နိုင်ငံတစ်ဝန်းက လူနည်းစုတိုင်းရင်းသား အမျိုးသမီးတွေအပေါ် စစ်ကောင်စီတပ်သားတွေက လိင်ပိုင်းဆိုင်ရာ ကျူးလွန်မှုတွေ ဆက်ပြီးရှိနေတယ်လို့ အမျိုးသမီးများအဖွဲ့ချုပ် (မြန်မာနိုင်ငံ) WLB က ဖေဖော်ဝါရီလ ၂၃ ရက် ဒီနေ့ ထုတ်ပြန်တဲ့ အစီရင်ခံစာမှာ ဖော်ပြထားပါတယ်။
ဒီလို လူနည်းစု တိုင်းရင်းသား အမျိုးသမီးတွေအပေါ် လိင်ပိုင်ဆိုင်ရာ ကျူးလွန်မှုတွေဟာ လွန်ခဲ့တဲ့ ဆယ်စုနှစ်ကတည်းရှိခဲ့တာဖြစ်ပြီး တကျော့ပြန်စစ်တပ်အာဏာသိမ်းပြီးနောက် ဒီလိုဖြစ်စဉ်တွေက ပိုပြီးဖြစ်လာနေတယ်လို့ ဆိုပါတယ်။
၂၀၂၃ ခုနှစ်၊ ဇူလိုင်လ ၃၀ ရက်နေ့က ရှမ်းပြည်နယ် မြောက်ပိုင်း ကွတ်ခိုင်မြို့နယ် စွမ်လုံကျေးရွာက အမျိုးသမီး နှစ်ဦးကို စစ်ကောင်စီရဲ့ ခြေမြန်တပ်ရင်း ခမရ ၅၆၉ က စစ်ကောင်စီတပ်သားတွေ အဓ္ဓမပြုကျင့်ခဲ့တယ်လို့ WLB က ပြောပါတယ်။
ဒီလို စစ်ကောင်စီရဲ့ လိင်ပိုင်းဆိုင်ရာ ကျူးလွန်မှုတွေနဲ့ပတ်သက်လို့ ကျူးလွန်ခံရသူတွေ၊ ဆွေမျိုးမိသားစုဝင်တွေ၊ မျက်မြင်သက်သေတွေနဲ့ တွေ့ဆုံမေးမြန်းနိုင်ခဲ့တယ်လို့လည်း အမျိုးသမီးများအဖွဲ့ချုပ် (မြန်မာနိုင်ငံ) ရဲ့ မူဝါဒရေးရာ တာဝန်ခံတစ်ဦးက RFA ကို ပြောပါတယ်။
“ဒီလို လိင်ပိုင်းဆိုင်ရာ ကျူးလွန်မှုတွေကို မျက်မြင်သက်သေတွေ၊ ကာယကံရှင်တွေနဲ့ ဆက်သွယ်ခဲ့တာလည်း ရှိပါတယ်။ တချို့ကျတော့လည်း ကျူးလွန်သူတွေ၊ မိသားစုဆွေမျိုးတွေနဲ့ ဆက်သွယ်ဖို့ခက်ခဲတာလည်း ရှိခဲ့ပါတယ်။ ဒါပေမဲ့ ကျွန်မတို့ နည်းလမ်းပေါင်းစုံနဲ့ ဒါတွေကို ရအောင်လုပ်ခဲ့တာရှိပါတယ်”
၂၀၂၁ ခုနှစ် ဖေဖော်ဝါရီလ ၁ ရက်ကနေ ၂၀၂၃ ခုနှစ်၊ ဒီဇင်ဘာလ ၂၉ ရက်အထိ လိင်ပိုင်းဆိုင်ရာ ကျူးလွန်ခံရပြီး သေဆုံးခဲ့တဲ့ အမျိုးသမီး ၁၁ ဦးအထိရှိတယ်လို့ WLB က ပြောပါတယ်။
ဒါ့အပြင် နိုင်ငံရေးတက်ကြွလှုပ်ရှားတဲ့ အမျိုးသမီးတွေကို စစ်ကောင်စီတပ် ထောက်ခံတဲ့ အမျိုးသားတွေက သူတို့ရဲ့ တည်နေရာတွေကို ဖော်ပြတာ၊ ဖမ်းဆီးခိုင်းတာနဲ့ ပုဂ္ဂိုလ်ရေးအချက်အလက်တွေကို အသုံးပြုပြီး လိင်ပိုင်းဆိုင်ရာ ထိပါးနှောင့်ယှက်မှုတွေရှိတယ်လို့လည်း ဆိုပါတယ်။
စစ်ကောင်စီဘက်ကတော့ WLB ရဲ့ အစီရင်ခံစာနဲ့ပတ်သက်လို့ တစ်စုံတစ်ရာ တုံ့ပြန်ထားတာ မတွေ့ရသေးပါဘူး။
စစ်ကောင်စီတပ်က လိင်ပိုင်းဆိုင်ရာ ကျူးလွန်မှုတွေရှိနေသလို လက်နက်ကိုင် တော်လှန်ရေး အင်အားစုတွေကလည်း အမျိုးသမီးတွေအပေါ် လိင်ပိုင်းဆိုင်ရာကျူးလွန်မှုတွေရှိနေတယ်လို့ WLB က ပြောပါတယ်။
၂၀၂၃ ခုနှစ်၊ ဧပြီလအတွင်း အမျိုးသားညီညွတ်ရေးအစိုးရ NUG လက်အောက်ခံ လုံခြုံရေးတပ်ဖွဲ့ဝင် ရှစ်ဦးဟာ ဖမ်းဆီးခံထားရတဲ့ အမျိုးသမီးတစ်ဦးကို အုပ်စုဖွဲ့ အဓ္ဓမပြုကျင့်ခဲ့သလို ဇူလိုင်လ ၁၉ ရက်နေ့ကလည်း မကွေးတိုင်းမှာ ပြည်သူ့လုံခြုံရေးတပ်ဖွဲ့ကို လှောင်ပြောင်တယ်ဆိုတဲ့ အကြောင်းပြချက်နဲ့ အမျိုးသမီးနှစ်ဦးကို ကြိုးချည်ပြီး ရိုက်နှက်ခဲ့တယ်လို့ WLB ရဲ့ အစီရင်ခံစာမှာ ဖော်ပြထားပါတယ်။
