စစ်ကောင်စီဟာ အကျဉ်းထောင်တွေမှာရှိတဲ့ ရာဇဝတ်အကျဉ်းသားတွေကို လက်နက်တပ်ဆင်ပြီး အတင်းအဓမ္မ စစ်မှုထမ်းခိုင်းတာတွေ လုပ်နေတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က မတ်လ ၁၄ ရက်နေ့မှာ ထုတ်ပြန်လိုက်ပါတယ်။
အကျဉ်းသားတွေကို အဓမ္မစစ်မှုထမ်းခိုင်းတာတွေ့ရပြီး ဒီလုပ်ရပ်တွေကို ကန့်ကွက်ကြောင်း PPNM ပြောရေးဆိုခွင့်ရှိသူ ကိုသိုက်ထွန်းဦးက RFA ကိုပြောပါတယ်။
“အခုဆိုရင် အကျဉ်းထောင်ထဲမှာရှိတဲ့ အကျဉ်းသားတွေကို အလိုမတူဘဲနဲ့ အတင်းအဓမ္မ စစ်မှုထမ်းခိုင်းစေတာတွေ၊ အလုပ်ခိုင်းစေတာတွေကို စစ်ကောင်စီဘက်က လုပ်လာတာ တွေ့ရပါတယ်၊ ဒီလုပ်ရပ်ကို ဆန့်ကျင်ကန့်ကွက်တယ်၊ ဒါဟာ ရှင်နေတဲ့သူတွေကိုပါ သေတွင်းပို့တဲ့ လုပ်ရပ်လို့ ပြောချင်ပါတယ်၊ အကျဉ်းသားတွေဟာ လက်နက်ကိုင်ပြီး တိုက်ရသည့်တိုင်အောင် ဆန္ဒမရှိဘဲ တိုက်ရတဲ့အခါမျိုးမှာ အသက်သေဆုံးဖို့ ရာခိုင်နှုန်းပိုများတယ်၊ လူ့အခွင့်အရေးချိုးဖောက်ဆုံးသော ကိစ္စရပ်တွေက အကျဉ်းထောင်တွေမှာ ပိုပြီးတော့တောင် တရားလက်လွတ်လုပ်လာတဲ့ လုပ်ရပ်တွေ ပိုပြီးတွေ့လာရတယ်”
ကချင်ပြည်နယ် မိုးညှင်းအကျဉ်းထောင်မှာ ထောင်လုံခြုံရေးအတွက် ရာဇဝတ်အကျဉ်းသားတွေ လက်နက်ပေးကိုင်ပြီး လုံခြုံရေးစောင့်ခိုင်းတာနဲ့ ဗန်းမော်ထောင်ကို တော်လှန်ရေးတပ်တွေ လာရောက်တိုက်ခိုက်တဲ့အခါမှာ ခုခံကာကွယ်တဲ့နေရာမှာ ရာဇဝတ်အကျဉ်းသားတွေကို လက်နက်ပေးကိုင်ပြီး ခုခံစစ်တွေမှာ အသုံးပြုတာတွေကို အတည်ပြုထားနိုင်တယ်လို့လည်း ဆိုပါတယ်။
ဒီလို အကျဉ်းသာတွေကို အတင်းအဓမ္မစစ်မှုထမ်းခိုင်းတာ၊ ဖမ်းဆီးအကျဉ်းချခံထားရတဲ့ စစ်တပ်နဲ့ ရဲတွေကို ပြစ်ဒဏ်လွတ်ငြိမ်းတာရဖို့ စစ်တပ်မှာ တာဝန်ထမ်းဆောင်စေတဲ့ တရားမဝင်လုပ်ရပ်တွေကို ပေါ်ပေါ်တင်တင် ကျူးလွန်ပြီး အင်အားဖြည့်တင်းလာမှုကို အပြင်းအထန် ဆန့်ကျင်ကန့်ကွက်တယ်လို့ PPNM က ရေးသားထားပါတယ်။
ဒီထုတ်ပြန်ချက်နဲ့ ပတ်သက်လို့ တုံ့ပြန်ချက်ရဖို့ စစ်ကောင်စီအကျဉ်းဦးစီးဌာန ပြောခွင့်ရသူ ဒုတိယ ညွှန်ကြားရေးမှူးချုပ်ရုံးကို RFA က တယ်လီဖုန်းနဲ့ ဆက်သွယ်ခဲ့ပေမဲ့ လက်ခံဖြေဆိုတာ မရှိသေးပါဘူး။
AAPP ရဲ့ မတ်လ ၁၄ ရက်နေ့အထိ စာရင်းတွေအရ နိုင်ငံတစ်ဝန်း နိုင်ငံရေးနဲ့ဆက်စပ်ပြီး ဖမ်းဆီးခံထားရသူ သုံးသောင်းနီးပါး (၂၈,၈၄၆ ဦး) ရှိနေပြီး အဲဒီအထဲက တစ်သောင်းကျော် (၁၀,၆၂၇ ဦး) ထောင်ဒဏ်တွေ ချမှတ်ခံထားရပါတယ်။
