ကရင်ပြည်နယ်၊ ကော့ကရိတ်မြို့မှာ ဖေဖော်ဝါရီလ ၂၁ရက်နေ့ က မြို့တွင်း ရပ်ကွက်နှစ်ခုကို စစ်တပ်က မီးရှို့တာ၊ ဒရုန်းကနေ ဗုံးချတိုက်ခိုက်ခဲ့တာကြောင့် ဒေသခံ နေအိမ်တစ်ရာခန့် ထပ်ပြီးမီးလောင်ပျက်စီးခဲ့တယ်လို့ ဒေသခံတွေက ပြောပါတယ်။
ကော့ကရိတ်မြို့တွင်းမှာ စစ်တပ်နဲ့ ကရင်အမျိုးသားလွတ်မြောက်ရေး တပ်မတော် (KNLA) မဟာမိတ်ပူးပါင်းတပ်တွေ နှစ်ဖက်စစ်ရေးတင်းမာနေတဲ့ နေရာတွေကို ခလရ ၉၇ တပ်ရင်းက လက်နက်ကြီးနဲ့ ပစ်ခတ်တာအပြင် ဒရုန်းနဲ့ ဗုံးတွေ ကြဲချတိုက်ခိုက်တာကြောင့် နေအိမ်အလုံး ၁၀၀ ခန့် မီးလောင်ပျက်စီးခဲ့တယ်လို့ မျက်မြင်တွေ့ခဲ့ရတဲ့ လုံခြုံရေးအရ အမည်မဖာ်လိုတဲ့ ဒေသခံတစ်ဦးက ပြောပါတယ် ။
“တိုက်ပွဲကတော့ နည်းနည်းပါးပါးပါပဲ၊ မီးလောင်တာ ကြာအင်းကုန်းကွက်သစ်ကနေ မီးစလောင်တာ တံတားဦးထိပဲ ညနေပိုင်းအချိန်လောက်ကျတော့ အထက်ရွာအမှတ်၄ ရပ်ကွက် ပြန်ထပ်လောင်တယ်၊ အထက်ရွာပိုင်းက အလုံးကြီးတွေကျပြီးတော့ ၁၀ မိနစ်လောက်ပဲပေါ့ တိုက်ပွဲဖြစ် လက်နက်ကြီးတွေ ကျပြီး မီးလောင်တာပေါ့၊ ည၁၀နာရီလောက်မှာ မီးငြိမ်းသွားတယ် အိမ်ခြေတွေကတော့ ၁၀၀ ပါသွားတာပေါ့”
အမှတ် ၄ ရပ်ကွက် နဲ့ အမှတ် ၇ ရပ်ကွက်က ကြာအင်းကုန်း၊ ကွက်သစ်၊ တံတားဦး၊ အထက်ရွာဘက်က နေအိမ်တွေ မီးလောင်ပျက်စီးခဲ့တာပါ။
ဒီရက်ပိုင်းအတွင်း နေအိမ်မှာ အသုံးအဆောင်ပစ္စည်းနဲ့ စားသာက်စရာ နေရာထိုင်ခင်းတွေ ပြန်လည်သယ်ယူတဲ့ စစ်ဘေးဒုက္ခသည်တွေကို စစ်တပ်က လိုက်လံပစ်ခတ်လို့ ထိခိုက်ဒဏ်ရာရသူ အချို့ ရှိခဲ့သလို နေအိမ်ပြန်သူ နှစ်ဦးလည်း စစ်တပ်က ပစ်ခတ်တဲ့ သေနတ်ထိမှန်ပြီး ဒဏ်ရာရခဲ့တယ်လို့ ကော့ကရိတ်ဒေသခံ စစ်ဘေးရှောင်တွေကို ကူညီသူတစ်ဦးက ပြောပါတယ်။
“မနေ့ကမီးလောင်တာတော့ ကိုယ်တွေအိမ်လည်းမီးထဲပါသွားပြီတဲ့၊ အဲ့က အသိတစ်ယောက်လည်း ပစ်ခံထိထားတယ်၊ ဒီမနက် တစ်ယောက်ကတော့စိုးရိမ်ရတယ် ၊ အသေးနဲ့ပစ်ခံရတာ အခုက တွေ့ တဲ့လူတွေကိုပစ်နေတာ”
ပြီးခဲ့တဲ့ ဖေဖော်ဝါရီလ ၁၃ ရက်နေ့ကလည်း ကော့ကရိတ်မြို့မှာ စစ်တပ်နဲ့ KNLA ပူးပေါင်းတပ်ဖွဲ့တို့ နှစ်ဖက်တိုက်ပွဲဖြစ်ရာမှာ ခလရ ၉၇တပ်ရင်းက ပစ်ခတ်တဲ့ လက်နက်ကြီးတွေကျရောက်ပေါက်ကွဲပြီး အမှတ် ၂ ရပ်ကွက် ဝင်းကြီးရပ်က နေအိမ် ၁၃ လုံး မီးလောင်ပျက်စီးခဲ့ပါတယ်။ စစ်ကောင်စီဘက်ကတော့ အခုလို ဗုံးချတိုက်ခိုက်တယ်ဆိုတာနဲ့ပတ်သက်လို့ သတင်းထုတ်ပြန်တာ မရှိသေးသလို RFA အနေနဲ့လည်း စစ်ကောင်စီ ပြောခွင့်ရသူ ဗိုလ်ချုပ်ဇော်မင်းထွန်းကို ဆက်သွယ်ပေမဲ့ ဖုန်းမဖြေပါဘူး။
ကော့ကရိတ် မြို့တွင်းတိုက်ပွဲဖြစ်နေတာ နှစ်လနီးပါးကြာလာချိန်မှာ ဒေသခံ နေအိမ် ၄၀၀ နီးပါး မီးလာင်ပျက်စီးခဲ့ပြီး ကလေး၊ လူကြီး၊ အမျိုးသမီး အပါအဝင် လူ ၂၀ ဝန်းကျင် သေဆုံးခဲ့သလို ၂၀ ကျော် ဒဏ်ရာရခဲ့တယ်လို့ စစ်ဘေးဒုက္ခသည်အရေး ကူညီနေသူတွေက ပြောပါတယ်။
