ထိုင်း- မြန်မာ နယ်စပ်ဒေသမှာ လက်ရှိဖြစ်ပွါးနေတဲ့ တိုက်ပွဲတွေကြောင့် ကရင်ပြည်နယ်ထဲကနေ ထိုင်းဘက်ကို ထွက်ပြေးခိုလှုံကြတဲ့ မြန်မာနိုင်ငံသား ၃၀၀၀ ကျော်အတွက် အကူအညီတွေပေးရေး အရေးပေါ်သွားရောက်ခွင့်ပြုဖို့ ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး UNHCR က ထိုင်းအစိုးရကို တနင်္လာနေ့မှာ ပန်ကြားလိုက်ပါတယ်။
ဖေဖေါ်ဝါရီလမှာ အရပ်သားအစိုးရကို ဖြုတ်ချပြီး စစ်တပ်အာဏာသိမ်းတာကို လက်မခံတဲ့ KNU ကရင်လက်နက်ကိုင်တပ်ဖွဲ့ နဲ့ မြန်မာစစ်တပ် တို့ကြား ထိုင်းမြန်မာနယ်စပ် လေးကေကော်ဒေသမှာ မကြာခင်ရက်ပိုင်းမှာပဲ တိုက်ပွဲတွေ စတင်ခဲ့တာပါ။ တိုက်ပွဲတွေကြောင့် ကြာသပတေးနေ့က ထိုင်းနိုင်ငံ တာခ့် ပြည်နယ်ထဲကို စစ်ရှောင် မြန်မာဒုက္ခသည် ၇၀၀ လောက် နယ်စပ်မြစ်ကြောင်းကို ဖြတ်ကျော် ထွက်ပြေးလာသလို တိုက်ပွဲဆက်ဖြစ်နေတဲ့အတွက် တနင်္လာနေ့မှာအထိဆို ဒုက္ခသည်က ၃၉၀၀ လောက် အထိ တိုးလာနေတယ်လို့ UNHCR က ကြေညာချက် ထုတ်ပြန်ပြောဆိုပါတယ်။
ဒီဒုက္ခသည်တွေ အတွက် UNHCR က စိုးရိမ်ကြောင်းနဲ့ သူတို့ကို အမြန် အကူညီပေးခွင့်ပြုဖို့ UNHCR ကရော NGO အဖွဲ့တွေကပါ ထိုင်းအာဏာပိုင်တွေကို ပန်ကြားခဲ့တယ်လို့လည်း ဖေါ်ပြထားပါတယ်။
တာခ် ပြည်နယ်အာဏာပိုင်တွေကတော့ နယ်စပ်မှာ တိုက်ပွဲတွေရပ်သွားပုံ ပေါ်ခဲ့ချိန်ကစပြီး ဒုက္ခသည် ဒါဇင်နဲ့ချီပြီး တဖြေးဖြေး နေရပ်ပြန်နေကြတာကြောင့် ထိုင်းနိုင်ငံဘက်ခြမ်းက နေရာ ၂ နေရာမှာ ဒုက္ခသည် ၃၅၀၀ လောက်ပဲ ကျန်တော့တယ်လို့ တနင်္လာနေ့ ညနေပိုင်းမှာ ပြောပါတယ်။ ဒါ့အပြင် သူတို့သဘောနဲ့သူတို့ နေရပ်ပြန်တဲ့ မြန်မာဒုက္ခသည်တွေအတွက် သောင်ရင်းမြစ်ကမ်းကနေ နေရပ်ပြန်ဖို့ရော လူသားချင်းစာနာမှု အကူညီတွေပါ ပေးနေကြောင်း ကြေညာချက်ထုတ်ပြန်ခဲ့ပါတယ်။
ကရင်အမျိုးသမီးအစည်းအရုံး KWO က နော်ကညောဖော ကတော့ တိုက်ပွဲတွေ တချို့နေရာတွေမှာ ဆက်လက်ဖြစ်ပွါးနေသလို တိုက်ပွဲပြင်းထန်တဲ့အတွက် အများစုက ကြောက်လန့်စိုးရိမ်နေကြ ကြောင်းပြောတယ်လို့ AFP မှာ ဖေါ်ပြထားပါတယ်။
ထိုင်းမြန်မာနယ်စပ် မယ်ထော်သလေးဘက်မှာလည်း တိုက်ပွဲတွေ ဖြစ်လာတဲ့အတွက် တနင်္ဂနွေနေ့မှာပဲ နောက်ထပ် ဒေသခံ ၁၅၀၀ လောက် ထိုင်းဘက် ထွက်ပြေးခိုလှုံခဲ့ကြတာပါ။ စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကတော့ မယ်ထော်သလေးဘက်မှာ တနင်္လာနေ့က တိုက်ပွဲဖြစ်ခဲ့ပြီး အခြေနေကိုထိန်းနိုင်ဖို့ KNU နဲ့ ညှိနှိုင်းနေတယ်လို့ ပြောကြောင်းလည်း ဖေါ်ပြထားပါတယ်။
