ကရင်နီပြည်နယ်၊ ရှားတောမြို့တွင် ဒေသခံ ၇ ဦးကို သတ်ဖြတ်သွားသည့် စစ်ကောင်စီတပ်ဖွဲ့ဝင်များထဲမှ ၂ ဦးကို ဖမ်းဆီးရမိထားကြောင်း KNDF ဒုစစ်ဦးစီးချုပ် မာဝီက ၎င်း၏ လူမှုကွန်ရက်စာမျက်နှာတွင် ယနေ့နံနက်တွင် ရေးထားသည်။
ကရင်နီဒေသအတွင်း စစ်ကူရောက်လာသည့် စစ်ကောင်စီတပ်က ကြားဖြတ်တိုက်ခိုက်ခံရပြီးနောက် ရှားတောမြို့နယ်မှ ဒေသခံ ၇ ဦးကို ဖေဖော်ဝါရီ ၅ ရက်နေ့က ဖမ်းဆီးသတ်ဖြတ်သွားခြင်းဖြစ်သည်။
သတ်ဖြတ်ခံရသူများထဲတွင် ကိုယ်ဝန်ဆောင်တစ်ဦး၊ မသန်စွမ်း အမျိုးသမီးနှစ်ဦး၊ အသက် ၃ နှစ်နှင့် ၅ နှစ်အရွယ် ယောကျ်ားလေး နှစ်ဦး၊ ၇ နှစ်အရွယ် မိန်းကလေးတစ်ဦးနှင့် အမျိုးသားတစ်ဦး စုစုပေါင်း ၇ ဦး ဖြစ်သည်ဟု ကရင်နီလူ့အခွင့်အရေးအဖွဲ့ (KHRG) တည်ထောင်သူ ဦးဗညားက ဖေဖော်ဝါရီ ၈ ရက်နေ့တွင် Myanmar Now ကို ပြောထားသည်။
“မိသားစုသုံးစုကို ဖမ်းသွားပြီး လမ်းပြခိုင်းတယ်။ ပြီးတော့ လမ်းတစ်ဝက်မှာပဲ အကုန်လုံးကို သတ်ပစ်တာပေါ့နော်။ စုစုပေါင်း ၇ ယောက်ပါ။ အဓိက ဦးခေါင်းကို တေ့ပြီး ပစ်သတ်ခဲ့တာပါ” ဟု ဦးဗညားက ဆိုသည်။
“ရှားတောမှာ ကလေးငယ်လေးတွေကို ပစ်သတ်သွားတဲ့ ကောင်တွေကို သေသွားတဲ့ကလေးတွေရဲ့ မျက်နှာကို ကြည့်ခိုင်းတော့ မကြည့်ရဲဘူးတဲ့။ အဲ့တော့ ကျနော်တို့ပြည်သူတွေလည်း အဲ့လိုကောင်တွေဟာ ဘယ်လိုကောင်တွေလည်းဆိုတာ မြင်ရအောင် ပြပေးလိုက်ပါတယ်။ သူတို့ မိသားစုတွေမြင်ပါစေ” ဟု ဒုစစ်ဦးစီးချုပ် မာဝီက ရေးထားသည်။
အင်္ကျီကွက်ကျား ဝတ်ထားသူသည် သုံးပွင့်ဗိုလ်ကြီးဖြစ်၍ အားကစားအင်္ကျီအနီ ဝတ်ထားသူမှာ တပ်သားဖြစ်ကြောင်း မာဝီက ဖော်ပြထားပြီး ၎င်းတို့၏ အမည်၊ အသက်၊ နေရပ်လိပ်စာ၊ မည်သည့်နေ့တွင် ဖမ်းဆီးရမိသည် စသည့် အသေးစိတ်ကိုမူ ဖော်ပြခြင်းမရှိပေ။
၎င်းတို့သည် အရှေ့ပိုင်းတိုင်းစစ်ဌာနချုပ် (ရပခ) လက်အောက်ခံ မိုင်းပျဉ်းမြို့အခြေစိုက် ခြေလျင်တပ်ရင်း (ခလရ-၂၄၉) မှ ဖြစ်ကြောင်း သိရသည်။
ခလရ-၂၄၉ မှ အင်အား ၆၀ ကျော်ကို ဖေဖော်ဝါရီ ၅ နံနက်အစောပိုင်းတွင် ရဟတ်ယာဉ် သုံးစီးဖြင့် ရှားတောမြို့သို့ ပို့ဆောင်ခဲ့ခြင်းဖြစ်သည်။
ဖမ်းဆီးရမိထားသူနှစ်ဦးကို လက်တုံ့ပြန်သတ်ဖြတ်မည်မဟုတ်ကြောင်း မာဝီက အောက်ပါအတိုင်း ရေးထားသည်။
“ဒီလူတွေကို ရှင်းပလိုက်လို့ လာမပြောကြပါနဲ့ ကလေးတွေအတွက် တရားမျှတမှုကို ကျန်ခဲ့တဲ့မိဘတွေ ဆွေမျိုးတွေအတွက် ရှာဖွေဖို့လိုပါတယ်။ ဒီကောင်တွေ ဒီအတိုင်းသေသွားလို့မရပါဘူး သူတို့ရဲ့သခင် မင်းအောင်လှိုင်ကိုပါ ဆွဲခေါ်သွားဖို့လိုပါတယ်”
ရှားတောမြို့ကို ကရင်နီတော်လှန်ရေးအင်အားစုများက ဖေဖော်ဝါရီ ၁၂ ရက်နေ့တွင် အလုံးစုံ ထိန်းချုပ်လိုက်သည်။
မြို့အဝင် စေတီကုန်းပေါ်ရှိ လက်ကျန် စစ်တပ်ဗျူဟာကုန်းကို တိုက်ခိုက်ပြီးနောက် ရှားတောမြို့တစ်ခုလုံးကို သိမ်းယူနိုင်ခြင်းဖြစ်သည်ဟု ကရင်နီတပ်မတော် (KA) မှ စစ်ရေးချုပ် ဗိုလ်မှူးကြီးဘုန်းနိုင်က ဖေဖော်ဝါရီ ၁၄ တွင် Myanmar Now ကို အတည်ပြုသည်။
ပုံစာ – KNDF ဒုစစ်ဦးစီးချုပ် မာဝီ၏ လူမှုကွန်ရက်စာမျက်နှာတွင် ဖော်ပြထားသော ဖမ်းမိထားသည့် စစ်ကောင်စီတပ်ဖွဲ့ဝင်နှစ်ဦး။
