကို HRW က မှတ်တမ်းတင်နိုင်တာက အစွန်အဖျားလောက်ပဲရှိတယ်လို့ HRW ရဲ့ မြန်မာနိုင်ငံဆိုင်ရာ သုတေသီ မန်နီမောင်ရဲ့ ပြောကြားချက်ကိုလည်း HRW က ဖော်ပြထားပါတယ်။
သေဆုံးအကျဉ်းသားခြောက်ဦးရဲ့ သက်သေမှတ်တမ်းတွေဟာ မေလကနေ ဇူလိုင်လအထိ သုံးလတာကာလ အတွင်း မျက်မြင်သက်သေ ဆယ်ဦးအပါအဝင် တခြားပတ်သက် ဆက်နွှယ်မှုရှိတဲ့ သူတွေကို ဆက်သွယ်စုံစမ်း မေးမြန်းထားတာလို့ HRW က ပြောပါတယ်။
ဒါ့အပြင် ဓာတ်ပုံမှတ်တမ်း ၄၀ ကျော်၊ လူမှုကွန်ရက်မီဒီယာပေါ်မှာ ဖော်ပြထားတဲ့ ဗီဒီယို ဖိုင်ငါးဖိုင်နဲ့ နှိပ်စက်ညှဉ်းပန်းမှု စစ်ဆေးရာမှာ ကျွမ်းကျင်တဲ့ အရေးပေါ်ဆရာဝန်တွေရဲ့ မှတ်ချက်တွေလည်း မှတ်တမ်းမှာ ပါဝင်တယ်လို့ ဆိုပါတယ်။
ထိုင်းနိုင်ငံအခြေစိုက် နိုင်ငံရေးအကျဉ်းသားများ ထောက်ပံ့ကူညီရေးအဖွဲ့ရဲ့ ခန့်မှန်းချက်အရ စစ်တပ်က အာဏာသိမ်းပြီးနောက်ပိုင်း စစ်ကောင်စီရဲ့ စစ်တပ်နဲ့ ရဲ အချုပ်စခန်း၊ စစ်ကြော ရေးတွေနဲ့ အကျဉ်းထောင်တွေမှာ သေဆုံးသူ အနည်းဆုံး ၇၅ ဦး ရှိခဲ့တယ်လို့လည်း HRW က ဖော်ပြပါတယ်။
ကုလသမဂ္ဂ၊ ဥရောပသမဂ္ဂ၊ အမေရိကန်၊ ဗြိတိန်နဲ့ အာဆီယံအပါအဝင် ဒေသတွင်းအဖွဲ့ အစည်းတွေနဲ့ အစိုးရတွေအနေနဲ့ အကျဉ်းထောင်အတွင်း သေဆုံးမှုတွေကို စိုးရိမ်ကြောင်း ဖော်ပြပြီး ဒါတွေကို အဆုံးသတ်ဖို့ စစ်ကောင်စီကို ဖိအားပေးသင့်တယ်လို့ HRW က ပြော ပါတယ်။
နိုင်ငံတကာ လူ့အခွင့်အရေး စောင့်ကြည့်လေ့လာရေးအဖွဲ့ (HRW) ဟာ အမေရိကန်နိုင်ငံ၊ နယူးယောက် မြို့မှာ အခြေစိုက်ထားတဲ့ အစိုးရမဟုတ်သော နိုင်ငံတကာ NGO အဖွဲ့အစည်း တစ်ခု ဖြစ်ပါတယ်။
