စစ်ကိုင်းတိုင်း၊ ရွှေဘိုမြို့နယ်ထဲက မူးကမ်းကြီးရွာ အပါအဝင် ရွာငါးရွာက အိမ်ပေါင်း ၂၇၀ ကျော် ဟာ ပြီးခဲ့တဲ့ ဇွန်လ ၁၁ ရက်ကနေ ၁၅ ရက်အထိ ငါးရက်အတွင်း မီးရှို့ဖျက်ဆီးခံခဲ့ရတယ်လို့ ဒေသခံတွေက ပြောပါတယ်။
တပ်မ ၈၈ တံဆိပ်ပါ စစ်ကောင်စီတပ်သား ၁၀၀ ခန့်ဟာ ပြီးခဲ့တဲ့ ဇွန်လ ၁၁ ရက်ကစလို့ ရွှေဘို မြို့နယ်၊ ရွာဆိုးကျေးရွာအုပ်စုက ပေါက်ချိုင်ရွာကို ဝင်ရောက်လာပြီး အဲဒီနေ့ကစပြီး ရွာတွေ မီးရှို့ခံရတာလို့ အမည်မဖော်လိုတဲ့ ဒေသခံတစ်ဦးက RFA ကို ပြောပါတယ်။
” ၁၁ ရက်နေ့က ပေါက်ချိုင်ရွာ၊ ၁၄ နဲ့ ၁၅ ရက်က မူးကမ်းကြီး၊ ရေကြည်ဝရွာရယ်၊ ထည်ပင်ရယ်ပေါ့။ ပထမ ပေါက်ချိုင်ထဲ ဝင်လာတာက တိုက်ပွဲမဖြစ်သေးဘဲ နယ်မြေ ရှင်းလင်းရေး သဘောမျိုးနဲ့ ဝင်လာတာဗျ။ ရွာထဲမှာ မိုင်းတွေ ဘာတွေ ထိတာတော့ရှိတယ်။ ပေါက်ချိုင်မှာ တစ်ညအိပ်ပြီးတော့ မီးရှို့ပြီး ထည်ပင်ဘက်ကို ထွက်လာတာပေါ့”
စစ်ကောင်စီတပ်ရဲ့ မီးရှို့ခဲ့တာကြောင့် မူးကမ်းကြီးရွာက အိမ် ၁၅၈ လုံး၊ ပေါက်ချိုင်ရွာက ၁၀၇ လုံး၊ ထည်ပင်ရွာက သုံးလုံး၊ သန်းတောရွာက နှစ်လုံးနဲ့ ရေကြည်ဝရွာက အိမ် နှစ်လုံး၊ စုစုပေါင်း နေအိမ် ၂၇၂ လုံး မီးလောင်ကျွမ်းခဲ့ရတယ်လို့ အဲဒီဒေသခံက ပြောပြပါတယ်။
အဲဒီမီးရှို့ခံခဲ့ရတဲ့ ရွာငါးရွာဟာ တစ်ရွာကို အိမ်ခြေ ၂၀၀ ကနေ ၃၀၀ ဝန်းကျင်အထိ အသီးသီး ရှိကြတဲ့ရွာတွေဖြစ်ကြပြီး လက်ရှိမှာ ဒီရွာတွေ အပါအဝင် အနီးတစ်ဝိုက်ရွာတွေက ဒေသခံရွာသား ၆၀၀၀ ဝန်းကျင်ဟာလည်း နေရပ်စွန့်ခွာ ထွက်ပြေးနေကြရတယ်လို့ သူက ပြောပါတယ်။
လက်ရှိမှာ အဲဒီစစ်ဘေးဒုက္ခသည်တွေအတွက် စားနပ်ရိက္ခာနဲ့ ဆေးဝါးအကူအညီတွေ လိုအပ်နေတယ်လို့ သူက ဆိုပါတယ်။
ဒေသခံကာကွယ်ရေးတပ် PDF တပ်ဖွဲ့ဝင်တွေပေါင်းပြီး စစ်ကောင်စီတပ်ကို ထည်ပင်ရွာအနီးမှာ ပြီးခဲ့တဲ့ ဇွန်လ ၁၂ ရက် နဲ့ ၁၃ ရက်တွေမှာ တိုက်ခိုက်ခဲ့တယ်လို့ Snake Eyes PDF အဖွဲ့က ပြောပါတယ်။
အဲဒီဖြစ်စဉ်တွေနဲ့ ပတ်သက်လို့ RFA က သီးခြားအတည်မပြုနိုင်ဘဲ စစ်ကောင်စီဘက်ကလည်း ထုတ်ပြန်တာမျိုး မတွေ့ရသေးပါဘူး။
စစ်တပ်က အာဏာသိမ်းပြီးနောက်ပိုင်း တစ်နိုင်ငံလုံးအတိုင်းအတာအရ နေအိမ် အဆောက် အအုံပေါင်း ၁၈၈၈၆ လုံးဟာ စစ်ကောင်စီတပ်နဲ့ လက်အောက်ခံအဖွဲ့တွေကြောင့် မီးလောင် ကျွမ်းခဲ့ရပြီး အဲဒီထဲက ၁၃၀၀၀ ကျော်ဟာ စစ်ကိုင်းတိုင်းထဲက ဖြစ်နေတာကို Data For Myanmar ရဲ့ ဇွန် ၇ ရက်နေ့ စာရင်းတွေအရ တွေ့ရပါတယ်။
