စစ်ကိုင်းတိုင်းထဲက မြို့နယ်သုံးခုမှာရှိတဲ့ ရွာပေါင်း ၃၄ ရွာကနေ နေရပ်စွန့်ခွာ ထွက်ပြေးရတဲ့ ဒေသခံ စုစုပေါင်း သုံးသောင်းကျော်ရှိပြီလို့ ကျွန်းလှမြို့ တက်ကြွလှုပ်ရှားသူများအဖွဲ့က ပြော ပါတယ်။
ဒီအထဲမှာ ကန့်ဘလူ၊ ကျွန်းလှနဲ့ ကောလင်းမြို့နယ်ထဲက အောင်ချမ်းသာ၊ ပင်သာရွာ၊ တည်ပင် ဆိပ်၊ ဆိပ်ဖူး၊ ရှမ်းကုန်း၊ သိုက်ပင်ဆိပ်၊ နောင်ဦး၊ စာရင်းဝင်ရွာ၊ အိမ်ခြေရွာ၊ အင်းလျားရှည်၊ ယင်းတိုက်ရွာ၊ လက်ခုပ်ပင်၊ ပေတပင်၊ ရွာသစ်၊ ကြာအင်း၊ ဥသျှစ်ပင်၊ ဥက္ကံ၊ မိုးနှံ၊ သုဝဏ္ဏ၊ ချောင်း နား၊ တဂေါင်းအိုင်၊ ညောင်ပင်လှ၊ ရွှေတွင်းရွာ၊ နတ်အင်းရွာ၊ ကုန်းစည်း၊ ဝေလမူ၊ သက္ကယ်ကျင်း၊ ပေပင်ချောင်၊ မော်တုံ၊ မော်ကယ်၊ ညောင်ပင်၊ ပိန္နဲကုန်း၊ နောင်ကောက် စတဲ့ရွာတွေ ပါဝင်တယ်လို့ ဆိုပါတယ်။
ဒီစာရင်းတွေဟာ စစ်တပ်က အာဏာသိမ်းပြီးချိန်ကနေ အခုနှစ် ဩဂုတ်လ ၂၈ ရက်နေ့အထိ ကောက်ယူထားတာလို့ ကျွန်းလှမြို့ တက်ကြွလှုပ်ရှားသူများအဖွဲ့ရဲ့ တာဝန်ရှိသူတစ်ဦးက RFA ကို ပြောပါတယ်။
“အောင်ချမ်းသာရွာ (ကျွန်းလှမြို့နယ်) တိုက်ပွဲမှာဆို အကုန်လုံးက ဘာမှမပါဘူး။ ဆန် တစ်စေ့တောင် မပါဘူး။ အကုန်စွန့်ပြီး ပြေးကြတာ။ တည်ပင်ဆိပ်ရွာတို့ဆို အဲဒီဘက် တစ်ခြမ်းလုံးက ဘာဆိုဘာမှမပါဘူး။ အဝတ်တစ်ထည် ကိုယ်တစ်ခုနဲ့ ထွက်ပြေးကြရ သူတွေက များနေတာ။ အကုန်လုံးက အဲဒီလိုဖြစ်နေတာ”
ကျွန်းလှမြို့နယ်ထဲက စစ်ဘေးဒုက္ခသည်တွေကတော့ အခု ဩဂုတ်လထဲမှာ ထွက်ပြေးရတာ အများဆုံးဖြစ်နေပြီး လက်ရှိမှာ စစ်ဘေးဒုက္ခသည်တွေ အားလုံးအတွက် အမိုးအကာ၊ ဆေးဝါးနဲ့ စားနပ်ရိက္ခာတွေ လိုအပ်နေတယ်လို့ ဆိုပါတယ်။
ဒီနေ့မနက် ၈ နာရီခွဲဝန်းကျင်ကလည်း ကျွန်းလှမြို့နယ်၊ အင်းလျားရှည်ရွာကို စစ်ကောင်စီ တပ်သားတွေ ဝင်ရောက်မီးရှို့ခဲ့တာကြောင့် နေအိမ် ၁၇ လုံး မီးလောင်ပျက်စီးခဲ့တယ်လို့ ဒေသခံတွေက ပြောပါတယ်။
ကျွန်းလှမြို့နယ်က ပြည်သူ့ကာကွယ်ရေး တပ်ဖွဲ့ဝင်တစ်ဦးကတော့ အဲဒီတပ်သားတွေဟာ အိမ်ခြေရွာကို ဝင်ရောက်မီးရှို့ခဲ့တဲ့ စစ်ကောင်စီရဲ့ ခြေမြန်တပ်ရင်း ခမရ (၁၁၃) ရဲ့ အင်အား တစ်ရာဝန်းကျင်ပါ စစ်ကြောင်းဖြစ်တယ်လို့ ပြောပါတယ်။
လက်ရှိမှာတော့ အိမ်ခြေရွာမှာ စစ်ကောင်စီတပ်သားတွေ ရှိနေသေးတာကြောင့် မီးရှို့ခံရတဲ့ ရွာတွေရဲ့ မီးလောင်မှု အခြေအနေ အတိအကျကို RFA အနေနဲ့ သီးခြားအတည်ပြုလို့ မရသေးပါဘူး။
