စစ်ကိုင်းတိုင်း ရေဦးမြို့နယ်မှာ ဇန်နဝါရီလ ၂ ရက်နေ့က စစ်ကောင်စီတပ်ဖွဲ့ဝင်တွေ စစ်ကြောင်းထိုးတာကြောင့် ရွာသုံးရွာက ဒေသခံသုံးထောင်ကျော် ဘေးလွတ်ရာ ထွက်ပြေးတိမ်းရှောင်နေရတယ်လို့ ဒေသခံကာကွယ်ရေးတပ်ဖွဲ့က ပြောပါတယ်။
ဇန်နဝါရီ ၂ ရက်နေ့ မနက်ကစပြီး ဒေသခံတွေ ထွက်ပြေးနေရတာလို့ ရေးဦးမြို့နယ်အခြေပြု People’s Defence Comrade အဖွဲ့ ပြန်ကြားရေးတာဝန်ခံ ကိုထူးခန့်ဇော်(အမေ့သား) က RFA ကို ပြောပါတယ်။
“ဒီနေ့မနက်က ရေဦးမြို့တွင်းကနေ တောင်ဘက်ခြမ်းက ရွာသုံးရွာကို လက်နက်ကြီး လက်နက်ငယ်တွေပစ်ပြီး အင်အား ၈ဝ ခန့်ပါတဲ့ စစ်ကြောင်းဟာ စစ်ကြောင်းထိုးတယ်။ အဲဒီရွာတွေက ပြည်သူပိုင်ဆန်တွေကို ရေဦးမြို့ပေါ်ကို ရိက္ခာအဖြစ် ခိုးသယ်နေတာ၊ မနက်ပိုင်းကစလို့ ရွာသုံးရွာက လူသုံးထောင်လောက် ဘေးလွတ်ရာ ထွက်ပြေးနေရတယ်”
စစ်ကောင်စီစစ်ကြောင်းဟာ ရွာသာလေး၊ ကုက္ကိုစု၊ မူးသာကုန်း၊ ပြည်တော်၊ မုတ်စီ စတဲ့ရွာတွေကို ဝင်ရောက်လာတာလို့လည်း ဆိုပါတယ်။
စစ်ကြောင်းထိုးတာကြောင့် ရွာသာလေး၊ ကုက္ကိုစု၊ မူးသာကုန်း ရွာသုံးရွာက ဒေသခံသုံးထောင်ကျော် ထွက်ပြေးနေရတာဖြစ်ပြီး အဲဒီရွာတွေက ပြည်သူတွေရဲ့ ဆန်တွေကို စစ်ကောင်စီတပ်သားတွေက ရေဦးမြို့ပေါ် သယ်ဖို့ပြင်နေပြီး မနက်ပိုင်းမှာ ရေဦးနယ်မြေခံ ပြည်သူကာကွယ်ရေးတပ်ဖွဲ့တွေက မိုင်းဆွဲတိုက်ခိုက်တာကြောင့် ထိခိုက်သေဆုံးတာတွေရှိတယ်လို့လည်း ပြောပါတယ်။
စစ်ကြောင်းထိုးတာနဲ့ ပြည်သူပိုင်ဆန်တွေ သယ်ယူနေတယ်လို့ ပြောဆိုချက်နဲ့ပတ်သက်ပြီး စစ်ကောင်စီရဲ့ စစ်ကိုင်းတိုင်းပြောခွင့်ရ တိုင်းရင်းသားရေးရာ ဝန်ကြီး ဦးစိုင်းနိုင်နိုင်ကျော်ကို RFA က ဒီနေ့ တယ်လီဖုန်းနဲ့ ဆက်သွယ်ခဲ့ပေမဲ့ လက်ခံဖြေဆိုခြင်း မရှိပါဘူး။
ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UN OCHA) ရဲ့ ဒီဇင်ဘာလ ၁၅ ရက် ထုတ်ပြန်ချက်မှာတော့ မြန်မာနိုင်ငံရဲ့ သုံးပုံနှစ်ပုံမှာ တိုက်ပွဲတွေဖြစ်နေပြီး အိုးအိမ်စွန့်ခွာထွက်ပြေးရသူ ၂ ဒသမ ၆ သန်းကျော် ရှိလာပြီလို့ ဖော်ပြထားပါတယ်။
