မြောက်ပိုင်းညီနောင် မဟာမိတ်(၃)ဖွဲ့၏ ၂၀၂၃ ခုနှစ်၊ အောက်တိုဘာလ (၂၇)ရက်နေ့တွင် စတင်ခဲ့သော ၁၀၂၇ စစ်ဆင်ရေးမှာ မြို့သိမ်းတိုက်ပွဲများဖြင့် အရှိန်အဟုန်ပြင်းထန်လာချိန် တရုတ်နိုင်ငံ၏ ကြားဝင် ညှိုနှိုင်းမှုကြောင့် စစ်အာဏာရှင်တပ်နှင့် ညီနောင်မဟာမိတ်(၃)ဖွဲ့ အကြား ဆွေးနွေးမှု (၃)ကြိမ် ပြုလုပ်ပြီး ၂၀၂၄ ခုနှစ်၊ ဇန်နဝါရီ (၁၁)ရက်နေ့တွင် ဟိုင်ဂင်သဘောတူညီချက်1ဖြင့် ရှမ်းမြောက်ဒေသတွင် အပစ်ရပ် ခဲ့ကြသည်။ သို့သော် စစ်အာဏာရှင်တပ်က ရှမ်းမြောက်ဒေသရှိ မြို့နယ်များကို လက်နက်ကြီးပစ်ခတ်မှု၊ လေကြောင်းတိုက်ခိုက်မှုများကို ဆက်လက် လုပ်ဆောင်ခဲ့သည်။ စစ်အာဏာရှင်တပ်၏ လုပ်ဆောင်ချက်များကြောင့် မြောက်ပိုင်းညီနောင်မဟာမိတ်အဖွဲ့များနှင့်အတူ တော်လှန်ရေးတပ်ဖွဲ့တချို့ပါဝင်ကာ ၁၀၂၇ စစ်ဆင်ရေး၏ ဒုတိယလှိုင်း အဖြစ် အပစ်ရပ်ပြီး (၄)လကျော် အကြာ ၂၀၂၄ ခုနှစ်၊ ဇွန်လ(၂၅)ရက်နေ့တွင် ကြေညာခဲ့သည်။ စစ်အာဏာရှင်တပ်က လေကြောင်း အသုံးပြု တိုက်ခိုက်မှုကို ၁၀၂၇ ဒုတိယလှိုင်းမှ စတင်၍ တိုးမြှင့် ပြုလုပ်ခဲ့သည်။2 (Graph – 1)
၂၀၂၁ ခုနှစ်၊ ဖေဖော်ဝါရီလ (၁)ရက်နေ့၊ စစ်အာဏာရှင်တပ်က အာဏာသိမ်းခဲ့ပြီးနောက် (၃)နှစ် ကျော် အတွင်း ပထမဦးဆုံးအကြိမ် နိုင်ငံခြားခရီးစဉ်အဖြစ် (၈)ကြိမ်မြောက် မဟာမဲခေါင်ထိပ်သီးအစည်းအဝေးကို တတ်ရောက်ရန် ၂၀၂၄ ခုနှစ်၊ နိုဝင်ဘာ (၅)ရက်နေ့မှ (၁၀)ရက်နေ့ အထိ တရုတ်နိုင်ငံသို့ သွားရောက်ခဲ့သည်။3 အာဏာသိမ်း စစ်ခေါင်းဆောင် တရုတ်နိုင်ငံခရီးစဉ်မှ ပြန်လာပြီး နောက်ပိုင်း နိုဝင်ဘာလ (၁၀)ရက်မှ စတင်၍ နိုဝင်ဘာလ (၃၀)ရက်နေ့ အထိ ပြည်နယ်နှင့်တိုင်းဒေသကြီး (၉)ခုတွင် လေကြောင်း အသုံးပြု တိုက်ခိုက်မှု (၃၀၆) ကြိမ် ပြုလုပ်ခဲ့ သည်။
