အစားအသောက်နှင့် ဆေးဝါးပစ္စည်းများ လိုအပ်ပါက အဝါရောင်အမှတ်အသားပြု အလံထောင်ထားခြင်းဖြင့် ဘေးပတ်ဝန်းကျင်မှ တွေ့ရှိကာ အဆင့်ဆင့် ဆက်သွယ်ကူညီပေးနိုင်မည်ဖြစ်သည်
ရန်ကုန်မြို့တွင် ကိုဗစ်နိုင်တင်း (Covid-19) ကပ်ရောဂါ ကူးစက်ပြန့်ပွားမှုအခြေအနေ ဆက်လက်ဆိုးရွားလျက်ရှိရာ မိသားစုလိုက် (သို့မဟုတ်) မိသားစုဝင်အများစု မကျန်းမာသောကြောင့် နေအိမ်တိုက်ခန်းများတွင် အဝါရောင်အလံထောင်ကာ အကူအညီတောင်းခံသူ များပြားလာသည်။
ယနေ့ (ဇူလိုင် ၂၀) တွင် တောင်ဥက္ကလာ၊ တာမွေ(မေတ္တာညွန့်)၊ လှိုင်၊ မရမ်းကုန်း(သမိုင်း) ၊ ရွှေပြည်သာ ၊ သာကေတ၊ လှိုင်သာယာ အစရှိသည့် မြို့နယ်များတွင် အကူအညီလိုအပ်သူများက နေအိမ်အခန်းများရှေ့တွင် အဝါရောင်အမှတ်အသားဖြင့် အလံထောင်ထားပုံများ လူမှုကွန်ရက်တွင် တွေ့ရှိရသည်။
တောင်ဥက္ကလာပမြို့နယ် (၉) ရပ်ကွက်တွင် နေထိုင်သူ အသက် ၄၈ နှစ်အရွယ် ဒေါ်သီတာက မိသားစုလိုက် ဖျားနာပြီး ချောင်းဆိုးခြင်း၊ အနံ့ပျောက်ခြင်း၊ သွေးတွင်းအောက်စီဂျင်ကျခြင်းများကြောင့် အဝါရောင်အလံထောင်ကာ အကူအညီတောင်းခံခဲ့သည်ဟု ဆိုသည်။
“ကျွန်မတို့မှာ မိသားစုဝင် သုံးယောက်ရှိတာ။ သုံးယောက်လုံး ကိုဗစ်ဖြစ်နေလို့ အကူအညီတောင်းတာ ဖြစ်ပါတယ်။ အလံဝါထောင်တဲ့အကြောင်းရင်းကတော့ အွန်လိုင်းမှာ လူငယ်တွေတင်ထားတဲ့ အဝါရောင်ကမ်ပိန်းဆိုတဲ့ ပို့စ်တစ်ခုကို တွေ့မိတာနဲ့ အလံထောင်ဖြစ်တာပါ” ဟု ၎င်းက ပြောသည်။
အဝါရောင်အလံထောင်ပြီးနောက် အမှန်တကယ် အကူအညီရခဲ့ကြောင်းလည်း အသက် ၅၄ နှစ်အရွယ် ခင်ပွန်း၊ ၁၄ နှစ်အရွယ် သမီးတို့နှင့်အတူ မိသားစုတစ်ခုလုံး နေထိုင်မကောင်းဖြစ်နေသည့် ဒေါ်သီတာက ပြောသည်။
အလားတူ အဝါရောင်အလံထောင်၍ အကူအညီတောင်းခံခဲ့သူ တာမွေမြို့နယ် မေတ္တာညွန့်ရပ်ကွက်နေ အမျိုးသားတစ်ဦးကလည်း ၎င်းတို့မိသားစုဝင်သုံးဦးစလုံး ကိုဗစ်ကူးစက်ခံထားရသည်ဟု ပြောသည်။
“ကျွန်တော်နဲ့ ကျွန်တော့်အမေက ဖျားပြီး ၁၁ ရက်လောက်မှာ သက်သာလာပြီ။ ဒါပေမဲ့ ကျွန်တော့်အဖေက ခုထိ အောက်စီဂျင်ပေးထားရတုန်း။ သူက အောက်စီဂျင် လုံးဝအပြတ်ခံလို့မရဘူး။ တောက်လျှောက်တပ်ထားရတယ်။ ကျွန်တော်ကိုယ်တိုင်ကလည်း ခုမှ သက်သာလာတာဆိုတော့ အဖေအမေတို့ရဲ့ ဝေယျာဝစ္စကို အားလုံးလိုက်မလုပ်နိုင်ဘူးလေ။ ဒါကြောင့် အကူအညီတောင်းရတာပါ” ဟု ၎င်းက ဆိုသည်။
မိဘနှစ်ပါးမှာ အသက် ၅၀ ကျော်အရွယ်များဖြစ်ပြီး တစ်မိသားစုလုံး ၁၀ ရက်ကျော် ကိုဗစ်နောက်ဆက်တွဲ ဝေဒနာများကို ခံစားထားရသောကြောင့် လိုအပ်သည့် အောက်စီဂျင်အပါအဝင် အစားအသောက်နှင့် ဆေးဝါးများအတွက် အကူအညီလိုအပ်နေသည်ဟုလည်း အဆိုပါအမျိုးသားက ဆိုသည်။
ဗဟန်းမြို့နယ်အပါအဝင် ဆက်စပ်မြို့နယ်များသို့ “ပြည်သူမှ ပြည်သူသို့” အစီအစဉ်ဖြင့် အကူအညီပေးနေသည့် ဗဟန်းစေတနာ့ဝန်ထမ်း လူငယ်များအဖွဲ့ဝင်တစ်ဦးက ယနေ့နံနက်ပိုင်း၌ပင် ၎င်းတို့အဖွဲ့ထံ ဆက်သွယ်အကူအညီတောင်းခံလာသည့် မိသားစုသုံးစုရှိပြီဖြစ်ကြောင်း ပြောသည်။
“လူငယ်တွေစုဖွဲ့ပြီး ဒီအစီအစဉ်လေးလုပ်ဖြစ်တာ ၄ ရက်လောက်ရှိပြီ။ ကျွန်တော်တို့အားလုံးက ကျောင်းသားတွေဖြစ်တော့ ကိုယ်ရတဲ့မုန့်ဖိုးလေးတွေ၊ တချို့ စေတနာနဲ့ကူညီပေးတာလေးတွေနဲ့ စုပေါင်းပြီး ပြည်သူမှ ပြည်သူသို့ အစီအစဉ်လေးလုပ်ဖြစ်တာ” ဟု အထက်ပါလူငယ်အဖွဲ့က ပြောသည်။
၎င်းက ဆက်လက်ပြီး “အစားအသောက်၊ ဆေးဝါးလိုအပ်တာဖြစ်ဖြစ်၊ အိမ် ဒါမှမဟုတ် အခန်းကို ဆေးဖျန်းချင်တာဖြစ်ဖြစ် ကျွန်တော်တို့ အခမဲ့လုပ်ဆောင်ပေးပါတယ်။ အဓိကကတော့ ခက်ခဲနေတဲ့ ခုလိုကာလမှာ ပြည်သူအတွက် ပြည်သူတွေပဲရှိတယ်ဆိုတဲ့စိတ် တတ်နိုင်သမျှ ကူညီပေးနေတာဖြစ်ပါ တယ်” ဟု ပြောသည်။
စစ်အုပ်ချုပ်ရေးကြေညာခံထားရသည့် လှိုင်သာယာမြို့နယ်၊ (၁၃) ရပ်ကွက်၊ စစ်တွေလမ်း၊ ပင်လုံဈေးအနီး နေအိမ်တစ်ခုတွင်လည်း အဝါရောင်အလံထောင်ကာ အကူအညီတောင်းခံထားသည်ကို လူမှုကွန်ရက်တွင် တွေ့ရသည်။ အလားတူ လှိုင်မြို့နယ်၊ (၉) ရပ်ကွက်။ အင်းစိန်လမ်းမပေါ်ရှိ တိုက်ခန်းတစ်ခုတွင်လည်း အလံဝါထောင်ထားသည်ကို တွေ့ရသည်။
ထို့ပြင် မင်္ဂလာတောင်ညွန့်မြို့နယ်၊ ၉၄ လမ်း၊ ကန်တော်လေးရပ်ကွက်ရှိ နေအိမ်တိုက်ခန်းတစ်ခုတွင် အဝါ ရောင်အလံရော အဖြူရောင်အလံပါ လွှင့်တင်ထားပြီး အဖိုးအဘွားများသာ နေထိုင်သည်ဟု သိရကြောင်း သက်ထားဆွေနွယ်ဆိုသည့် အကောင့်ပိုင်ရှင်က လူမှုကွန်ရက်တွင် ရေးတင်ပြီး ထပ်ဆင့်အကူအညီ တောင်းခံထားသည်။
လက်ရှိအခြေအနေတွင် ကိုဗစ်ရောဂါကူးစက်ပြန့်ပွားမှု မြင့်တက်နေသည့် ရန်ကုန်မြို့၌ လူမသိသူမသိ နေအိမ်အတွင်းသေဆုံးမှုများလည်း ရှိလာသည်။
ဇူလိုင်လဆန်းမှ စတင်ကာ ရန်ကုန်မြို့တွင် ကိုဗစ်ကူးစက်နှုန်း မြင့်တက်လာပြီး မိသားစုလိုက် ဖျားနာနေကြသောကြောင့် နေအိမ်ပြင်ပထွက်၍ လိုအပ်သည်များဝယ်ယူရန် လူအများစုအခက်အခဲဖြစ်နေသောကြောင့် မိမိနေထိုင်ရာ နေအိမ်တိုက်ခန်းရှေ့တွင် အဝါရောင်အလံထောင်ပြီး အကူအညီတောင်းခံရေးလှုပ်ရှားမှု ပေါ်ပေါက်လာခြင်းဖြစ်သည်။
အဝါရောင်အလံ၏ အဓိပ္ပါယ်မှာ ဈေးဝယ်ပေးရန်၊ ဆေးဝယ်ရန်၊ အောက်စီဂျင်နှင့် အစားအသောက်အထိ အကူအညီလိုအပ်နေကြောင်း ညွှန်းဆိုခြင်းဖြစ်ပြီး၊ ထိုသို့အဝါရောင်အမှတ်အသားပြု အလံထောင်ထားခြင်းဖြင့် ဘေးပတ်ဝန်းကျင်မှ တွေ့ရှိကာ အဆင့်ဆင့် ဆက်သွယ်ကူညီပေးနိုင်မည်ဖြစ်သည်။
