မြန်မာ့လူ့အခွင့်အရေး အစီရင်ခံစာ AAPPB နဲ့ မိတ်ဘက်အဖွဲ့တွေ ပူးပေါင်းထုတ်ပြန်
မြန်မာနိုင်ငံတဝန်း ဖြစ်နေတဲ့ လူ့အခွင့်အရေး ချိုးဖောက်မှုတွေနဲ့ ပတ်သက်ပြီး မှတ်တမ်းတင်ထားတဲ့ အစီရင်ခံစာတစောင်ကို AAPP နိုင်ငံရေးအကျဉ်းသားများ ကူညီစောင့်ရှောက်ရေးအသင်းက ထုတ်ပြန်လိုက်ပါတယ်။
AAPP နဲ့ မိတ်ဘက်အဖွဲ့အစည်းတွေ ပူးပေါင်းပြီးတော့ သုတေသနပြု ထုတ်ပြန်လိုက်ပြီး စာမျက်နှာ ၁၅၁ မျက်နှာပါတဲ့ ဒီအစီရင်ခံစာမှာ ၂၀၁၀ ခုနှစ်ကနေ ၂၀၂၀ ခုနှစ် ဇူလိုင်လအထိ နိုင်ငံတဝန်းမှာ ဖြစ်နေတဲ့ လူ့အခွင့်အရေး ချိုးဖောက်မှုတွေကို မှတ်တမ်းတင်ပြီး သုံးသပ်ဖော်ပြထားပါတယ်။
မြန်မာနိုင်ငံမှာ ၂၀၁၅ ခုနှစ်က တနိုင်ငံလုံး အပစ်အခတ်ရပ်စဲရေး သဘောတူစာချုပ်ကို လက်မှတ်ရေးထိုးခဲ့ကြပေမယ့်လည်း နိုင်ငံတွင်း တချို့နေရာတွေမှာ တိုက်ပွဲတွေ ဆက်လက်ဖြစ်ပွားနေပြီး အဲဒီလို ပဋိပက္ခတွေအတွင်း နေထိုင်နေကြတဲ့သူတွေဟာ လူ့အခွင့်အရေး ချိုးဖောက်မှုတွေကို ဆက်လက်ကျူးလွန်ခံနေရဆဲ ဖြစ်တယ်လို့ ပြောပါတယ်။
အဲဒီလို နိုင်ငံတဝန်းက လူ့အခွင့်အရေး ချိုးဖောက်မှုတွေကို သက်ဆိုင်ရာ အစိုးရအဖွဲ့အစည်းတွေ၊ လွှတ်တော်၊ နိုင်ငံရေးပါတီ၊ အရပ်ဘက်အဖွဲ့အစည်းတွေနဲ့ ပြည်သူတွေ သိရှိပြီး လာမယ့် ၂၀၂၀ ရွေးကောက်ပွဲအလွန် ဖြစ်ပေါ်လာမယ့် အစိုးရ၊ လွှတ်တော်အနေနဲ့ လူ့အခွင့်အရေးကို အခြေခံတဲ့ ကတိကဝတ်တွေ၊ မူဝါဒတွေ၊ အစီအမံတွေနဲ့ တရားဥပဒေစိုးမိုးရေး ဖြစ်လာဖို့ ရည်ရွယ်တယ်လို့ ဆိုပါတယ်။
ဒါ့အပြင် မြေယာသိမ်းဆည်းမှု၊ တက်ကြွလှုပ်ရှားသူတွေအပေါ် ပြစ်ဒဏ်ချမှတ်မှုတွေလည်း ရှိနေတဲ့အပြင် ဥပဒေတွေကလည်း ခေတ်နဲ့မညီဘဲ တရားမျှတမှု ကင်းမဲ့နေတယ်လို့ အဲဒီအစီရင်ခံစာမှာ ပြောထားပါတယ်။
နိုင်ငံရေးအကျဉ်းသားတွေ အပါအဝင် လူ့အခွင့်အရေး ချိုးဖောက်ခံရသူတွေအတွက် ထိခိုက်နစ်နာမှုတွေကို ပြန်လည်ကုစား အလျော်ပေးတာတွေ၊ တောင်းပန်တာတွေနဲ့ ပြန်လည်ထူထောင်ရေး လုပ်ငန်းစဉ်တွေလည်း မရှိတာကြောင့် ပြန်လည်ကုစားပေးလျော်မှုဆိုင်ရာ ဥပဒေတရပ်ကို လွှတ်တော်အနေနဲ့ ပြဋ္ဌာန်းဖို့ လိုအပ်တယ်လို့ ဒီအစီရင်ခံစာမှာ တိုက်တွန်း ဖော်ပြထားပါတယ်။
