မြန်မာနိုင်ငံတွင် ဆန္ဒ ထုတ်ဖော်မှုများအပေါ် အကြမ်းဖက်မှုများ ပိုမိုဆိုးရွားပြင်းထန် လာနေခြင်းကို ပြင်းထန်စွာရှုတ်ချ ကြောင်း ကုလသမဂ္ဂလူ့အခွင့်အ ရေးအဖွဲ့ရုံးက ထုတ်ပြန်သည်။
ကုလသမဂ္ဂ လူ့အခွင့်အရေးအဖွဲ့ရုံး ပြောရေးဆိုခွင့်ရှိသူ Ravina Shamdasani ၏ မြန်မာနိုင်ငံဆိုင်ရာ ပြောဆိုချက်ကို ဖေ ဖော်ဝါရီ ၂၈ ရက်တွင် ထုတ်ပြန်ရာတွင် စစ်တပ်အနေဖြင့် ငြိမ်းချမ်းစွာဆန္ဒထုတ်ဖော်နေသူများအပေါ် အင်အားသုံးဖြိုခွင်းမှုကို ချက်ချင်း ရပ်တန့်ရန် တောင်းဆိုကြောင်း ဖော်ပြခဲ့သည်။
နိုင်ငံအနှံ့နေရာများစွာတွင် ရဲနှင့် စစ်တပ်အင်အားစုများမှ ငြိမ်းချမ်းစွာ ဆန္ဒပြနေသူများကို တိုက်ခိုက်ခဲ့ရာ ကုလသမဂ္ဂ လူ့အခွင့်အရေးရုံးမှ လက်ခံရရှိသော ခိုင်လုံသော သတင်းအချက်အလက် များအရ အနည်းဆုံး ၁၈ ဦး အ သက်ဆုံးရှုံးခဲ့ပြီး လူပေါင်း ၃၀ ကျော် ထိခိုက်ဒဏ်ရာရခဲ့သည်ဟုထုတ်ပြန်သည်။
သေဆုံးမှုများ ဖြစ်ပွားခဲ့ရခြင်းမှာ ရန်ကုန်၊ ထားဝယ်၊ မန္တလေး၊ မြိတ်၊ ပဲခူးနှင့် ပခုက္ကူမြို့ များတွင် ကျည်ဆန်အစစ်များ အ သုံးပြုကာ လူအုပ်များအတွင်းသို့ ပစ်ခတ်ခဲ့သောကြောင့် ဖြစ်သည်ဟု ထုတ်ပြန်သည်။ နေရာအနှံ့တွင် အသံမြည်ဗုံးနှင့် မီးဗုံးများအပြင် မျက်ရည်ယို ဗုံးများကိုလည်း အသုံးပြုခဲ့သည်ဟု သိရကြောင်း ဖော်ပြထားသည်။
မြန်မာပြည်သူများအနေဖြင့် ငြိမ်းချမ်းစွာစုဝေးခွင့်နှင့် ဒီမိုက ရေစီကို ပြန်လည်ထူထောင်ရေး တောင်းဆိုပိုင်ခွင့်ရှိကြောင်း၊ အကြမ်းဖက် သွေးထွက်သံယို ဖိနှိပ်မှုမပြုလုပ်ဘဲ အဆိုပါ အခြေခံရပိုင်ခွင့်များကို စစ်တပ်နှင့် ရဲတပ်ဖွဲ့က လေးစားရမည်ဖြစ်ကြောင်း ထုတ်ပြန်ခဲ့သည်။
ဆရာမတင်နွယ်ဦးကျဆုံးခဲ့သောနေရာတွင် ဆရာ၊ဆရာမများက ဆုတောင်းပေးနေသည်ကိုယမန်နေ့ကတွေ့ရစဉ် (ဓာတ်ပုံ – 7Day News)
မြန်မာနိုင်ငံတွင် စစ်အာဏာသိမ်းပြီးနောက် နိုင်ငံရေးခေါင်းဆောင်များ၊ တက်ကြွလှုပ်ရှားသူ များ၊ အရပ်ဘက်လူမှုအဖွဲ့အ စည်းမှ အဖွဲ့ဝင်များ၊ သတင်းစာဆရာများနှင့် ဆေးဘက်ဆိုင်ရာဝန်ထမ်းများကို ဖမ်းဆီးခြင်းဖြင့် အတိုက်အခံများနှင့် ဆန္ဒပြသူများ၏ အသံများကို ပိုမိုပစ်မှတ်ထား လာခဲ့ကြောင်း၊ ဖေဖော်ဝါရီ ၂၈ရက် တစ်ရက်တည်း၌ပင် ရဲတပ်
ဖွဲ့က ဆေးဘက်ဆိုင်ရာပညာရှင် နှင့် ကျောင်သားကျောင်းသူ အ နည်းဆုံး ၈၅ ယောက်နှင့် သတင်းစာဆရာ ခုနစ်ယောက်တို့ကို ဆန္ဒပြပွဲတွင်ပါရှိနေသည့်အတွက် ဖမ်းဆီးထိန်းသိမ်းခဲ့ကြောင်း ထုတ်ပြန် ခဲ့သည်။
အာဏာသိမ်းပြီးချိန်မှစ၍ တရားလက်လွတ် ဖမ်းဆီးထိန်းသိမ်းခံရသူ ၁,၀၀၀ ကျော်ရှိသွားပြီ ဖြစ်ပြီး ယခုစာရင်းတွင် မပါဝင် ဘဲကျန်ရှိနေ သူအချို့လည်း ရှိနေ ကြောင်း ထုတ်ပြန်ချက်၌ ဖော်ပြထားသည်။ အများစုမှာ တရား ဥပဒေနှင့်အညီ မှန်ကန်သော လုပ်ထုံးလုပ်နည်းများဖြင့် ဆောင်ရွက်မှုမရှိဘဲ လူ့အခွင့်အရေးများဖြစ် သော လွတ်လပ်စွာ တွေးခေါ်ယူ ဆခွင့်၊ လွတ်လပ်စွာ ထုတ်ဖော်ပြောဆိုခွင့်နှင့် ငြိမ်းချမ်းစွာ စုဝေးခွင့်တို့ကို ကျင့်သုံးရုံဖြင့် ဖမ်းဆီး ထိန်းသိမ်း ခံကြရခြင်းဖြစ်ကြောင်း ဖော်ပြသည်။
ဒီမိုကရေစီနည်းအရ ရွေးကောက်တင်မြှောက် ခံထားရသော အစိုးရအဖွဲ့ဝင်များအပါ အဝင် တရားလက်လွတ်ထိန်း သိမ်းခံထားရသူအားလုံးကို အ မြန်ဆုံးလွှတ်ပေးရန်လည်း ကုလ သမဂ္ဂ လူ့အခွင့်အရေးအဖွဲ့ရုံး က ထပ်လောင်းတောင်းဆိုခဲ့သည်။
နိုင်ငံတကာ အသိုက်အဝန်းအနေဖြင့်လည်း ဆန္ဒပြသူများနှင့် မြန်မာနိုင်ငံ ဒီမိုကရေစီ ပြန်လည် ထွန်းကားရေးအတွက် ဆောင်ရွက်နေသူများအားလုံးနှင့် တစ်သားတည်းအတူ ရပ်တည်ရမည် ဖြစ်ကြောင်းလည်း ဖော်ပြသည်။
ထို့အပြင် မြန်မာနိုင်ငံဆိုင် ရာအိန္ဒိယသံရုံးကလည်း ရန်ကုန် မြို့နှင့် မြန်မာနိုင်ငံတစ်ဝန်းရှိ အခြားသောမြို့များတွင် အသက် ဆုံးရှုံးခဲ့ကြရသောသူများအတွက် အလွန်ပင် ဝမ်းနည်းစိတ်မကောင်း ဖြစ်မိကြောင်း ထုတ်ပြန်ထား သည်။
ယမန်နေ့က နိုင်ငံတစ်ဝန်း၌ စစ်အာဏာရှင်အလိုမရှိကြောင်း ကန့်ကွက်ဆန္ဒပြသည့် ပြည်သူများအား တပ်နှင့် ရဲက အကြမ်းဖက်နှိမ်နင်းပစ်ခတ်၍ လူသေဆုံးမှု၊ ဒဏ်ရာရမှုများ ဖြစ်ပေါ်ပြီးနောက် အိန္ဒိယသံရုံးက ယခုကဲ့သို့ ထုတ်ပြန်ခြင်းဖြစ်သည်။ သို့ရာတွင် ထုတ်ပြန်ချက်တွင် အသက်ဆုံးရှုံးခဲ့ကြရသည့် အကြောင်းရင်းကို ဖော်ပြထားခြင်းမရှိပေ။
ကွယ်လွန်သွားကြသော သူများ၏ မိသားစုဝင်များ၊ ချစ်ခင်ရသူများနှင့် ထပ်တူထပ်မျှ ဝမ်းနည်းကြောင်း အိန္ဒိယသံရုံး ထုတ်ပြန် ချက်၌ ဖော်ပြထားသည်။
သက်ဆိုင်သူများအားလုံး အနေဖြင့် ငြိမ်းချမ်းစွာညှိနှိုင်း အဖြေရှာခြင်းမှတစ်ဆင့် ပြဿနာ များကို ဖြေရှင်းရန်နှင့် ထိန်းထိန်း သိမ်းသိမ်းဆောင်ရွက်ရန်လည်း အိန္ဒိယသံရုံးက တိုက်တွန်းခဲ့ သည်။
