အာဆီယံအလှည့်ကျဥက္ကဋ္ဌရဲ့ မြန်မာနိုင်ငံဆိုင်ရာ အထူးကိုယ်စားလှယ်ဖြစ်တဲ့ ကမ္ဘောဒီးယား နိုင်ငံခြားရေးဝန်ကြီး ပရက်ဆော့ခွန်းက ဒေါ်အောင်ဆန်းစုကြည်ကို မူလထိန်းသိမ်းထားတဲ့ နေအိမ်မှာပဲ ပြန်ထားဖို့ တောင်းဆိုလိုက်ပါတယ်။
နေပြည်တော် အချုပ်ထောင်ထဲ ပြောင်းရွှေ့တဲ့အပေါ် အာဆီယံအဖွဲ့ဝင်နိုင်ငံတွေအနေနဲ့ အလွန်အမင်း စိုးရိမ်တဲ့အပြင် မူလနေအိမ်မှာပဲထားဖို့ စစ်ကောင်စီနိုင်ငံခြားရေးဝန်ကြီး ဦးဝဏ္ဏမောင်လွင်ထံ စာပေးပို့တောင်းဆိုထားတာလို့ ဇွန်လ ၂၇ ရက် ဒီကနေ့ ကမ္ဘော ဒီးယား နိုင်ငံခြားရေးဝန်ကြီးဌာနက သတင်းထုတ်ပြန်ခဲ့ပါတယ်။
စစ်ကောင်စီဟာ ဒေါ်အောင်ဆန်းစုကြည်ကို နေပြည်တော်အချုပ်ထောင်ထဲက သီးသန့်ဆောင်ကို ယခု ဇွန်လ ၂၂ ရက်နေ့ နေ့လယ်ပိုင်းမှာပဲ ပြောင်းရွှေ့လိုက်တာ ဖြစ်ပါတယ်။
နိုင်ငံရေးဆွေးနွေးပွဲတွေကနေတစ်ဆင့် မြန်မာနိုင်ငံ မူလအခြေအနေပြန်ရောက်ဖို့နဲ့ အမျိုးသားရင်ကြားစေ့ရေး ဖြစ်စဉ်အတွင်း အရေးပါတဲ့အခန်းကဏ္ဍမှာ ပါဝင်တဲ့သူအဖြစ် ဒေါ်အောင်ဆန်းစုကြည်ကို ပြည်တွင်းနဲ့ နိုင်ငံတကာက မှတ်ယူထားတယ်လို့လည်း ဦးဝဏ္ဏမောင်လွင်ကို ပေးပို့ခဲ့တဲ့ အာဆီယံအထူးကိုယ်စားလှယ်ရဲ့ စာမှာ ရေးသားဖော်ပြ ထားပါတယ်။
ပဋိပက္ခနဲ့ သက်ဆိုင်တဲ့အဖွဲ့အစည်းတစ်ခုကို ပဋိပက္ခဖြေရှင်းရေးလုပ်ငန်းစဉ်ကနေ ဖယ်ထုတ်လိုက်ရင် ငြိမ်းချမ်းတဲ့ အမျိုးသားပြန်လည်ရင်ကြားစေ့ရေးကို မျှော်လင့်နိုင်မှာ မဟုတ်ဘူးလို့လည်း အထူးကိုယ်စားလှယ်က ပြောထားပါတယ်။
အာဆီယံအထူးကိုယ်စားလှယ်ဟာ အခု ဇွန်လ ၂၉ ရက်နဲ့ ၃၀ ရက်နေ့တွေမှာ မြန်မာနိုင်ငံကို ဒုတိယအကြိမ် ခရီးစဉ်အဖြစ်လာရောက်ဖို့ရှိပြီး လူသားချင်းစာနာမှုဆိုင်ရာ အကူအညီပေးရေးကိစ္စတွေအပါအဝင် အာဆီယံ ဘုံသဘောတူညီချက် ငါးချက် အကောင် အထည်ဖော်ရေးကို ဆွေးနွေးသွားဖို့ရှိတယ်လို့ နိုင်ငံတကာသတင်းတွေက ဖော်ပြထား ပါတယ်။
ဒီခရီးစဉ်အတွင်း ဒေါ်အောင်ဆန်းစုကြည်နဲ့ တွေ့ခွင့်ရဖို့ အာဆီယံအလှည့်ကျဥက္ကဋ္ဌ ကမ္ဘောဒီးယားဝန်ကြီးချုပ် ဟွန်ဆန်နဲ့ အာဆီယံအထူးကိုယ်စားလှယ် ပရက်ဆော့ခွန်းတို့က စစ်ကောင်စီထံ တောင်းဆိုထားပေမယ့် စစ်ကောင်စီ ပြောခွင့်ရ ဗိုလ်ချုပ် ဇော်မင်းထွန်း ကတော့ အမှုရင်ဆိုင်နေရတဲ့သူတွေနဲ့ တွေ့ခွင့်ပြုမှာမဟုတ်ဘူးလို့ RFA ကို ဖြေဆိုထား ပါတယ်။
