မြန်မာနိုင်ငံမှာ စစ်အာဏာသိမ်းပြီးနောက်ပိုင်း စစ်ကောင်စီတပ်ဖွဲ့ဝင်တွေနဲ့ တိုင်းရင်းသားလက်နက်ကိုင်တွေ၊ PDF အကြား တိုက်ပွဲတွေဖြစ်ပွားနေချိန် လိင်ပိုင်းဆိုင်ရာ အကြမ်းဖက်မှု တိုင်ကြားချက်တွေဟာ သိသိသာသာ မြင့်တက်ခဲ့တယ်လို့ ကုလသမဂ္ဂက ပြောဆိုလိုက်ပါတယ်။
ဇွန်လ ၁၉ ရက်နေ့မှာကျရောက်တဲ့ ပဋိပက္ခတွေအတွင်း လိင်ပိုင်းဆိုင်ရာ အကြမ်းဖက်မှု ပပျောက်ရေး အပြည်ပြည်ဆိုင်ရာနေ့မှာ – ကုလသမဂ္ဂအတွင်းရေးမှူးချုပ်ရဲ့ ပဋိပက္ခတွေအတွင်း လိင်ပိုင်းအကြမ်းဖက်မှုဆိုင်ရာ အထူးကိုယ်စားလှယ်က အစီရင်ခံစာ ထုတ်ပြန်ခဲ့ပြီး၊ ဒီအစီရင်ခံစာထဲမှာ မြန်မာနိုင်ငံနဲ့ပတ်သက်လို့ ဖော်ပြထားတာပါ။
ဆန္ဒပြမှုတွေနဲ့ စစ်အာဏာရှင်ဆန့်ကျင်ရေး လှုပ်ရှားမှုတွေကို တုံ့ပြန်တဲ့အနေနဲ့ စစ်တပ်နဲ့ရဲတပ်ဖွဲ့က ဆန္ဒပြသူတွေနဲ့ စာနယ်ဇင်းသမားတွေအပေါ် လိင်ပိုင်းဆိုင်ရာ အကြမ်းဖက်မှုတွေအပါအဝင် အင်အား အလွန်အကျွံ သုံးခဲ့တယ်လို့လည်း ထောက်ပြထားပါတယ်။
လှုပ်ရှားမှုတွေမှာ ထင်ရှားတဲ့ ဦးဆောင်မှုအခန်းကဏ္ဍက ကျန်းမာရေးပညာရှင်တွေ၊ ဆရာမတွေနဲ့ အမျိုးသမီးတွေကို ပစ်မှတ်ထားခဲ့ပြီး၊ ဆေးရုံအပါအဝင် ကျန်းမာရေးစောင့်ရှောက်မှုဋ္ဌာနတွေကို စစ်တပ်က ဝင်ရောက် နေရာယူထားတဲ့အတွက် အဓမ္မပြုကျင့်ခံရသူတွေအပေါ် ကုသမှုနဲ့ သန္ဓေတားဆီးရေး ဝန်ဆောင်မှုတွေမှာ အဟန့်အတား ဖြစ်ခဲ့ရတာပါ။
ဒါ့အပြင် ၂ဝ၁၇ ခုနှစ်က မြန်မာစစ်တပ်ရဲ့ နယ်မြေရှင်းလင်းမှု စစ်ဆင်ရေးအတွင်း ဘင်္ဂလားဒေ့ရှ်နိုင်ငံကို ထွက်ပြေးခဲ့ကြရတဲ့ ရိုဟင်ဂျာဒုက္ခသည်တွေအနေနဲ့လည်း တရားဝင် အလုပ်လုပ်ခွင့်မရတာကြောင့် လူကုန်ကူးခံရမယ့် အန္တရာယ်နဲ့ ခေါင်းပုံဖြတ် အမြတ်ထုတ်ခံရမယ့်အန္တရာယ် ပိုများလာတယ်လို့လည်း ထောက်ပြထားပါတယ်။
ဒီဒုက္ခသည်စခန်းတွေက စခန်းခေါင်းဆောင်တွေဆီ တိုင်ကြားတဲ့ လိင်ပိုင်းဆိုင်ရာ အကြမ်းဖက်မှုတွေဆိုရင်လည်း ထုံးတမ်းစဉ်လာအရ ကျူးလွန်ခံရသူတွေကို ကျူးလွန်တဲ့သူတွေနဲ့ ပြန်ပြီး လက်ထပ်ဖို့ တွန်းအားပေးတဲ့ အန္တရာယ် မြင့်တက်လာနေတယ်လို့ ဆိုပါတယ်။
ဒါကြောင့် ဒီကနေ့ကျရောက်တဲ့ ပဋိပက္ခတွေအတွင်း လိင်ပိုင်းဆိုင်ရာ အကြမ်းဖက်မှု ပပျောက်ရေး အပြည်ပြည်ဆိုင်ရာနေ့မှာ – လိင်ပိုင်းဆိုင်ရာ အကြမ်းဖက်မှုလုပ်ရပ်အားလုံး ချက်ချင်းရပ်ဖို့နဲ့ လိင်ပိုင်းဆိုင်ရာ အကြမ်းဖက်ခံရသူတွေဆီ လူသားချင်းစာနာမှု အကူအညီတွေ အခက်အခဲမရှိ ချက်ချင်းရောက်နိုင်ဖို့အတွက်ကို ကုလသမဂ္ဂက တောင်းဆိုထားပါတယ်။
