ကချင်ပြည်နယ်၊ ဖားကန့်မြို့နယ်က ကေအိုင်အေထိန်းချုပ်နယ်မြေအတွင်း စစ်ကောင်စီက လေကြောင်းကနေ တိုက်ခိုက်ခဲ့တဲ့ လုပ်ရပ်ဟာ သာမာန်လူ့အခွင့်အရေးချိုးဖောက်မှုသာမဟုတ်ဘဲ စစ်ရာဇဝတ်မှုကျူးလွန်တာဖြစ်လို့ အရေးယူမှုနဲ့တရားမျှတမှု ပြန်လည်ဖော်ဆောင်နိုင်အောင် တိကျတဲ့သက်သေတွေပေးပို့ဖို့ အမျိုးသားညီညွတ်ရေးအစိုးရ၊ လူ့အခွင့်အရေးဝန်ကြီးဌာနက တောင်းဆိုလိုက်ပါတယ်။
ပြည်သူတွေအနေနဲ့ ကိုယ်တိုင်ဖြစ်စေ၊ အသိမိတ်ဆွေတွေထံကတစ်ဆင့်ဖြစ်စေ ရိုက်ကူးထားတဲ့ ဗီဒီယိုမှတ်တမ်းတွေ၊ ဓါတ်ပုံတွေကို အမျိုးသားညီညွတ်ရေးအစိုးရ လူ့အခွင့်ရေးဆိုင်ရာဝန်ကြီးဌာနရဲ့ တရားဝင်ဖေ့ဘွတ်မက်ဆင်ဂျာဖြစ်တဲ့ Facebook Page Messenger : https://m.me/mohrmyanmarနဲ့ E-mail : report@mohr.nugmyanmar.org တို့ကိုပေးပို့ဖို့ NUG က တောင်းဆိုလိုက်တာပါ။
NUG အနေနဲ့ သက်သေတွေကို ဆိုရှယ်မီဒီယာတွေကနေ ထပ်ဆင့်ဖြန့်ဝေတာတွေလုပ်ဆောင်မှာမဟုတ်ဘဲ စစ်ကောင်စီကို အရေးယူနိုင်ရေး ကိစ္စတွေမှာသာ အသုံးပြုသွားမယ်လို့ ကြေညာချက်မှာ ထည့်သွင်းပြောထားပါတယ်။
NUGက ကျဆုံးခဲ့သူတွေအတွက် တရားမျှတမှုပြန်ရဖို့၊ ပြည်တွင်းနဲ့နိုင်ငံတကာ တရားဥပဒေများနဲ့အညီ အစွမ်းကုန်ဆောင်ရွက်မယ်လို့ ပြောထားပါတယ်။
စစ်ကောင်စီရဲ့ ဒီလေကြောင်းတိုက်ခိုက်မှုဟာ အရပ်သားတွေအပေါ် အလွန်အကျွံ အင်အားသုံး တိုက်ခိုက်ခဲ့ပုံရပြီး၊ လက်ခံနိုင်စရာ မရှိဘူးလို့ မြန်မာနိုင်ငံဆိုင်ရာ ကုလသမဂ္ဂရုံးကလည်း ကြေညာချက်ထုတ်ပြန်ပြောထားပြီးဖြစ်ပါတယ်။
ဒါ့အပြင် ကုသသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းကလည်း KIA ရဲ့ တပ်မဟာ ၉ နယ်မြေက တေးဂီတ ဖျော်ဖြေပွဲကို စစ်ကောင်စီက အောက်တိုဘာလ ၂၃ ရက်နေ့ညက လေကြောင်းနဲ့တိုက်ခိုက်ခဲ့မှုဟာ ကချင်လူမျိုးစုအပေါ် ရက်စက်တဲ့ ကျူးလွန်မှုဖြစ်ပြီး လူသားမျိုးနွယ်စုအပေါ် ကျူးလွန်မှုနဲ့ စစ်ရာဇဝတ်မှုမြောက်တယ်လို့ အောက်တိုဘာလ ၂၄ ရက်နေ့က ကုလသမဂ္ဂအထွေထွေညီလာခံ လက်နက်ဖျတ်သိမ်းရေးနဲ့ နိုင်ငံတကာ လုံခြုံရေးကော်မတီထံ တင်ပြခဲ့ပါတယ်။
မြန်မာပြည်သူတွေရဲ့ အသက်ကိုကယ်တင်ဖို့ မြန်မာစစ်တပ်ကို လက်နက်တင်ပို့ရောင်းချနေတဲ့ နိုင်ငံတွေအနေနဲ့ လက်နက်ရောင်းချမှုကို ချက်ခြင်းရပ်ဖို့ကိုလည်း သံအမတ်ကြီးက တောင်းဆိုခဲ့ပါတယ်။
