စစ်ကိုင်းတိုင်း ဆားလင်းကြီးနဲ့ ပုလဲမြို့နယ်က ကျေးရွာတွေကို စစ်ကောင်စီတပ်က အောက်တိုဘာ ၄ ရက်ကစလို့ စစ်ကြောင်းထိုး နယ်မြေရှင်းလင်းနေတာကြောင့် ရွာသား ဆယ်ဦးခန့် ဖမ်းဆီးခံရပြီး၊ လူ ငါးထောင်နီးပါး ဘေးလွတ်ရာကို ထွက်ပြေးနေရတယ်လို့ ဒေသခံတွေက ပြောပါတယ်။
အောက်တိုဘာလ ၄ ရက် မနက် ၁၀ နာရီခွဲကျော်မှာ ဆားလင်းကြီးနဲ့ ယင်းမာပင် မြို့နယ်ကြားက ရွာတွေကို စစ်ကောင်စီတပ်က Mi-35 တိုက်ခိုက်ရေး ရဟတ်ယာဉ်နဲ့ ပစ်ခတ်တိုက်ခိုက်ခဲ့တာကြောင့် အရပ်သား ငါးထောင်နီးပါး ထွက်ပြေးနေရတာပါ။
အောက်တိုဘာ ၅ ရက် ဒီနေ့မနက် ၈ နာရီလောက်မှာတော့ ဆားလင်းကြီးနဲ့ ယင်းမာပင်ဘက်ကနေ ထွက်လာတဲ့ အင်အား သုံးရာခန့်ပါတဲ့ စစ်ကြောင်းဟာ ပုလဲမြို့နယ်၊ လက်တောင်းကြီးရွာကို ရောက်လာပြီး ရွာသား ဆယ်ဦးခန့်ကို ဖမ်းဆီးသွားတယ်လို့ လုံခြုံရေးအရ အမည်မဖော်လိုတဲ့ ဒေသခံတစ်ဦးက ပြောပါတယ်။
“ဆယ်ယောက်လောက် အဖမ်းခံလိုက်ရတယ်။ သူတို့က လက်တောင်းကြီးရွာဘက်နေ လွတ်တဲ့ရွာဘက်ကို စစ်ဘေးရှောင်တာမှာ ထိပ်တိုက်တွေ့ပြီးတော့ အဖမ်းခံလိုက်ရတာ။ ဒီနေ့မနက် အဖမ်းခံရတာ။ စစ်ကြောင်းက ယာဉ်တန်းပါတော့ တစ်ရွာနဲ့ တစ်ရွာ တရွေ့ရွေ့နဲ့ပဲ သွားနေတယ်။ ယာဉ်တန်းက သွားနေတာ တော်တော် ကြာတယ်”
အဲဒီစစ်ကြောင်းမှာ စစ်သား သုံးရာလောက်နဲ့ စစ်ကား ၁၇ စီးလည်းပါလာတာကို တွေ့ရတယ်လို့ သူက ပြောပါတယ်။ ချီတက်ရာလမ်းတစ်လျှောက် ကျေးရွာတွေကို လက်နက်ကြီး၊ လက်နက်ငယ်တွေနဲ့ ရမ်းသန်းပစ်ခတ်နေတာကြောင့် ဖမ်းဆီးခံရသူတွေရဲ့ အသက်နဲ့ နာမည်တွေကို အတိအကျ မသိရသေးဘူးလို့ ဆိုပါတယ်။
စစ်ဘေးဒုက္ခသည်အရေး ကူညီနေတဲ့ အညာပစ်တိုင်းထောင်လေးများအဖွဲ့ဝင်တစ်ဦးက လည်း ဒေသခံတွေကို ဓားစာခံအဖြစ် စစ်ကောင်စီစစ်ကြောင်းက ဖမ်းဆီးခေါ်ဆောင် သွားတာ မှန်ကန်ကြောင်း RFA ကို အတည်ပြု ပြောဆိုပါတယ်။
အဲဒီစစ်ကြောင်းဟာ လက်တောင်းကြီးရွာကို မဝင်ခင် နာရီပိုင်းအလိုမှာ ဒေသကာကွယ်ရေး တပ်ဖွဲ့ရဲ့ မိုင်းဆွဲ တိုက်ခိုက်ခံရတာကြောင့် ရွာထဲဝင်ပြီး သံသယရှိသူတွေကို ဖမ်းသွားတာ လို့ ဒေသခံတွေက ပြောပါတယ်။
မနေ့ကလည်း မုံရွာမြို့အခြေစိုက် အနောက်မြောက်တိုင်း စစ်ဌာနချုပ်က ပျံတက်လာတဲ့ Mi-35 ရဟတ်ယာဉ်ဟာ ဆားလင်းကြီးမြို့နယ် ဘိုက်သရက်ရွာနဲ့ ယင်းမာပင်မြို့နယ်၊ လည်ငေါက်ရွာကို တစ်နာရီကြာ ပစ်ခတ်ခဲ့တာလို့ စစ်ဘေးဒုက္ခသည်အရေးကူညီနေတဲ့ အညာပစ်တိုင်းထောင်လေးများ အဖွဲ့ဝင်တစ်ဦးက RFA ကို ပြောပါတယ်။
“ရွာနှစ်ရွာကို ပစ်တာဗျာ။ ရွာတွေကိုလည်း ပစ်တယ်၊ ရွာရဲ့လမ်းဘေးတစ်လျှောက် PDF တွေ လာမယ့် အနေအထားကို စိုးရိမ်တဲ့အတွက် လမ်းဘေးဝဲယာတွေကို ပစ်သွားတယ်။ လေယာဉ် Mi 35 နဲ့ပစ်တာ။ ဒေသခံ တွေကတော့ မနေ့က မတောင့်တရွာအကျော်မှာ စစ်ကားပျက်နေတဲ့အတွက် စစ်ကြောင်းကလည်း အဲဒီနားက ရွာတွေကိုလည်း ဝင်ကြတာဆိုတော့ ပြည်သူတွေက ကြိုသတင်းရပြီး ရှောင်နေကြတာပေါ့”
လေကြောင်း တိုက်ခိုက်မှုအပြီးမှာ နောက်ထပ် Mi-17 ရဟတ်ယာဉ်တစ်စင်း ရွာတွေပေါ်မှာ ဝဲပျံခဲ့တယ်လို့ သူက ပြောပါတယ်။
ဒီတိုက်ခိုက်မှုကြောင့် ဆားလင်းကြီးမြို့နယ် ဘိုက်သရက်၊ မတောင့်တ၊ ရွှေသမင်ရွာနဲ့ ယင်းမာပင်မြို့နယ် လည်ငေါက်၊ တဲစု စတဲ့ရွာတွေက ဒေသခံ ငါးထောင်နီးပါး ထွက်ပြေးနေရတာပါ။
ဒီအခြေအနေတွေနဲ့ ပတ်သက်လို့ စစ်ကောင်စီ စစ်ကိုင်းတိုင်း ပြောခွင့်ရသူ ဦးစိုင်းနိုင်နိုင်ကျော် ကို RFA က ဖုန်းနဲ့ ဆက်သွယ်ခဲ့ပေမယ့် လက်ခံဖြေဆိုတာမရှိပါဘူး။
