■ ပဲခူးတိုင်း၊ ကျောက်ကြီးမြို့နယ်မှာ တပ်မတော်နဲ့ ကရင်အမျိုးသားအစည်းအရုံး KNU တပ်မဟာ ၃ ကြား တိုက်ပွဲကြောင့် ဒေသခံ ၆၀၀ နီးပါး ထွက်ပြေးနေကြပါတယ်။
ကျောက်ကြီးမြို့နယ် မူဒယ်ကျေးရွာ အထက်ဘက် ချောင်းနှစ်ခွဘက်မှာ မနေ့က တိုက်ပွဲဖြစ်ပွားပြီး ဒေသခံတွေ ထွက်ပြေးတိမ်းရှောင်နေရတယ်လို့ ညောင်လေးပင်ခရိုင် ကရင်အရပ်ဖက်လူမှုအဖွဲ့က စောအောင်ကဲ က ပြောပါတယ်။
တိုက်ပွဲအခြေအနေကို တောင်ပိုင်းတိုင်းစစ်ဌာနချုပ် ပြောရေးဆိုခွင့်ရှိသူနဲ့ KNU တပ်မဟာ ၃ ညောင်လေးပင်ခရိုင် ကျောက်ကြီးဆက်ဆံရေးရုံး တာဝန်ရှိသူကို RFA က ဆက်သွယ်မေးမြန်းပေမယ့် ဖုန်းမဖြေပါဘူး။
တပ်မတော်ဘက်က တောင်ပိုင်းတိုင်းစစ်ဌာနချုပ်လက်အောက်ရှိ ခလရ ၅၇ တပ်ရင်းက နယ်မြေကျော်လှုပ်ရှားတာကြောင့် မနေ့က တိုက်ပွဲ နှစ်ကြိမ်ဖြစ်ခဲ့တာလို့ KNU ပြန်ကြားရေးဌာနက သတင်းထုတ်ပြန်ထားပါတယ်။
KNU ညောင်လေးပင်ခရိုင် တပ်မဟာ ၃ အုပ်ချုပ်ရေးနယ်မြေက ခဲဒဲကျေးရွာအုပ်စုမှာပါဝင်တဲ့ ကျေးရွာ သုံးရွာက လူဦးရေ ၅၈၈ ယောက် ထွက်ပြေးတိမ်းရှောင်နေရကြောင်းလည်း KNU ပြန်ကြားရေးဌာနက ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ ဒီဇင်ဘာလကုန်လောက်ကလည်း KNU တပ်မဟာ ၃ နယ်မြေမှာ တပ်မတော်နဲ့ တိုက်ပွဲဖြစ်ခဲ့ပြီး ဒေသခံတွေက တပ်စခန်းတွေ ဖယ်ရှားဖို့ ကြေညာချက်ထုတ် တောင်းဆိုထားကြပါတယ်။
ကျောက်ကြီးနဲ့ နယ်မြေထိစပ်နေတဲ့ ကရင်ပြည်နယ် ဖာပွန်မြို့နယ်က KNU တပ်မဟာ ၅ နယ်မြေမှာလည်း တပ်မတော်နဲ့ KNU တို့ စစ်ရေးတင်းမာနေပါတယ်။
တိုက်ပွဲဖြစ်နေတာတွေရပ်တန့်ဖို့ကိစ္စ တွေ့ဆုံဆွေးနွေးဖို့ တပ်မတော်ကို KNU က စာပို့တောင်းဆိုထားပေမယ့် တစ်စုံတစ်ရာ အကြောင်းပြန်ကြားခြင်း မရှိသေးကြောင်း KNU က ပြောထားပါတယ်။
Photo: KNU Ler Doh organisational department
(တပ်နဲ့ KNU တိုက်ပွဲတွေကြောင့် ထွက်ပြေးနေရတဲ့ ကျောက်ကြီးမြို့နယ်မှ ခဲဒဲရွာသားတွေကို ၂၀၂၁ ဇန်နဝါရီ ၁၁ ရက်နေ့က တွေ့ရစဉ်)
