စစ်ကောင်စီလက်နက်ကိုင်တို့က ပြည်သူ ၆ ဦးကိုပါ သတ်ဖြတ်ခဲ့ကြောင်း၊ ထိုအထဲမှ နွားကျောင်းသား နှစ်ဦးကိုသာ အမည်နှင့်တကွ အတည်ပြုနိုင်ကြောင်း ဒေသတွင်းသတင်းရင်းမြစ်တို့က ဆိုသည်။
နယ်မြေထိစပ်နေသည့် စစ်ကိုင်းတိုင်း ကသာမြို့နယ်နှင့် ရှမ်းပြည်နယ်မြောက်ပိုင်း မဘိမ်းမြို့နယ်ကြား စစ်ရေးလှုပ်ရှားနေသည့် စစ်ကောင်စီတပ်က ကျေးရွာ ၆ ရွာကို မီးရှို့သဖြင့် ရက်ပိုင်းအတွင်း အိမ်ခြေ ၆၀၀ ခန့် ပျက်စီးဆုံးရှုံးသွားသည်။
အင်အား ၁၅၀ ခန့်ပါ စစ်ကြောင်းသည် ဖေဖော်ဝါရီ ၉ ရက်နေ့မှစ၍ ရှမ်းမြောက် ငအိုးရွာဘက်မှ ကသာမြို့နယ်သို့ ဝင်ရောက်လာစဉ် အလယ်ကျွန်းရွာ၌လည်းကောင်း၊ ၁၁ ရက်နေ့တွင် မယ်ငိုရွာအနီး၌လည်းကောင်း ဒေသခံတော်လှန်ရေးအဖွဲ့များနှင့် တိုက်ပွဲဖြစ်ပြီးနောက် အနီးဝန်းကျင်ရွာများကို ဖျက်ဆီးစဉ် ဒေသခံ ၆ ဦးကိုပါ သတ်ဖြတ်သည်ဟု ဒေသတွင်း သတင်းရင်းမြစ်နှစ်ခုထံမှ သိရသည်။
မယ်ငိုရွာတွင် ဖြစ်ခဲ့သည့် ဖေဖော်ဝါရီ ၁၁ တိုက်ပွဲအပြီးမှ ၁၃ ရက်နေ့အထိ မယ်ငို အပါအဝင် တက်တူလယ်၊ သာယာကုန်း၊ အင်းကြီး၊ လှေဘို၊ ဘုရားတောင်တို့ မီးရှို့ခံရကြောင်း၊ မယ်ငို၊ အင်းကြီး၊ လှေပိုရွာတို့မှ ပျက်စီးဆုံးရှုံးမှုစာရင်း ကောက်နိုင်ပြီဖြစ်ကြောင်း ၎င်းတို့က ပြောသည်။
မယ်ငိုမှ ၂၅ လုံး၊ အင်းကြီးမှ နေအိမ် ၂၉၀ ခန့်၊ လှေပိုမှ နေအိမ် ၂၇၀ ခန့်၊ နွားတဲ၊ စပါးကျီများပါ မီးလောင်ပျက်စီးကာ အဆောက်အအုံဆုံးရှုံးမှု စုစုပေါင်း ၆၀၀ နီးပါးရှိမည်ဟု ဆိုသည်။
“ရွာအနောက်ဘက် တောင်ကုန်းကနေ ဆင်းလာပြီး ရွာထဲကို ဝင်တာ၊ ရွာကို (ဖေဖော်ဝါရီ ၁၂ ရက် မွန်းလွဲ) ၂ နာရီ ၄၅ လောက်မှာ စရှို့တာ၊ ည ၁၀ နာရီလောက်အထိကို မီးက မငြိမ်းဘူးရှင့်” ဟု အင်းကြီးရွာခံ အသက် ၃၀ အရွယ် အမျိုးသမီးက ပြောသည်။
စစ်ကြောင်းပြန်ထွက်သွားပြီးနောက် အင်းကြီးရွာ အနောက်ဘက် တောစပ်တွင် ရုပ်အလောင်းတွေ့ရသည့် နွားကျောင်းသားနှစ်ဦးကို အမည်နှင့်တကွ အတည်ပြုနိုင်ကြောင်း၊ တစ်ဦးမှာ ၎င်း၏ အစ်ကိုဝမ်းကွဲဖြစ်သူ အသက် ၃၈ နှစ်အရွယ် ကိုဝင်းဇော်ဦးဖြစ်ကာ နောက်တစ်ဦးမှာ အသက် ၂၀ အရွယ် ကိုဇင်မျိုးကိုတို့ဖြစ်ကြောင်း အထက်ပါ အမျိုးသမီးက ပြောသည်။
“တောထဲကို သူတို့ရဲ့နွားတွေကို သွားလွှတ်တဲ့အချိန်မှာ (စစ်တပ်နဲ့) တွေ့ပြီးတော့ အသတ်ခံရတာ၊ သေနတ်သံနှစ်ချက် ကြားရပြီး သူတို့ (စစ်ကောင်စီ) ရွာထဲကို ဝင်လာတာကို ကျွန်မတို့ အဝေးက လှမ်းမြင်လိုက်ရတယ်” ဟု ၎င်းက ပြောသည်။
နောက်ထပ်သေဆုံးသူ ၄ ဦးမှာ အင်းကြီးရွာသားများဖြစ်ကြပြီး ၎င်းတို့ရွာနှင့် လှေဘိုရွာကြားတွင် သတ်ဖြတ်ခံခဲ့ရခြင်းဖြစ်ကြောင်း၊ အမည်နှင့် ကိုယ်ရေးအချက်အလက်တို့ကို အတည်မပြုနိုင်သေးကြောင်း သိရသည်။
ထိုဒေသသို့ ဝင်လာသည့် စစ်ကြောင်းကို အမျိုးသားညီညွတ်ရေးအစိုးရ (NUG) ၏ ကသာ-PDF တပ်ရင်း (၃) နှင့် ကသာ-ပြည်သူ့ကာကွယ်ရေးအဖွဲ့တို့ ပူးပေါင်းတိုက်ခိုက်ခဲ့ကြောင်း အသက် ၄၀ ကျော်အရွယ် ဒေသခံ အမျိုးသားက ပြောသည်။
တိုက်ပွဲနှင့် အိုးအိမ်မီးရှို့ခံရမှုကြောင့် ဒေသခံ ၂၀၀၀ ကျော်မှာ နီးစပ်ရာရပ်ရွာများသို့ တိမ်းရှောင်ကာ ဖြစ်သလို နေထိုင်နေရကြောင်း အထက်ပါ သတင်းရင်းမြစ်တို့က ပြောသည်။
ယနေ့ (ဖေဖော်ဝါရီ ၁၄) တွင် လှေဘိုရွာအနောက်ဘက်သို့ ထိုစစ်ကြောင်း ပြန်ရောက်လာပြီးနောက် ပစ်ခတ်သံများ ကြားနေရကြောင်း ၎င်းတို့က ဆိုသော်လည်း အခြေအနေအသေးစိတ်ကို မသိရသေးပေ။
ဇန်နဝါရီ ၁၉၊ ၂၀ ရက်နေ့များကလည်း ကသာမြို့ ဧရာဝတီမြစ်အရှေ့ဘက်ကမ်းရှိ အလယ်ကျွန်းရွာကို စစ်ကောင်စီတပ်က မီးရှို့ဖျက်ဆီးသည့်အတွက် နေအိမ် ၃၀ ခန့်နှင့် စာသင်ကျောင်းတစ်ခု မီးလောင်ပျက်စီးခဲ့ဖူးသည်။
အထက်ပါဖြစ်စဉ်များနှင့် ပတ်သက်၍ သီးခြားအတည်မပြုနိုင်သေးသလို စစ်ကောင်စီက နှုတ်ဆိတ်နေဆဲဖြစ်သည်။
အရပ်သားအစိုးရကို ဖြုတ်ချကာ စစ်တပ်က အာဏာသိမ်းထားသည့် ၂ နှစ်အတွင်း တော်လှန်ရေးနှင့် နှစ်ပေါင်းများစွာ အလှမ်းဝေးသည့် နိုင်ငံအလယ်ပိုင်းမှ စစ်ကိုင်းတိုင်းကဲ့သို့ ဒေသများတွင်ပင် ခုခံတိုက်ခိုက်မှုများ ရှိလာသည်။
ထိုအခြေအနေတွင် နိုင်ငံအနှံ့ စစ်မျက်နှာများစွာဖွင့်ထားရသည့် စစ်တပ်က ကချင်ပြည်နယ်အတွင်းသို့ လက်နက်၊ ခဲယမ်းနှင့် စစ်ကူ၊ ရိက္ခာများ တင်ပို့ရာတွင် ဧရာဝတီမြစ်ကြောင်းကို အဓိကအားပြုလာရာ စစ်ကိုင်းတိုင်းအတွင်း မြစ်ကြောင်းတစ်လျှောက်ရှိ ထီးချိုင့်၊ ကသာ၊ မြို့လှ အခြေစိုက် တော်လှန်ရေးအဖွဲ့များက စစ်ကောင်စီတပ်ကို အဆက်မပြတ်တိုက်ခိုက်နေသည်။
