ကိုဗစ်နိုင်တင်း ကာကွယ်၊ ကုသရေးလုပ်ဆောင်နေသည့်အဖွဲ့ကို ထောင်ချောက်ဆင်၍ နေရာတစ်ခုသို့ ဖုန်းဆက်ချိန်းဆိုကာ စစ်ကောင်စီက ဖမ်းခဲ့ခြင်းဖြစ်သည်
ရန်ကုန်တိုင်း မြောက်ဒဂုံမြို့နယ်တွင် ယနေ့ (ဇူလိုင် ၁၉) နံနက်ပိုင်းက Covid 19 ကာကွယ်ရေးနှင့် ပြည်သူ့အကျိုးပြုအဖွဲ့ဝင်အချို့ကို စစ်ကောင်စီက ထောင်ချောက်ဆင် ဖမ်းဆီးခဲ့ပြီး အဖွဲ့ရုံးခန်းကိုလည်း ဝင်ရောက်စီးနင်းခဲ့သည်။
ယနေ့ နံနက် ၁၀ နာရီခန့်က ကိုဗစ်သံသယ အရေးပေါ်လူနာရှိသည်ဟု ဖုန်းဆက်သဖြင့် အဆိုပါအဖွဲ့၏ မြေပြင်ကုသရေးဆရာဝန်သုံးဦး (အမျိုးသား) နှင့် ယာဉ်မောင်းဖြစ်သူတို့ လူနာတင်ယာဉ်တစ်စီးဖြင့် ချိန်းဆိုသည့် တောင်ဥက္ကလာပမြို့နယ်သို့ သွားရောက်ခဲ့ရာတွင် ထိုသို့ဖမ်းခံရခြင်းဖြစ်ကြောင်း အဖွဲ့ခေါင်းဆောင်တစ်ဦးက Myanmar Now ကို အတည်ပြုသည်။
“ဟိုရောက်လည်းရောက်ရော ၂ လွှာအိမ် အပေါ်ထပ်ကို ခေါ်တယ်။ ယာဉ်မောင်းကတော့ ကားနဲ့ အောက်မှာ စောင့်နေတယ်။ အပေါ်ဆုံးထပ်လည်းရောက်ရော တံခါးတွေအကုန်ပိတ်လိုက်တယ်။ လူနာမရှိဘဲနဲ့ ဌာနဆိုင်ရာဝန်ထမ်းတွေရောက်နေတယ်” ဟု ၎င်းက ပြောသည်။
ထိုသို့ ရုန်းရင်းဆန်ခတ်ဖြစ်ပွားနေသည့် အခြေအနေကို တိုက်အောက်တွင် စောင့်နေသော ယာဉ်မောင်းက ရိပ်စားမိသဖြင့် မြောက်ဒဂုံမြို့နယ် ၇/၈ လမ်းဆုံအနီးရှိ ရုံးခန်းသို့ ပြန်၍ အကြောင်းကြားခဲ့ရာ အခြေစိုက်ရုံးရှိ စေတနာ့ဝန်ထမ်းအချို့ အချိန်မီထွက်ပြေးလွတ်မြောက်နိုင်ခဲ့ကြောင်း အဆိုပါ အဖွဲ့ခေါင်းဆောင်က ပြောသည်။
သို့သော် အင်တာနက်မှတစ်ဆင့် ဆေးကုသရေးဝန်ဆောင်မှုပေးနေသည့် အမျိုးသမီးဆရာဝန်နှစ်ဦးမှာမူ ပစ္စည်းသိမ်းနေစဉ် စစ်ကောင်စီတပ်ဖွဲ့ဝင်များ ရောက်လာကာ ဖမ်းသွားကြောင်း ၎င်းက အတည်ပြုသည်။
စစ်ကောင်စီတပ်၏ ဝင်ရောက်စီးနင်းမှုအတွင်း ရုံးခန်းရှိ အောက်ဆီဂျင် ၄၀ လီတာဆန့် ၂၀ အိုးခန့်၊ ၁၅ လီတာဆန့် ၁၂ အိုး၊ ငွေကျပ် ၃၂ သိန်းတန်ဖိုးရှိ ဆေးဝါးနှင့် PPE ဝတ်စုံများ သိမ်းဆည်းခံလိုက်ရကြောင်း အဖွဲ့ခေါင်းဆောင်ထံမှ သိရသည်။
ဖမ်းဆီးခံလိုက်ရသည့် အမျိုးသမီးဆရာဝန်နှစ်ဦးနှင့် အမျိုးသားဆရာဝန်သုံးဦးစလုံးမှာ အာဏာဖီဆန်ရေးလှုပ်ရှားမှု (CDM)တွင် ပါဝင်နေသူများဖြစ်ပြီး မည်သည့်နေရာသို့ ခေါ်ဆောင်သွားသည်ကို မသိရသေးပေ။
ရန်ကုန်အခြေစိုက် Covid 19 ကာကွယ်ရေးနှင့် ပြည်သူ့အကျိုးပြုအဖွဲ့သည် လွန်ခဲ့သော နှစ်လခန့်မှစ၍ ကိုဗစ်နိုင်တင်းလူနာများကို ကုသပေးရန် အစီအစဉ်ဆွဲခဲ့ပြီးနောက် ဇူလိုင်လတွင် ဆက်သွယ်နိုင်မည့် ဖုန်းနံပါတ်များကို Facebook ၌ ကြေညာခဲ့ခြင်းဖြစ်သည်။
“အဓိက ဂရု(Facebook ရှိ Group များ) ထဲမှာ ပေါ်လာတဲ့ဟာကို သူတို့သိသွားတယ်လို့ ယူဆရတယ်။ public (လူသိရှင်ကြား) တော့ ကျွန်တော်တို့ (သတင်း) မလွှင့်ဘူး။ ဂရုတွေပေါ်မှာပဲ ကြေညာတာပေါ့နော်၊ တောင်ဥက္ကလာဆို တောင်ဥက္ကလာဂရု မြောက်ဒဂုံဆို မြောက်ဒဂုံဂရုပေါ့” ဟု အဖွဲ့ခေါင်းဆောင်က ပြောသည်။
ဇူလိုင်လဆန်းမှစ၍ လူ ၇ သန်းကျော်နေထိုင်သည့် ရန်ကုန်မြို့တွင် ကိုဗစ်သံသယဖြင့် သေဆုံးမှုများစွာ မြင့်တက်နေပြီး ပရဟိတအသင်းများ၏အဆိုအရ သုဿန်များတွင် နေ့စဉ် ပုံမှန် ၁၀၀ ခန့်သာ သဂြိုလ်ရန် ပို့ဆောင်ပေးနေရာမှ ၆၀၀ ဝန်းကျင်အထိ ရောက်နေပြီဖြစ်သည်။
အဆိုပါ အခြေအနေတွင် စစ်ကောင်စီ၏ ကိုဗစ်နိုင်တင်း ကုသ၊ ကာကွယ်ရေးလုပ်ငန်းများမှာ ၎င်းတို့ ဝါဒဖြန့်နေသည့် သတင်းစာနှင့် ရုပ်မြင်သံကြားသတင်းများတွင်သာ တွေ့ရပြီး လက်တွေ့၌ မည်သည့် စမ်းသပ်၊ ကုသမှုမျှ မရဘဲ လူ့အသက်များဆုံးရှုံးနေရကြောင်း ပရဟိတနှင့် ကျန်းမာရေးဝန်ထမ်းအချို့က အတည်ပြုထားသည်။
“ဆေးရုံကြီးတွေမှာ ပြည်သူလူထုကို ဝန်ဆောင်မှု လုံးဝမပေးပါဘူး။ မပေးတဲ့အပေါ်မှာ ကျွန်တော်တို့က နေပြီးတော့ နိုင်သလောက်ဝန်ကို ဝင်ထမ်းနေတာပါ။ ပြည်သူကို ပြည်သူအချင်းချင်း စောင့်ရှောက်တဲ့ သဘောမျိုးပေါ့နော်။ သူတို့လုပ်ပေးတာကို စောင့်နေမယ်ဆိုရင် ဒီထက်များတဲ့ လူသေဆုံးမှုတွေ ဖြစ်လာမှာကို မြင်တွေ့နေရတယ်” ဟု အထက်ပါ အဖွဲ့ခေါင်းဆောင်က သုံးသပ်သည်။
ကိုဗစ်နိုင်တင်းကပ်ရောဂါ တတိယလှိုင်းနှင့် ရင်ဆိုင်တိုးချိန်တွင် အာဏာသိမ်းစစ်ကောင်စီ၏ ဖိနှိပ်မှုများကိုလည်း တစ်ပြိုင်နက်ရင်ဆိုင်နေရသည်ဖြစ်ရာ ပြည်သူများအနေဖြင့် တက်နိုင်သမျှ နေအိမ်တွင် နေထိုင်ခြင်း၊ လိုအပ်၍ အပြင်ထွက်ရပါက Mask တပ်ခြင်း၊ မကြာခဏလက်ဆေးခြင်း၊ ခပ်ခွာခွာနေခြင်း၊ အဟာရရှိသည့် အစားအစာများ ဂရုတစိုက်စားသုံးခြင်း၊ အိပ်ရေးဝဝအိပ်ခြင်း စသည့် နည်းလမ်းများ သုံး၍ ကပ်ရောဂါကို ရင်ဆိုင်ကျော်လွှားကြရန် ကျန်းမာရေးဝန်ထမ်းများက တိုက်တွန်းထားကြသည်။
