သမ္မတဦးဝင်းမြင့် ဘာအပြစ်မှ မရှိသဖြင့် ခံဝန်လက်မှတ်မထိုးခဲ့
မြန်မာနှစ်သစ်ကူး လွတ်ငြိမ်းခွင့်မှာ ပြည်သူရွေးကောက်ခံ သမ္မတကြီး ဦးဝင်းမြင့် ပြန်လွတ်မြောက်လာပြီး စစ်အာဏာရှင်ဘက်က ခံဝန်မှာ လက်မှတ်ရေးထိုးခိုင်းတာကို အပြစ်ကျူးလွန်ထားတာ မရှိလို့ လက်မှတ်ရေးထိုးတာ မပြုလုပ်ခဲ့ဘူးလို့ သိရပါတယ်။
ဧပြီ ၁၇ ရက် မြန်မာနှစ်ဆန်း ၁ ရက်မှာ အကျဉ်းသား ၄,၃၃၅ ယောက်ကို စစ်အာဏာရှင်က ပြစ်ဒဏ်လျှော့ပေါ့ လွတ်ငြိမ်းပေးခဲ့တာမှာ ရွေးကောက်ခံသမ္မတ ဦးဝင်းမြင့် ပါဝင်လာခဲ့ပြီး အပြစ်မရှိတဲ့အတွက် ရာဇဝတ်ကျင့်ထုံးဥပဒေပုဒ်မ ၄၀၁ ပုဒ်မခွဲ -၁ မှာ လက်မှတ်မထိုးခဲ့ကြောင်း သိရပါတယ်။
ရာဇဝတ်ကျင့်ထုံးဥပဒေပုဒ်မ ၄၀၁ ပုဒ်မခွဲ -၁ အရ “နောက်တကြိမ် ပြစ်မှုထပ်မံကျူးလွန်ပါက ၎င်းပြစ်ဒဏ်အပြင် ယခုကျခံရန် ကျန်ရှိသော ပြစ်ဒဏ်များကိုပါ ဆက်လက်ကျခံပါမယ်” လို့ ခံဝန်မှာ လက်မှတ်ထိုးခိုင်းတာကို သမ္မတဦးဝင်မြင့် အနေနဲ့ ပြစ်မှုတစုံတရာ ကျူးလွန်တာ မရှိသလို ငါးပါးသီလ လုံခြုံတဲ့အတွက် လက်မှတ်မထိုးခဲ့ပေမဲ့ အထက်အမိန့်နဲ့ ပြန်လွှတ်ပေးခဲ့ကြောင်း အမျိုးသားဒီမိုကရေစီအဖွဲ့ချုပ် (NLD) ပြောရေးဆိုခွင့်ရှိသူ ဒေါက်တာမျိုးညွန့်က DVB ကို ပြောပါတယ်။
“သမ္မတကြီးဟာ အမြဲတမ်း ငါးပါးသီလ လုံတယ်။ ဒီနေ့လည်း ဥပုသ်သီလ ဆောက်တည်ထားတယ်။ ဘယ်လိုပြစ်မှုကိုမှ မကျူးလွန်ခဲ့ဘူး။ ဒါကြောင့်မို့ သူတို့ ၄၀၁ အရ ပြန်လည်လွှတ်ပေးတယ် ဆိုတာကို ဒါကို သူ လက်မှတ်မထိုးနိုင်ဘူး။ အဲဒါကြောင့် ဒီဟာကို အထက်ကို အစီရင်ခံပါ ဆိုတာကို သူပြောတယ်။ အဲဒီတော့ အထက်က အစီရင်ခံတာကို လက်ခံပြီးတော့ ဒီတိုင်းပဲ ပြန်လွှတ်ပေးလိုက်တာပါ။”
လက်ရှိမှာ သမ္မတ ဦးဝင်းမြင့်က နေပြည်တော်က မိသားစုနေအိမ်ကို ရောက်ရှိနေပြီး ခန္ဓာကိုယ် အပြင်ပိုင်း ကျန်းမာရေးကောင်းမွန်ကြောင်းလည်း ဒေါက်တာမျိုးညွန့်က ဆိုပါတယ်။
လွတ်မြောက်မဲ့အကြောင်းကို ကြိုတင်အကြောင်းထားတာ မရှိပေမဲ့ ဧပြီ ၁၇ ရက် နေ့လယ် ၁၂ နာရီမှ ထောင်အာဏာပိုင်တွေနဲ့အတူ တာဝန်ရှိသူတွေက လာရောက်ခေါ်ယူခဲ့တယ်လို့လည်း သိရပါတယ်။
သမ္မတ ဦးဝင်းမြင့်ကို လွှတ်ပေးတာဟာ နိုင်ငံတကာကို ပြသဖို့ ပုံရိပ်ကောင်းတခုဖြစ်ပေမဲ့ နိုင်ငံရေးမှာ အခြေခံအကျဆုံးဖြစ်တဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ နိုင်ငံရေးအကျဉ်းသား အားလုံး လွတ်မြောက်ရေးသာ အဓိက ဖြစ်တယ်လို့လည်း နိုင်ငံရေးဆိုင်ရာ ညှိနှိုင်းဆောင်ရွက်ရေး အစုအဖွဲ့က ၈၈ မျိုးဆက်ကျောင်းသားခေါင်းဆောင် ဦးမြအေးက DVB ကို ပြောပါတယ်။
“ကျနော်တို့လိုချင်တဲ့ အတိုင်းအတာတော့ မရောက်ဘူးနော်။ ဒါ ကျနော် ပွင့်ပွင့်လင်းလင်းပဲ ပြောတာလေ။ ကျနော်တို့ ဖြစ်စေချင်တာကတော့ဗျာ ဒေါ်အောင်ဆန်းစုကြည်ရော ဦးဝင်းမြင့်ရော နိုင်ငံရေးအကျဉ်းသားတွေ အားလုံး လွှတ်ပေးတာမျိုး ဖြစ်စေချင်တာပေါ့နော်။ အခုကတော့ ဒေါ်အောင်ဆန်းစုကြည်ကို နေအိမ်အကျယ်ချုပ် ထားမယ် ဆိုတာလည်း မသေချာသေးတဲ့ အခြေအနေလေ။ အဲတော့ ဘာမှတော့ မသိသေးဘူး။ ကျနော်တို့ မြင်တာကတော့ ဟို တကယ့် တိုင်းပြည် ရှေ့ကို ကောင်းဖို့ဆိုလို့ရှိရင်တော့ ဒေါ်အောင်ဆန်းစုကြည်၊ ဦးဝင်းမြင့် အပါအဝင် နိုင်ငံရေး အကျဉ်းသားတွေ အားလုံးလွှတ်ပေးမှုက အခြေခံအကျဆုံး ဖြစ်တယ်လို့ မြင်တယ်။ အရင်က ဦးဝင်းမြင့်ကလည်း နိုင်ငံတော်ရဲ့သမ္မတလေ၊ ပြည်သူလူထုက ရွေးချယ်တင်မြှောက်ထားတဲ့ နိုင်ငံတော်ရဲ့ သမ္မတလည်း ဖြစ်တယ်ဆိုတဲ့အခါကျတော့ နိုင်ငံတကာ ပုံရိပ်အတွက်ကတော့ ပြဖို့တော့ ကောင်းတယ်လို့ မြင်ပါတယ်ဗျ။”
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကိုလည်း ပြစ်ဒဏ်လျှော့ပေါ့ကာ နေအိမ်အကျယ်ချုပ်နဲ့ ရန်ကုန်အိမ်ကို ပြောင်းရွှေ့မယ်ဆိုတဲ့ သတင်းတွေ ထွက်ပေါ်နေပေမဲ့ လက်ရှိအချိန်ထိတော့ အတည်ပြုနိုင်တာ မရှိသေးပါဘူး။
လက်ရှိအချိန်အထိ ရထားတဲ့ စာရင်းတွေအရ သမ္မတ ဦးဝင်းမြင့်နဲ့အတူ လွတ်မြောက်လာတဲ့ နိုင်ငံရေးအကျဉ်းသားတွေ ပါဝင်မှုက အလွန်နည်းပါးနေပြီး ဆက်လက်စောင့်ကြည့်နေဆဲ ဖြစ်တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ပြောပါတယ်။
PPNM ဦးဆောင်ကော်မတီဝင် ကိုသိုက်ထွန်းဦးက “အခုလက်ရှိ အချိန်ထိတော့ ကျနော်တို့ မှန်းဆထားတဲ့အတိုင်း လူသိများတဲ့ ပုဂ္ဂိုလ်တွေကို လွှတ်ပေးတယ်။ အထူးသဖြင့်တော့ သမ္မတကြီး ဦးဝင်းမြင့်လည်း လွတ်တယ်ဆိုတော့ ကမ္ဘာ့သတင်းဌာနတွေရော မြန်မာပြည်သူလူထုကရော နိုင်ငံရေးအကျဉ်းသားတွေ လွတ်လာပြီဆိုတဲ့ သတင်းစကားကို ခပ်စိပ်စိပ်နဲ့ ကျယ်ကျယ် ကြားရပြီပေါ့နော်။ ကျနော်တို့ နှစ်ရှည်လများ ချမှတ်ခံထားရတဲ့ နိုင်ငံရေးအကျဉ်းသားတွေတော့ ထောင်အတော်များများမှာ ပါမလာတာ ကျနော်တို့ တွေ့ရပါတယ်။ သီးခြားအသုတ်လိုက်နဲ့ လွတ်လာမဲ့ အခြေအနေလည်း ရှိသေးတယ်လို့ ကျနော်တို့ ကြားရတယ်ပေါ့နော်။ ဒါပေမဲ့ ဆက်ပြီးတော့ စောင့်ကြည့်နေဆဲ ဖြစ်ပါတယ်” လို့ ပြောပါတယ်။
နိုင်ငံတအနှံ့ အကျဉ်းထောင် ၁၉ ခုကနေ အကျဉ်းသား ၅၈၆ ယောက် လွတ်မြောက်လာပြီး အဲဒီအထဲ နိုင်ငံရေးအကျဉ်းသား ၁၆၅ ယောက်သာ ပါဝင်ကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများ ကွန်ရက် (PPNM) ရဲ့ ဧပြီ ၁၇ ရက် နေ့လယ် ၂ နာရီထိ ရရှိထားတဲ့ စာရင်းတွေအရ သိရပါတယ်။
ဝေဝေ
