၎င်းအာဏာရှိစဥ် မူးယစ်ဆေးဝါးနှိမ်နှင်းမှုခေါင်းစဥ်ဖြင့် လူပေါင်းများစွာကို သတ်ဖြတ်ခဲ့မှုကြောင့် မကြာမီရက်ပိုင်းက ဖမ်းဆီးခံခဲ့ရပြီး နယ်သာလန်နိုင်ငံ သည်ဟိတ်ခ်မြို့သို့ ပို့ခံခဲ့ရသော ဖိလစ်ပိုင်သမ္မတဟောင်း ရိုဒရစ်ဂို ဒူတာတေးကို ၎င်း၏ ကိုယ်ရေးအချက်အလက်များ စစ်မေးရန် အပြည်ပြည်ဆိုင်ရာ ရာဇဝတ်မှုခုံရုံး ICC က ကနဦး တရားခွင် ကြားနာပွဲ ယနေ့မနက်က ကျင်းပခဲ့သည်။
ကြားနာပွဲတွင် အသက် ၇၉ နှစ်ရှိပြီဖြစ်သူ ဒူတာတေး၏ ကိုယ်ရေးအချက်အလက်များဖြစ်သည့် နာမည်၊ မွေးသက္ကရာဇ်နှင့် မွေးဖွားရာဇာတိတို့ကို ICC တရားသူကြီးတစ်ဦးက မေးမြန်းခဲ့သည်။ ထိုမေးမြန်းချက်များကို ရုပ်မြင်ဖန်သားပြင်မှ တစ်ဆင့် ဒူတာတေးက ဖြေကြားခဲ့သည်။
တရားခွင်တွင် ဒူတာတေး၏ ရှေ့နေဖြစ်သူက ၎င်း၏ အမှုသည်သည် ဖမ်းဆီးခံခဲ့ရစဥ် မည်သည့်ဥပဒေကြောင်းနှင့်မှ ဖြေရှင်းခွင့်မရခဲ့ကြောင်း၊ ဖမ်းဆီးခံရသည်ဟု မဆိုနိုင်ပဲ ပြန်ပေးဆွဲခံခဲ့ရသည်သာဖြစ်ကြောင်း၊ ဖိလစ်ပိုင်နိုင်ငံတွင် နိုင်ငံရေးအရလက်စားချေလိုမှုဖြင့် ဖမ်းဆီးခံခဲ့ရကြောင်းနှင့် ဖမ်းဆီးခံခဲ့ရစဥ်ကလည်း ကျန်းမာရေးစောင့်ရှောက်မှု ကောင်းစွာ မရခဲ့ကြောင်း တရားသူကြီးများကို ပြောကြားခဲ့သည်။
ဒူတာတေးကို အင်္ဂလိပ်ဘာသာဖြင့်ရေးသားထားသော ဖမ်းဝရမ်းဖတ်ပြပြီးမှ ဖမ်းဆီးခဲ့ခြင်းဖြစ်ပြီး ၎င်းသည် အင်္ဂလိပ်ဘာသာစကားကို ကျွမ်းကျင်သူလည်းဖြစ်ကြောင်းနှင့် ၎င်း၏ ကျန်းမာရေးဆိုင်ရာ စောင့်ရှောက်မှုနှင့် အခြားအခွင့်အရေးများကို တရားရုံးတော်က ဖြည့်ဆည်းပေးနေကြောင်း တရားသူကြီးက တုံ့ပြန်ပြောကြားသည်။
တရားခွင်တွင် တရားသူကြီးသုံးဦးတက်ရောက်ခဲ့ပြီး အကြီးအမှုးတရားသူကြီးမှာ ယူလီရာ အန်တိုလာ မော်တို့ (Iulia Antoanella Motoc) ဖြစ်သည်။ ယနေ့တရားခွင်သည် အမှုသည်နှင့် တရားသူကြီးများ မိတ်ဆက်ခြင်း၊ ၎င်းကို ဖမ်းဝရမ်းထုတ်ခဲ့သည့် စွပ်စွဲချက်များကို ဖတ်ပြခြင်းနှင့် အမှုကို စစ်ဆေးမည့် အချိန်ကာလကို ရှင်းပြခြင်းသာ ဖြစ်ကြောင်း တရားသူကြီးက ရှင်းပြခဲ့သည်။
ဖိလစ်ပိုင် သမ္မတဖာဒီနန်မားကို့စ်ဂျူနီယာက ဖိလစ်ပိုင်နိုင်ငံသည် နိုင်ငံတကာ ရဲတပ်ဖွဲ့ အင်တာပို၏ အဖွဲ့ဝင်ဖြစ်သည်နှင့်အညီ ဒူတာတေးအတွက် ဖမ်းဝရမ်းကို အင်တာပိုမှ ရရှိခဲ့ခြင်းကြောင့် ဖမ်းဆီးခဲ့ခြင်းသာဖြစ်ကြောင်း ရှင်းလင်းထားသည်။
လက်ရှိတွင် ဒူတာတေးကို ထောက်ခံသူများနှင့် ဆန့်ကျင်သူများ ဖိလစ်ပိုင်နိုင်ငံတွင် ဆန္ဒပြမှုများပြုလုပ်နေသည်။
ပုံများ- ICC
Myanmar Now News
