ဖမ်းဆီးသူတွေအပေါ် နှိပ်စက်၊ လိင်မှု ကျူးလွန်တဲ့ မြန်မာစစ်သားနဲ့ သူတို့ရဲ့တပ်မှူးတွေ ဘယ်သူဆိုတာ အချက်အလက်ရရှိပြီးဖြစ်ပါတယ်

ဓာတ်ပုံ ပုံစာ,ကုလသတင်းစာရှင်းလင်းပွဲမှာ တွေ့ရတဲ့ IIMM အကြီးအကဲ နီကိုလက်စ်ခွန်ဂျန် (ပုံဟောင်း)

မြန်မာစစ်တပ်ရဲ့ဖမ်းဆီးထိန်းသိမ်းမှုခံရချိန်မှာ ညှင်းပန်းနှိပ်စက်ခံရတာ၊ လိင်အကြမ်းဖက်မှုတွေ ခံရမှုတွေမှာ ကျူးလွန်ခဲ့သူတွေ ဘယ်သူ ဘယ်ဝါဖြစ်တယ်ဆိုတာနဲ့ သူတို့ရဲ့တပ်မှူးတွေက ဘယ်သူတွေဖြစ်တယ်ဆိုတာကို သက်သေ အထောက်အထားတွေ ရရှိထားပြီးဖြစ်တယ်လို့ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှုယန္တရား(IIMM) ရဲ့ အကြီးအကဲ နီကိုလက်စ်ခွန်ဂျန်က ထုတ်ပြောလာပါတယ်။

လူ့အခွင့်အရေးချိုးဖောက်မှု အခြေအနေတွေကို သက်သေစုဆောင်းပြီး စောင့်ကြည့်မှတ်တမ်းတင်တဲ့ IIMM အဖွဲ့ အကြီးအကဲက ကုလအထွေထွေညီလာခံ တတိယကော်မတီအစည်းအဝေးမှာ သူက အခုလို တင်ပြခဲ့တာဖြစ်ပါတယ်။

ဒီအစည်းအဝေးကိုတော့ အမေရိကန်ပြည်ထောင်စု၊ နယူးယောက်မြို့မှာ အောက်တိုဘာလ ၂၈ ရက်တုန်းက ပြုလုပ်ခဲ့တာဖြစ်ပါတယ်။

မြန်မာနိုင်ငံမှာ နိုင်ငံတကာရာဇဝတ်မှုတွေ ဖြစ်ပွားတဲ့အကြိမ်ရေနဲ့ ပြင်းထန်မှုတွေ ပိုပြီး မြင့်တက်လာနေတယ်လို့ လည်း သူက စုဆောင်းရရှိတဲ့အချက်အလက်တွေကို အခြေခံပြီး သတိပေးစကားပြောပါတယ်။

“စစ်တပ်က လေကြောင်းတိုက်ခိုက်မှုတွေကို ပိုပြီးအားထားလာပါတယ်။ စာသင်ကျောင်းတွေ၊ ဆေးရုံတွေ၊ နေအိမ်တွေနဲ့ ဘာသာရေးအဆောက်အဦးတွေကို တိုက်ခိုက်နေတာကို ကျွန်တော်တို့ ဦးစားပေးပြီး စုံစမ်းစစ်ဆေးနေပါတယ်” လို့ သူက ကုလအစည်းအဝေးမှာ ပြောခဲ့ပါတယ်။

မြန်မာစစ်တပ်ကို စွပ်စွဲထားတဲ့ အရပ်သားတွေကို ပစ်မှတ်ထားတဲ့ ဒရုန်းတိုက်ခိုက်မှုတွေ၊ သတ်ဖြတ်မှုတွေ၊ မုဒိမ်းမှုတွေ၊ နှိပ်စက်မှုတွေ နဲ့လူသားချင်းစာနာမှုအကူအညီဖြတ်တောက်မှုကြောင့် ငတ်မွတ်ခေါင်းပါးမှု ဖြစ်စဉ်တွေကိုလည်း အထောက်အထားတွေ မှတ်တမ်းတင်နေတယ်လို့ ပြောပါတယ်။

စစ်တပ်တင်မက အတိုက်အခံ နှစ်ဖက်စလုံးက သူတို့ဖမ်းဆီးထားတဲ့ စစ်သား၊ အရပ်သားတွေကို အကျဉ်းချုံး ကွပ်မျက်နေတာတွေကိုလည်း မှတ်တမ်းတင်ထားတယ်လို့ နီကိုလက်စ်ခွန်ဂျန် က အစီရင်ခံပါတယ်။

နောက်ပြီး ရခိုင်ပြည်နယ်မှာ ရိုဟင်ဂျာတွေကို စစ်တပ်နဲ့ အာရက္ခတပ်တော် (AA) နှစ်ဖက်စလုံးက စစ်သားအဖြစ်စုဆောင်းနေပြီး ရိုဟင်ဂျာလက်နက်ကိုင်အဖွဲ့တွေကလည်း လက်ရှိတိုက်ပွဲတွေမှာ ပါဝင်နေတယ်လို့ IIMM အကြီးအကဲက ပြောပါတယ်။

မြန်မာစစ်တပ်နဲ့ ရက္ခိုင့်တပ်တော် နှစ်ဖက်စလုံးဆီက အချက်အလက်တွေရရှိဖို့ ယန္တရားက ဆက်သွယ်ခဲ့ပေမယ့် ဒီနေ့အထိ နှစ်ဖက်လုံးကပူးပေါင်းဆောင်ရွက်မှုမရှိသေးတာကိုလည်း သူကပြောပါတယ်။

ယန္တရားက မျှဝေပေးတဲ့ အထောက်အထားတွေကို နိုင်ငံတကာရာဇဝတ်ခုံရုံးက တရားလိုရှေ့နေရုံးနဲ့ အာဂျင်တီးနားဖက်ဒရယ်ရာဇဝတ်ခုံရုံးက စုံစမ်းစစ်ဆေးရေးတရားသူကြီးတို့က အသုံးပြုနေတယ်လို့ ထုတ်ပြန်ပါတယ်။

မြန်မာနိုင်ငံက လူမျိုးပြုန်းစေမှုကို တားဆီးရန်နဲ့ ပြစ်ဒဏ်ချမှတ်ရန် သဘောတူစာချုပ်ပါ တာဝန်ဝတ္တရားတွေကို ပျက်ကွက်ခဲ့တယ်လို့ ဂမ်ဘီယာနိုင်ငံက စွပ်စွဲထားတဲ့ နိုင်ငံတကာတရားရုံးကအမှုမှာ အသုံးပြုဖို့ အချက်အလက်တွေကိုလည်း ယန္တရားက မျှဝေပေးနေတယ်လို့ ဆိုပါတယ်။

မြန်မာနိုင်ငံအတွင်း စစ်ရာဇဝတ်မှုတွေမှာ အသုံးပြုခဲ့တဲ့ လက်နက်နဲ့ စစ်ဘက်သုံးကိရိယာတွေကို ရောင်းပေးနေတဲ့ လူပုဂ္ဂိုလ်၊ စီးပွားရေးလုပ်ငန်းတွေဟာ သက်ဆိုင်ရာနိုင်ငံရဲ့ ဥပဒေတွေကို ချိုးဖောက်နေခြင်းရှိ မရှိ စုံစမ်းစစ်ဆေးနေတဲ့ နိုင်ငံတွေနဲ့လည်း IIMM က ပူးပေါင်းဆောင်ရွက်နေတယ်လို့ ထုတ်ပြန်ပါတယ်။

BBC Burmese