စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို ဖမ်းဝရမ်းထုတ်ဖို့ အပြည်ပြည်ဆိုင်ရာ ရာဇဝတ်မှုတရားရုံး (ICC) ကို လျှောက်ထားလိုက်တဲ့အပေါ် ထောက်ခံကြိုဆိုကြောင်း ရိုဟင်ဂျာ အရေးလှုပ်ရှားနေတဲ့ အဖွဲ့တွေက ကြေညာချက်တွေ ထုတ်ပြန်ပါတယ်။
ရိုဟင်ဂျာတွေကို ကျူးလွန်တဲ့ ရာဇဝတ်မှုတွေအတွက် ဗိုလ်ချုပ်မှူးကြီး မင်းအောင်လှိုင်ကို ဖမ်းဝရမ်းထုတ်ဖို့ ICC ရှေ့နေချုပ် ကာရင် အာဆက် အာမက် ခန်က ICC တရားရုံးကို နိုဝင်ဘာ ၂၇ ရက်နေ့မှာ လျှောက်ထားလိုက်တာပါ။
ဒီလျှောက်ထားချက်ကို ဗြိတိန်အခြေစိုက် မြန်မာရိုဟင်ဂျာအသင်း (BROUK) က လှိုက်လှိုက်လှဲလှဲ ကြိုဆိုကြောင်း နိုဝင်ဘာ ၂၇ ရက်နေ့မှာပဲ ကြေညာချက် ထုတ်ပြန်ပါတယ်။
စစ်ခေါင်းဆောင်ကို ဖမ်းဝရမ်းထုတ်ဖို့ ကြိုးစားမှုဟာ ရိုဟင်ဂျာတွေတင်မက မြန်မာနိုင်ငံသားအားလုံးအတွက် ကောင်းတဲ့ ဆောင်ရွက်ချက်ဖြစ်ကြောင်း BROUK ဥက္ကဋ္ဌ ဦးထွန်းခင်က ပြောပါတယ်။
“မြန်မာစစ်တပ်က လူသားမျိုးနွယ်အပေါ်မှာ ကျူးလွန်တဲ့ ရာဇဝတ်မှုတွေ တောက်လျှောက်လုပ်နေတာ နှစ်ပေါင်းများစွာရှိပြီ၊ အဲအတွက်ကြောင့် ဒီလိုမျိုး လျှောက်ထားချက်မထွက်လာခဲ့ဘူး၊ ဒီနေ့မှ လျှောက်ထားချက်ထွက်လာတယ်ဆိုတာ ဒါဟာ တကယ်ကို အားရစရာကောင်းတယ်၊ ရိုဟင်ဂျာတွေအတွက်ပဲမဟုတ်ဘူး မြန်မာနိုင်ငံမှာရှိနေတဲ့ နိုင်ငံသူ၊ နိုင်ငံသားအားလုံးအတွက် ကောင်းတဲ့ဆောင်ရွက်ချက် ဖြစ်ပါတယ်”
အာရက္ခတပ်တော် (AA) အနေနဲ့လည်း ရိုဟင်ဂျာတွေကို အကြမ်းဖက် ဖိနှိပ်တာတွေ မလုပ်ဖို့ စစ်ခေါင်းဆောင်ကို ဖမ်းဝရမ်းထုတ်ဖို့ ဆောင်ရွက်ချက်ကို ကြည့်ပြီး သတိပြုရမယ်လို့ ဦးထွန်းခင်က ပြောပါတယ်။
အလားတူ ဗြိတိန်အခြေစိုက် Burma Campaign UK အဖွဲ့ကလည်း ဗိုလ်ချုပ်မှူးကြီး မင်းအောင်လှိုင်ကို ဖမ်းဝရမ်းထုတ်ဖို့ လျှောက်ထားချက်ကို ကြိုဆိုကြောင်း ထုတ်ပြန်ပါတယ်။
မြန်မာစစ်တပ်ဟာ နိုင်ငံတကာဥပဒေတွေ ချိုးဖောက်မှုတွေရဲ့ နောက်ဆက်တွဲ အရေးယူခံရတာတွေကို မခံစားရဘဲ ဆယ်စုနှစ် တွေကြာအောင် လွတ်မြောက်နေခဲ့ကြောင်းနဲ့ တရားမျှတမှု ရဖို့ တဖြည်းဖြည်းနဲ့ နီးကပ်လာပေမဲ့ ဒီကိစ္စက ရေရှည်သွားရမဲ့ ခရီးဖြစ်ကြောင်း Burma Campaign UK ရဲ့ အမှုဆောင်ဒါရိုက်တာ Anna Roberts က ထုတ်ပြန်ချက်မှာ ထည့်သွင်းပြောဆိုထားပါတယ်။
ဒီထုတ်ပြန်ချက်နဲ့ပတ်သက်ပြီး စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကို RFA က ဖုန်းနဲ့ဆက်သွယ်မေးမြန်းပေမဲ့ လက်ခံဖြေဆိုတာ မရှိပါဘူး။
၂ဝ၁၆ နဲ့ ၂ဝ၁၇ ခုနှစ်အတွင်း ဖြစ်ခဲ့တဲ့ ရခိုင်ပြည်နယ်က ရိုဟင်ဂျာတွေအပေါ် မြန်မာစစ်တပ်က အကြမ်းဖက်မှုတွေနဲ့ ပတ်သက်ပြီး ICC က ၂ဝ၁၉ ခုနှစ် နိုဝင်ဘာ ၁၄ ရက်နေ့မှာ စတင်စုံစမ်းစစ်ဆေးခဲ့တာ ဖြစ်ပါတယ်။
စုံစမ်းစစ်ဆေးမှုအပြီးမှာ စစ်ခေါင်းဆောင်ဟာ လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေ ကျူးလွန်တယ်လို့ ယုံကြည်ရတဲ့ ခိုင်လုံမှုရှိကြောင်း ICC ရှေ့နေချုပ်ရုံးက ဆုံးဖြတ်ခဲ့တာပါ။
မြန်မာစစ်တပ်ဟာ ဒီရာဇဝတ်မှုတွေကို ရဲ၊ နယ်ခြားစောင့်တပ်ဖွဲ့နဲ့ ရိုဟင်ဂျာမဟုတ်တဲ့ အရပ်သားတွေရဲ့ အကူအညီနဲ့ ၂၀၁၇ ခုနှစ်၊ ဩဂုတ် ၂၅ ရက်ကနေ ဒီဇင်ဘာ ၃၁ ရက်နေ့အတွင်း ကျူးလွန်ခဲ့တာလို့ ဆိုပါတယ်။
ဒီနေ့လျှောက်လဲချက်မှာ ဗီဒီယို၊ ဓာတ်ပုံ၊ မျက်မြင်သက်သေနဲ့ စာရွက်စာတမ်း သက်သေအထောက်အထားအစုံ ပါဝင်တယ်လို့ ဖော်ပြပါတယ်။
အခုလျှောက်လဲချက်ဟာ လိုအပ်တဲ့စံနှုန်းအတိုင်း ကိုက်ညီမှုရှိ မရှိကို ICC တရားသူကြီးတွေက ဆုံးဖြတ်သွားမှာ ဖြစ်တယ်လို့ ဆိုပါတယ်။
