စစ်ကိုင်းတိုင်း ကျွန်းလှမြို့နယ် သစ်ချိုရွာ ဒီကနေ့ စက်တင်ဘာ ၄ ရက်မနက်ပိုင်းက မီးရှို့ခံရပြီး နေအိမ် ၆၇ လုံးမီးလောင် ဆုံးရှုံးခဲ့တာကြောင့် စက်တင်ဘာလ ၁ရက်ကနေ ဒီကနေ့ အထိ ကျွန်းလှမြို့နယ်အတွင်း လူနေအိမ် စုစုပေါင်း ၁၇၃ လုံး မီးရှို့ဖျက်ဆီးခံခဲ့ ရတယ်လို့ ကျွန်းလှ တက်ကြွလှုပ်ရှားသူများအဖွဲ့က RFA ကိုပြောပါတယ်။
စစ်ကိုင်းတိုင်း၊ ကျွန်းလှမြို့နယ် သဖန်းဆိပ်ဆည် အနောက်ဘက်ခြမ်းမှာရှိတဲ့ ပေပင်ချောင် ရွာ၊ မော်တုံရွာနဲ့ မော်ကယ်ရွာတွေကိုလည်း ဒီရက်ပိုင်းအတွင်း စစ်ကောင်စီတပ်သားတွေက မီးရှို့ခဲ့တယ်လို့ မော်ကယ်ရွာ ဒေသခံတစ်ဦးက ပြောပါတယ်။
“ကျမတို့ မော်ကယ်ရွာကို စက်တင်ဘာလ ၃ ရက် နေ့လည်ပိုင်းမှာ မီးရှို့တာ၊ စစ်ကြောင်းက အဲနေ့ မနက်က ဝင်တယ်၊ ရွာက ဘုန်းကြီးကျောင်းမှာ တစ်ည အိပ်တယ်၊ နောက်နေ့မနက် ရွာကထွက်သွားတယ် “
စက်တင်ဘာလ ၁ ရက်နေ့က ပေပင်ချောင်ရွာက အိမ် ၇၉ လုံး၊ စက်တင်ဘာလ ၂ ရက်မှာ မော်တုံရွာက အိမ် ၉ လုံးနဲ့ စက်တင်ဘာလ ၃ ရက်မှာ မော်ကယ်ရွာက အိမ် ၁၈ လုံး မီးရှို့ခံခဲ့ရတာပါ။
သြဂုတ်လ ၂၄ ရက်ကစလို့ ကျွန်းလှမြို့နယ်အတွင်း စစ်ကောင်စီက စစ်ကြောင်းထိုးလာတာ ဖြစ်ပြီး ကုန်းစည်း၊ တည်ပင်ဆိပ်၊ အိမ်ခြေ၊ အင်းလျားရှည်၊ ရွာကုန်းကြီး၊ပေပင်ချောင်၊ မော်တုံ၊ မော်ကယ်ရွာစတဲ့ ကျေးရွာတွေအပြင် ရွာပေါင်း ၂၀ကျော်က ဒေသခံ တစ်သောင်း ဝန်းကျင် ထွက်ပြေးတိမ်းရှောင်နေရတယ်လို့ ကျွန်းလှတက်ကြွလှုပ်ရှားသူများ အဖွဲ့က ကပြောပါတယ်။
စစ်ကောင်စီ ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကတော့ သူ့ရဲ့တပ်သားတွေဟာ လူနေအိမ်တွေကို မီးရှို့ဖျက်ဆီးတာတွေမလုပ်ဘူးလို့ သြဂုတ်လ ၁၇ ရက်က ကုလသမဂ္ဂ အထွေထွေအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ် Ms. Noeleen Heyzerနဲ့ တွေ့ဆုံချိန်မှာ ပြောဆိုခဲ့ပါတယ်။
အိမ်မီးရှို့ခံရမှုတွေနဲ့ ပတ်သက်လို့ စာရင်းပြုစုနေတဲ့ Data For Myanmar အဖွဲ့ကတော့ စစ်အာဏာသိမ်းပြီးနောက်ပိုင်း စစ်ကိုင်းတိုင်းမှာ နေအိမ် ၂၀,၁၅၃ လုံးကို စစ်ကောင်စီ တပ်တွေနဲ့ သူ့ရဲ့လက်အောက်ခံ အဖွဲ့အစည်းတွေက မီးရှို့ဖျက်ဆီးခဲ့ကြတယ်လို့ သြဂုတ်လ ၂၇ ရက်မှာ သတင်းထုတ်ပြန်ခဲ့ပါတယ်။
