ပြီးခဲ့တဲ့ ၂ဝ၂၄ ခုနှစ် ဇန်နဝါရီလက ထိုင်း-မြန်မာနယ်စပ်အနီးမှာ မြန်မာနိုင်ငံသား ကိုအောင်ကိုကိုကို ထိုင်းစစ်သားတွေက အသက်သေဆုံးစေတဲ့အထိ ညှဉ်းပန်းနှိပ်စက်ခဲ့တဲ့အမှုကို စုံစမ်းဖော်ထုတ်ဖို့ ထိုင်းရှေ့နေများကောင်စီက လက်ခံလိုက်တယ်လို့ အရှေ့တောင်အာရှအခြေစိုက် လူ့အခွင့်အရေးအဖွဲ့ Fortify Rights က ဖေဖော်ဝါရီ ၁၃ ရက်နေ့မှာ ထုတ်ပြန်ပါတယ်။
ထိုင်းနိုင်ငံ၊ ဘန်ကောက်မြို့မှာပြုလုပ်တဲ့ သတင်းစာရှင်းလင်းပွဲမှာ Fortify Rights က တရားဝင်တိုင်ကြားစာ တင်သွင်းပြီး အရေးယူပေးဖို့ ထိုင်းရှေ့နေများကောင်စီကို တိုက်တွန်းလိုက်တာပါ။
ထိုင်းအာဏာပိုင်တွေအနေနဲ့ ဒီအမှုကို ဘက်မလိုက်ဘဲ တရားမျှတမှုအတွက် သေချာစုံစမ်းဖော်ထုတ်ပေးဖို့လည်း Fortify Rights က တောင်းဆိုလိုက်ပါတယ်။
အချက်အလက်တွေကို စစ်ဆေးဖို့နဲ့ သက်ဆိုင်ရာဌာနတွေဆီက အထောက်အထားတွေ စုဆောင်းဖို့ အဖွဲ့တစ်ခုဖွဲ့ပြီး အရပ်ဘက် ဒါမှမဟုတ် ရာဇ၀တ်မှုနဲ့ဖြစ်ဖြစ် အရေးယူနိုင်မဲ့နည်းလမ်းကို ရှာဖွေဖော်ထုတ်သွားမယ် လို့ ထိုင်းရှေ့နေများကောင်စီဥက္ကဋ္ဌက ပြောကြောင်းလည်း ရေးသားထားပါတယ်။
၂ဝ၂၄ ခုနှစ် ဇန်နဝါရီ ၁၂ ရက်နေ့ မနက် ၁၁ နာရီလောက်မှာ ထိုင်းနိုင်ငံ၊ မဲဆောက်ခရိုင်၊ တာ့ခ်ပြည်နယ်မှာ ထိုင်းစစ်သားလေးဦးက ကိုအောင်ကိုကို ကို ဖမ်းဆီးခဲ့ပြီး သုံးဦးက သစ်သားတုတ်ရှည်နဲ့ ပြင်းပြင်းထန်ထန် ရိုက်နှက်ခဲ့တယ်လို့ မျက်မြင်သက်သေတွေက ပြောကြောင်း Fortify Rights က ဆိုပါတယ်။
အဲဒါကြောင့် ကိုအောင်ကိုကိုဟာ ပွန်းပဲ့ဒဏ်ရာတွေ ပြင်းထန်စွာရခဲ့ကြောင်း၊ အလောင်းကို တရားဝင်ခွဲစိတ်စစ်ဆေးရာမှာလည်း ကိုယ်ထိလက်ရောက် ရိုက်နှက်မှုကြောင့် ဦးခေါင်းဒဏ်ရာနဲ့ သေဆုံးတယ်လို့ အဖြေရခဲ့ကြောင်း ဖော်ပြထားပါတယ်။
ဒါပေမဲ့ ဒီသေဆုံးမှုမှာ မျက်မြင်သက်သေတစ်ဦးဖြစ်တဲ့ မြန်မာနိုင်ငံသားတစ်ဦးကို မှားယွင်းပြီး ပြစ်ဒဏ်ချမှတ်ထားတယ်လို့လည်း ရေးသားထားပါတယ်။
ထိုင်းနိုင်ငံမှာနေထိုင်တဲ့ ကိုအောင်ကိုကိုဟာ ထိုင်းအာဏာပိုင်တွေက စီစဉ်လေ့ကျင့်သင်ကြားပေးထားတဲ့ ရပ်ရွာလူထုအခြေပြု လုံခြုံရေးတပ်ဖွဲ့ ချော်ရော်ဘော် (Chor Ror Bor) ရဲ့ စေတနာ့ဝန်ထမ်းဟောင်းတစ်ဦး ဖြစ်ပါတယ်။
သူဟာ ချော်ရော်ဘော်အဖွဲ့ရဲ့ အပေါ်ထပ်အင်္ကျီကို ဝတ်ထားတာကြောင့် ထိုင်းစစ်သားတွေက ဖမ်းဆီးစစ်ဆေးရာက အခုလိုသေဆုံးတဲ့အထိ ဖြစ်ပွားခဲ့တာလို့ Fortify Rights က ဖော်ပြပါတယ်။
ထိုင်းရှေ့နေများကောင်စီအနေနဲ့ ဒီအမှုနဲ့ပတ်သက်ပြီး တရားမျှတမှုရအောင် ဆောင်ရွက်လိမ့်မယ်လို့ မျှော်လင့်ကြောင်း Fortify Rights အဖွဲ့ အမှုဆောင်အရာရှိချုပ် Matthew Smith က ဆိုပါတယ်။
