စစ်ကိုင်းတိုင်း၊ ပုလဲမြို့ နှောရိုးကျေးရွာမှ အိမ် ၂၅၀ ကျော်၊ သပြေကုန်းရွာမှ အိမ် ၄၀ ကျော်ကို စစ်ကောင်စီတပ်နှင့် ပျူစောထီးတို့က မီးရှို့ဖျက်ဆီးသည်ဟု ဒေသခံတို့က ပြောသည်။
စစ်ကောင်စီကို ဆန့်ကျင်မှုအားကောင်းသည့် စစ်ကိုင်းတိုင်း၊ ပုလဲမြို့နယ်အတွင်းရှိ ကျေးရွာများမှ အိမ်ခြေပေါင်း ၃၀၀ နီးပါး ၂ ရက်အတွင်း မီးရှို့ဖျက်ဆီးခံခဲ့ရကြောင်း ဒေသခံများနှင့် ဒေသ ကာကွယ်ရေးတပ်ဖွဲ့ဝင်များက ပြောသည်။
စစ်ကောင်စီတပ်ဖွဲ့ဝင်များနှင့် ပျူစောထီး ပူးပေါင်းတပ်ဖွဲ့ဝင်အင်အား ၈၀ ခန့်က ပုလဲ-ဂန့်ဂေါလမ်းမနှင့် ၂ မိုင်အကွာအဝေးရှိ နှောရိုးကျေးရွာကို မတ် ၁၀ တွင် လည်းကောင်း၊ မတ် ၁၁ တွင် သပြေအေးကျေးရွာကိုလည်းကောင်း ဝင်ရောက်စီးနင်း မီးရှို့ခဲ့ကြသည်ဟုဆိုသည်။
ထို့ကြောင့် နှောရိုးကျေးရွာမှ အိမ်ခြေ ၂၅၀ ကျော်၊ သပြေကုန်းရွာမှ အိမ်ခြေ ၄၀ ကျော် မီးလောင်ပျက်စီးခဲ့ရသည်။
မတ် ၁၀ နံနက် ၈ နာရီခန့်တွင် နှောရိုးရွာ၏မြောက်ဘက်သို့ စစ်ကောင်စီတပ်နှင့် ပျူစောထီး ပူးပေါင်းအဖွဲ့ ချဉ်းကပ်လာခဲ့ပြီး လက်နက်ကြီးများဖြင့် စတင်ပစ်ခတ်ခဲ့သည်ဟုဆိုသည်။
ထို့နောက် လက်နက်ငယ်များဖြင့် တရစပ်ပစ်ခတ်ကာ ဝင်ရောက်စီးနင်းကာ မီးရှို့ကြောင်း နှောရိုးကျေးရွာ အလယ်ပိုင်းတွင် နေထိုင်သူ အသက် ၃၉နှစ်အရွယ် ဒေသခံကပြောသည်။
“သူတို့တပ်ထိုင်ပြီးတော့ ညပိုင်းကျတော့ မီးရှို့တော့တာ။ မီးရှို့တော့ကျတော့ ကျွန်တော်တို့ မဝင်ရဲဘူး။ ရွာရဲ့တောင်ဘက်မှာသူတို့ လယ်ကွင်းထဲမှာ အိပ်ကြတယ်”ဟု လုံခြုံရေးအရ အမည်မဖော်လိုသော အဆိုပါ ဒေသခံက ပြောသည်။
“အဲဒီအချိန်မှာ ကျွန်တော်တို့သွားကြည့်တော့ ပစ်တာနဲ့ ပြန်ဆုတ်ပြေးခဲ့ရတယ်”
နှောရိုးကျေးရွာကို စီးနင်းပြီးနောက် ဒေသခံ ၈ ဦးကို ဖမ်းဆီးခေါ်ဆောင်သွားခဲ့ပြီး ထိုနေ့ည (မတ် ၁၀) တွင် ၄ ဦး ပြန်လွတ်လာကြောင်း၊ ကျန် ၄ ဦးမှာ ဒဏ်ရာပြင်းထန်စွာရရှိခဲ့ပြီး နောက်တစ်နေ့ ညပိုင်း ပြန်လွတ်လာကြောင်း ၎င်းက ဆက်ပြောသည်။
ဒုတိယနေ့တွင် လွတ်မြောက်လာသူ ၄ ဦးမှာ ၆၅ နှစ်အရွယ် ဦးမှတ်ရှိန်၊ ၆၇ နှစ်အရွယ် ဦးသန်းဝင်း၊ ၅၂ နှစ်အရွယ် ဦးဌေးမောင် ၊ အမည်မသိရှိသူ အသက် ၃၀ အရွယ် လူငယ်တစ်ဦးတို့ဖြစ်ကြောင်း နှောရိုးကျေးရွာ ဒေသခံများထံမှ သိရသည်။
ကျေးရွာအနီးရှိ ပုလဲ-ဂန့်ဂေါလမ်းမတွင် မိုင်းဆွဲတိုက်ခိုက်ခံရမှုများ၊ စစ်တပ်နှင့်ပျူစောထီးတပ်ဖွဲ့များ စခန်းချထားသည့် ဇီးဖြူကုန်းကျေးရွာ တိုက်ခိုက်ခံရသည့် ဖြစ်စဉ်များကို အဓိက စစ်မေးခဲ့သည်ဟု ပြန်လည်လွတ်မြောက်လာသူ ဒေသခံများကို ကိုးကားပြီး ၎င်းက ဆက်ပြောသည်
“ဓားနဲ့ ဆတ်ဆတ်ဆတ်ဆတ်နဲ့ ထိုးပြီးတော့မှ ရွာမှာ ခေါင်းဆောင်တွေက ဘယ်သူတွေလဲဆိုပြီးတော့ သူတို့ကိုမေးတယ်တဲ့။ အဲဒီလိုတော့ပြောတယ်။ နှိပ်စက်ပြီးတော့ လက်ပြန်ကြိုးတုတ်ထားတယ်။ မျက်လုံးကို ပဝါစည်းထားတယ်” ဟု နှောရိုးဒေသခံက ပြောသည်။
ထို့နောက် စစ်ကောင်စီ ပူးပေါင်းတပ်ဖွဲ့သည် နှောကုန်းကျေးရွာနှင့် ၁ မိုင်အကွာရှိ သပြေအေးကျေးရွာသို့ ဆက်လက်စစ်ကြောင်းထိုးချီတက်သွားခဲ့ကြသည်။
ချီတက်လာသူတို့ကို ပုလဲမြို့နယ် ပြည်သူ့ကာကွယ်ရေးတပ်ဖွဲ့၊ ဒေါင်းနက်အဖွဲ့၊ ပုလဲ ဂျိုကာအဖွဲ့ နှင့် ဗ.က.သ ကျောင်းသားများ ပူးပေါင်း တိုက်ခိုက်ခဲ့ခြင်းဖြစ်သည်။
တိုက်ပွဲအတွင်း တူမီးဖြင့် ပစ်ခတ်ခဲ့ရာ စစ်တပ်က လက်နက်ကြီးများဖြင့် ပြန်လည် ပစ်ခတ်ခဲ့ကြောင်း၊ ပစ်ခတ်မှု ငြိမ်သက်သွားချိန် စစ်တပ်က ပြန်သွားပြီဟု ယူဆ၍ သပြေအေးကျေးရွာကို ချဉ်းကပ်ခဲ့ရာ လက်နက်ကြီး၊လက်နက်ငယ်များနှင့် တရစပ် ပစ်ခတ်ခံရသဖြင့် ဆုတ်ခွာခဲ့ရကြောင်း ဒေါင်းနက် အဖွဲ့မှ ရဲဘော်ပေက ပြောသည်။
ထို့နောက် စစ်ကောင်စီတပ်နှင့် ပျူစောထီး ပူးပေါင်းအဖွဲ့သည် သပြေအေးကျေးရွာ၏ မြောက်ဖက် ၆ ဖာလုံအကွာရှိ အိမ်ခြေ ၃၀၀ နီးပါးရှိ တုန်းကံ ကျေးရွာသို့ စစ်ကြောင်းထိုး ချီတက်သွားခဲ့ကြသည်။ တုန်းကံ ကျေးရွာရှိ ဘုန်းကြီးကျောင်းတွင် မတ်လ ၁၂ ရက် နံနက်ပိုင်းမှ စတင်ကာ တပ်စွဲထားကြောင်းလည်း ဒေသခံတို့က ဆိုသည်။
“ကျွန်တော်တို့ အဲ့ဒီလိုမျိုး လက်နက်ကြီးတွေနဲ့ ဝင်ပြီးတော့ ကာလိုက်ပစ်လိုက်တဲ့ အတွက်ကြောင့် ချောင်း နားကို မရှို့ဘဲနဲ့ ပြန်သွားတာ” ဟုလည်း ရဲဘော်ပေက ပြောသည်။
သပြေအေးကျေးရွာ ယနေ့ ( မတ် ၁၂) နံနက်ပိုင်းအထိ မီးလောင်ကျွမ်းနေဆဲဖြစ်ကြောင်း မီးငြှိမ်းသတ်ရာတွင် ပါဝင်ခဲ့သူ တော်ဝင်နဂါးတပ်တော် (MRDA) အဖွဲ့ဝင် အသက် ၄၅ အရွယ် အမျိုးသားက ပြောသည်။
“အိမ်ခြေ ၄၀ ကျော်လောက်ရှိတာ ၄ လုံးပဲ ကျန်တာ။ အကုန်လုံး မီးလောင်ပြီးစဟာလေးတွေကို မီးငြိမ်းပြီးမှ ပြန်လာခါစရှိသေးတယ်။ ဘုန်းကြီးကျောင်းကျန်တယ်။ အိမ် ၄ လုံးကျန်တယ်” ဟု ၎င်းက ဆက်ပြောသည်။
အဆိုပါ စစ်ကြောင်းမှာ သပြေအေးကျေးရွာ၏ မြောက်ဖက် ၆ ဖာလုံအကွာအဝေးရှိ တုန်းကံကျေးရွာ ဘုန်းကြီးကျောင်းတွင် တပ်စွဲထားပြီး ရွာသူ ရွာသားများမှာလည်း တိမ်းရှောင်နေရသည်ဟုလည်းဆိုသည်။
ပြည်သူ့ခုခံစစ်အားကောင်းသည့် ပုလဲ-ဂန့်ဂေါလမ်းမအနီးရှိ ကျေးရွာများကို စီးနင်းနိုင်ရန် စစ်တပ်နှင့် ပျူစောထီးပူးပေါင်းအဖွဲ့ကပြီးခဲ့သည့် ဖေဖော်ဝါရီ ကတည်းကပင် စတင်ကြိုးစားခဲ့သည်။
ဖေဖော်ဝါရီ ၄ ကလည်း ပုလဲ-ဂန့်ဂေါသွား လမ်းမအနီး ကိုင်းတွင်းရွာနှင့် လှော်ကားရွာများကို စစ်တပ်နှင့် အင်မထီးရွာခံ ပျူစောထီးများက အင်အားရာဂဏန်းဖြင့် ဝင်ရောက်စီးနင်းခဲ့သည်။
အဆိုပါရွာများရှိ ပြည်သူတို့၏ ပစ္စည်းများကို ကား ၁၀ စီးဖြင့် သယ်ယူပြီးနောက် အိမ်များကို မီးရှို့ခဲ့ရာ အိမ်ခြေ ၈၀၀ နီးပါး မီးလောင်ပျက်စီးခဲ့သည်။
စစ်အာဏာသိမ်းပြီးနောက် စစ်ကိုင်းတိုင်းရှိ ကျေးရွာများတွင် ဖြစ်ပွားခဲ့သည့် ရွာလုံးကျွတ်မီးရှို့မှုများ၊ အစုလိုက်အပြုံလိုက် သတ်ဖြတ်မှု၊ လုယက်မှုတို့နှင့် ပတ်သက်ပြီး စစ်ကောင်စီက ငြင်းဆိုထားသည်။
