ရခိုင်ပြည်နယ်က မြို့နယ်တွေနဲ့ ချင်းပြည်နယ်၊ ပလက်ဝမြို့နယ်က ရွာတွေကို စစ်ကောင်စီ တပ်က လက်နက်ကြီးနဲ့ ပစ်ခတ်တာအပြင် စားနပ်ရိက္ခာ ပြတ်တောက်အောင် လုပ်ဆောင် နေတာတွေကို ရှုတ်ချတယ်လို့ ရက္ခိုင်ပြည် ကျောင်းသားသမဂ္ဂက ဩဂုတ်လ ၂၈ ရက်၊ မနေ့က ထုတ်ပြန်ပါတယ်။
စစ်ကောင်စီတပ်ဟာ ရသေ့တောင်၊ ဘူးသီးတောင်၊ မောင်တောလမ်းနဲ့ ပလက်ဝ မြို့နယ်မှာလည်း အသွား၊ အလာ ကန့်သတ်ပိတ်ပင်ထားပြီး စစ်ရာဇဝတ်မှုတွေကို ဆက်တိုက် ကျူးလွန်နေတယ်လို့လည်း ထုတ်ပြန်ချက်မှာ ဖော်ပြထားပါတယ်။
စစ်ကောင်စီရဲ့ လုပ်ရပ်တွေဟာ လူမဆန်တဲ့ လုပ်ရပ်ဖြစ်တဲ့အတွက် ရှုတ်ချတာလို့ ရက္ခိုင်ပြည် ကျောင်းသားသမဂ္ဂက သတင်းနဲ့ ပြန်ကြားရေးတာဝန်ခံ ကိုဦးသန်းနိုင်က RFA ကို ပြောပါတယ်။
“အခု စစ်ကောင်စီတပ်နဲ့ AA တို့ တိုက်ပွဲဖြစ်တယ်။ စစ်ကောင်စီတပ်က လမ်းတွေကို ပိတ်ထားတယ်။ ရိက္ခာတွေ ဖြတ်တောက်ထားတယ်။ ကျေးရွာတွေကို လက်နက်ကြီးတွေ နဲ့ ပစ်တယ်။ ပြည်သူတွေ ထိခိုက်ဒဏ်ရာရကြတယ်။ သေဆုံးကြတယ်။ ပြီးတော့ ပြည်သူတွေကို ဖမ်းဆီးတယ်။ ဘာမှလည်း သတင်း အစအနမရဘူး။ တရားရုံးကိုလည်း မရောက်ဘူး။ ဒါဟာ လူမဆန်တဲ့ လုပ်ရပ်ဖြစ်တယ်။ ဒါကြောင့် ကျနော်တို့အနေနဲ့ ရှုတ်ချတာပါ”
စစ်ကောင်စီတပ်ရဲ့ လုပ်ရပ်တွေကို မျက်ကွယ်ပြုထားတဲ့ ရခိုင်ပြည်နယ်က စစ်ကောင်စီခန့် ဝန်ကြီးတွေကိုလည်း ရှုတ်ချတယ်လို့ ထုတ်ပြန်ချက်မှာ ပါရှိပါတယ်။
ဒါ့အပြင် စစ်ကောင်စီရဲ့ လူ့အခွင့်အရေးချိုးဖောက်မှုတွေနဲ့ စစ်ရာဇဝတ်မှုတွေကို အမြန်ဆုံး အပြစ်ပေး၊ အရေးယူပြီး ပြည်သူတွေအတွက် တရားမျှတမှု ရှာဖွေပေးဖို့ကို ကုလသမဂ္ဂ အပါအဝင် နိုင်ငံတကာ အဖွဲ့အစည်းတွေကိုလည်း တောင်းဆိုတယ်လို့ ရက္ခိုင်ပြည် ကျောင်းသားသမဂ္ဂက ပြောပါတယ်။
ရခိုင်ပြည်နယ်နဲ့ ချင်းပြည်နယ် ပလက်ဝမြို့နယ်တွေမှာ ပြီးခဲ့တဲ့ ဇူလိုင်လကစလို့ စစ်ကောင်စီတပ်နဲ့ ရက္ခိုင့်တပ်တော် (AA) တို့ တစ်ကျော့ပြန်တိုက်ပွဲတွေ ပြန်ဖြစ်နေတာ ကြောင့် ပြီးခဲ့တဲ့ ဩဂုတ်လ ၁၃ ရက်နေ့ကစပြီး ရသေ့တောင်၊ မောင်တော၊ ဘူးသီးတောင် လမ်းကို စစ်ကောင်စီတပ်ဘက်က ရက်အကန့်အသတ်မရှိ ပိတ်ထားပါတယ်။
အခုလို စစ်ကောင်စီတပ်က လမ်းတွေကို ပိတ်ထားတာ၊ လက်နက်ကြီးကျည်ကြောင့် ဒေသခံတွေ ထိခိုက်ဒဏ်ရာရတာ စတာတွေနဲ့ ပတ်သက်ပြီး ရခိုင်ပြည်နယ် စစ်ကောင်စီ ပြောခွင့်ရ ပြည်နယ်ဥပဒေချုပ် ဦးလှသိန်းကို RFA က မေးမြန်းခဲ့ပေမယ့် သူ့အနေနဲ့ တစ်စုံတစ်ရာ မသိရှိကြောင်းသာ ဖြေဆိုခဲ့ပါတယ်။
ပြီးခဲ့တဲ့ ဩဂုတ်လ ၂ ရက်နေ့ကလည်း ပလက်ဝမြို့နယ်မှာ ကျောင်းသူ၊ ကျောင်းသား ကလေးငယ်တွေ လိုက်ပါလာတဲ့ စက်လှေတစ်စင်းကို စစ်ကောင်စီတပ်က ပစ်ခတ်ခဲ့တာ ကြောင့် ကလေးနှစ်ဦး သေဆုံးပြီး ကလေး နှစ်ဦးနဲ့ ဒေသခံ သုံးဦး ဒဏ်ရာရခဲ့ပါတယ်။
မနေ့ကလည်း မြောက်ဦးမြို့နယ် ကင်းဆိပ်ရွာမှာ စစ်ကောင်စီတပ်က ပစ်လိုက်တဲ့ လက်နက်ကြီးကျည် ကျရောက်ပေါက်ကွဲတာကြောင့် အသက် ငါးနှစ်အရွယ် ကလေး တစ်ဦးနဲ့ ဒေသခံ နှစ်ဦး သေဆုံးခဲ့ပြီး ခုနစ်ဦး ဒဏ်ရာရခဲ့တယ်လို့ မိသားစုဝင်တွေက RFA ကို ပြောပါတယ်။
